పోలీసులు చేపట్టిన వాహనాల తనిఖీ ఓ యువకుడి ప్రాణాల మీదకు తేవడంతో పాటు ఉద్రిక్తతకు దారి తీసింది. కామారెడ్డి జిల్లా రాజంపేట మండలం ఆరుగొండలో సాయంత్రం పోలీసులు వాహన తనిఖీలు చేపట్టారు. పోలీసులకు దూరంగా వాహనదారులు వాహనాలు నిలుపుకున్నారు. తనిఖీల అనంతరం ఒక్కసారిగా వాహనాలు వేగంగా వెళ్లాయి. ఇదే క్రమంలో ప్రశాంత్ అనే యువకుడు అదుపు తప్పి ద్విచక్ర వాహనంపై నుంచి పడి తీవ్ర గాయాలపాలయ్యాడు. అపస్మారక స్థితికి చేరుకున్న అతడిని కామారెడ్డి ఏరియా ఆస్పత్రికి తరలించారు.
పోలీసులే కారణం...
పోలీసులు టార్చ్లైట్ వెయ్యడం వల్ల యువకుడు అదుపు తప్పి పడిపోయాడని... అయినా వారు పట్టించుకోకుండా వెళ్లిపోయారని ఆరోపిస్తూ గ్రామస్థులు ఆందోళనకు దిగారు. సంఘటనా స్థలంలోనే పోలీసులపై దాడికి యత్నించి వారి ద్విచక్ర వాహనం, ఆర్టీసీ బస్సు అద్దాలు ధ్వంసం చేశారు. తనిఖీల పేరుతో పోలీసులు వేధిస్తున్నారని గ్రామస్థులు ఆగ్రహం వ్యక్తం చేస్తూ ఆందోళన చేపట్టారు. ఉద్రిక్తత నెలకొనడం వల్ల గ్రామంలో అదనపు పోలీసు బలగాలను మోహరించారు.
