BEAR WANDERING: కరీంనగర్ జిల్లా శాతవాహన విశ్వవిద్యాలయంలో ఎలుగుబంటి సంచారం మరోసారి కలకలం సృష్టించింది. దాదాపు 200ఎకరాల్లో విస్తరించి ఉన్న ప్రాంగణంలో పూలకుండీలు చిందరవందర చేయడంతో భల్లూకం మళ్లీ వచ్చిందనే అభిప్రాయానికి వచ్చారు. తగిన జాగ్రత్తలు తీసుకొంటూనే దాన్ని పట్టుకొనేందుకు ప్రత్యేక ఏర్పాట్లు చేశారు. విషయం తెలిసిన వెంటనే విశ్వవిద్యాలయానికి వచ్చిన అటవీ శాఖ అధికారులు.. ఎలుగుబంటి జాడ కోసం జల్లెడ పడుతున్నారు.
ఇక్కడ చిట్టడవిలో ఉన్న రెండు కుంటల వద్దకు ఎలుగు బంట్లు నీటి కోసం వస్తుంటాయని అంచనా వేశారు. దీంతో ప్రాంగణంలో ఎలుగు ఏయే ప్రాంతాల్లో సంచరించే అవకాశం ఉందో ఆయా ప్రాంతాల్లో కెమెరాలతోపాటు బోన్లు ఏర్పాటు చేశారు. మూడు నెలలుగా వర్సిటీ ప్రాంతంలోనే సంచరిస్తున్న దృష్ట్యా.. ఇప్పటివరకు ఎవరికి ఎలాంటి అపాయం తలపెట్టలేదని.. అయినా జాగ్రత్తగా ఉండాలని విద్యార్థులను కోరినట్లు అటవీ శాఖ అధికారులు తెలిపారు.
కరీంనగర్ చుట్టుపక్కల విస్తారమైన అడవులు, భారీ గుట్టలు ఉండేవి. భూముల ధరలు పెరగడం, నగరం విస్తరిస్తుండటంతో కొండలు, గుట్టలతోపాటు చెట్లు కూడా మాయమవుతున్నాయి. ఫలితంగా అడవుల్లో సంచరించే జంతువులు ఆహారం, నీటి కోసం జనావాసాల్లోకి వస్తున్నాయి. గతంలో బీఎస్ఎన్ఎల్, పోలీస్ కమిషనర్ కార్యాలయాల్లోనూ భల్లూకాలు దూరి గందరగోళం సృష్టించాయి. ప్రస్తుతం పోటీ పరీక్షలు ఉన్న దృష్ట్యా విద్యార్దులు చదువుకొనేందుకు అవకాశం ఇవ్వాలన్న ఉద్దేశంతో సెలవులు ప్రకటించడం లేదని అధికారులు తెలిపారు. కెమెరాల్లో నమోదు అయ్యే అంశాలను బట్టి ఎప్పటికప్పుడు తగు నిర్ణయం తీసుకుంటామని వారు స్పష్టం చేశారు.
ఇదీ చదవండి: పెండింగ్ హామీలపై దృష్టి సారించిన సర్కారు..
