Gattu Lift Irrigation Scheme Works In Jogulamba Gadwal: జోగులాంబ గద్వాల జిల్లాలో అత్యంత వెనకబడిన ప్రాంతం గట్టు. జూరాల, నెట్టెంపాడు, భీమా లాంటి ఎత్తిపోతల పథకాలున్నా.. ఈ ప్రాంతానికి ఉపయోగం లేదు. ఎత్తైన ప్రాంతం కావటంతో వర్షాలు కురిస్తేనే పంటలు పండేది. అందుకే ఇక్కడి ప్రజలు ఇతర రాష్ట్రాలకు వలస వెళుతుంటారు. గట్టు ఎత్తిపోతల పథకం పూర్తయితే తమ ప్రాంతానికీ మేలు జరుగుతుందని ఆశించిన ప్రజలకు ఎట్టకేలకు తీపి కబురు అందింది. దశాబ్దాలులగా ఎన్నికల హామీగా మిగిలిన గట్టు ఎత్తిపోతల పథకం ఎట్టకేలకు కార్యరూపం దాల్చుతోంది.
ర్యాలంపాడు జలాశయం నుంచి 2.80 టీఎంసీల నీటిని ఎత్తిపోయటం ద్వారా గట్టు ఎత్తిపోతల పథకానికి నీరివ్వాలన్నది ప్రభుత్వ లక్ష్యం. రూ.580 కోట్లతో ప్రభుత్వం ఈ పనులకు పరిపాలన అనుమతులు ఇవ్వగా.. రూ.328 కోట్లకు టెండరు దక్కించుకున్న గుత్తేదారు సంస్థ పనుల్ని ప్రారంభించింది. 1.32 టీఎంసీల సామర్థ్యంలో జలాశయాన్ని నిర్మించనున్నారు. ఈ పనులు 18 నెలల్లో పూర్తి చేయాల్సి ఉంటుంది. తొలి దశలో రిజర్వాయర్‌, అప్రోచ్‌ కెనాల్, పంపుహౌస్‌, ప్రెజర్ లెంత్ పనులు చేపట్టనున్నారు. మెుదటగా ర్యాలంపాడు రిజర్వాయర్‌ నుంచి 3.2 కిలోమీటర్ల వరకు అప్రోచ్‌ కెనాల్‌ను నిర్మిస్తారు. రెండో దశలో రూ.70కోట్లతో కాలువ నిర్మాణాలు చేపట్టనున్నారు.
ఈ పథకం పూర్తయితే ధరూరు, గట్టు, కేడీ దొడ్డి, మల్దకల్ మండలాల్లోని మెట్ట ప్రాంతాలైన 21 గ్రామాల్లోని 30వేల ఎకరాలకు సాగునీరు అందుతుంది. చెరువులు నింపడం ద్వారా మరో 3 వేల ఎకరాలకు నీరు అందించవచ్చు. 2018 జూన్‌లో గట్టు ఎత్తిపోతల పథకానికి శంకుస్థాపన చేసిన ముఖ్యమంత్రి .. రెండేళ్లలో నీళ్లందిస్తామని హామీ ఇచ్చారు. అయితే ఇప్పటికైనా నిధులు, ధరల పెరుగుదల, ఇతర సాంకేతిక కారణాలో ఎత్తిపోతలను ఆలస్యం చేయొద్దని ప్రజలు విజ్ఞప్తి చేస్తున్నారు. వీలైనంత త్వరగా పనులు పూర్తి చేయాలని కోరుతున్నారు.
గట్టు ఎత్తిపోతల పథకానికి 935 ఎకరాల భూమి అవసరం కాగా.. రైతులు కేవలం 100 ఎకరాల్లోపు మాత్రమే పట్టా భూములు కోల్పోతున్నారు. దీంతో ప్రాజెక్టుకు భూసేకరణ సమస్య పెద్దగా లేదు. ప్రస్తుతం భూసేకరణ అవసరం లేని ప్రాంతాల్లోనే పనులు కొనసాగుతున్నాయి. భూసేకరణ సైతం పూర్తైతే పనులు మరింత జోరందుకోనున్నాయి.
"గట్టు ఎత్తుపోతలలో 950 ఎకరాలు భూసేకరణ ప్రతిపాదనను కలెక్టర్కు పంపించాము. ఈ 950 ఎకరాలకు నోటిఫికేషన్ కూడా ఇవ్వడం జరిగింది. భూసేకరణ అవార్డ్ ఎంక్వరీ అయితే భూసేకరణ పరిహారం కూడా వేగంగానే చెల్లిస్తాము." - రహీముద్దీన్, ఈఈ, నీటిపారుదల శాఖ, గద్వాల
"వర్షాకాలంలో మాకు ఒకే ఒక పంట పండితే పండుతుంది లేకపోతే లేదు. వర్షాధారం మీదే జీవనోపాధి ఉంటుంది కాబట్టి ఆ పంటలు రాకపోతే మాకు కష్టం అవుతుంది. ఈ ప్రాంతం ఎడారిగా మారుతుంది. ఇంతకు ముందు ఇక్కడి ప్రజలు కర్ణాటక, ఆంధ్రప్రదేశ్, మహారాష్ట్ర వెళ్లి బతికేవారు. ఇప్పుడు ఇక్కడ ఈ ప్రాజెక్టు వచ్చిందంటే ఎక్కడికీ వలసలు పోకుండా ఇక్కడే బతుకుతారు. ఈ గట్టు ఎత్తుపోతల పథకం పూర్తి అయితే ఇంక ఈ ప్రాంతంలో వలసలు ఉండవు. అంతా సస్యశ్యామలంగా మారుతుంది." - రైతులు
ఇవీ చదవండి:
