ఎమ్మెల్యే సోదరుడికి దళిత బంధు.. వివాదంతో ముదురుతుండటంతో..

MLA's Brother name Dalit Bandhu Scheme: ఎస్సీలు ఆర్థికంగా ఎదగాలనే సంకల్పంతో రాష్ట్ర ప్రభుత్వం ప్రతిష్ఠాత్మకంగా చేపట్టిన పథకం దళితబంధు. వారి ఉపాధి మార్గానికి ఆర్థిక ఆసరాను కల్పించి.. సమాజంలో గౌరవంగా బతకాలనే ఆకాంక్షతో చేపట్టిన ఈ పథకంలో పలుచోట్ల కొన్ని అవకతవకలు జరుగుతున్నాయనే విమర్శలు వస్తున్నాయి. రాజకీయ నాయకుల పలుకుబడి ఉపయోగించి ఆర్థిక స్థితి మంచిగా ఉన్నవారు సైతం ఈ పథకానికి అర్హులుగా పేరు నమోదు కావడం ఆశ్చర్యాన్ని కలిగిస్తోంది.

MLA's Brother name Dalit Bandhu Scheme: ఎస్సీల అభ్యున్నతి కోసం రాష్ట్ర ప్రభుత్వం చేపట్టిన దళితబంధు పథకం అమలులో కొన్నిచోట్ల అవకతవకలు జరుగుతున్నట్లు ఆరోపణలు వినిపిస్తున్నాయి. పలువురు ప్రజాప్రతినిధులు తమ అనుచరులు, కార్యకర్తలకే అధిక ప్రాధాన్యం ఇస్తున్నారనే విమర్శలు వ్యక్తమవుతున్నాయి. తాజాగా జనగామ జిల్లాలో ఎంపిక చేసిన 185 మంది లబ్ధిదారుల జాబితాలో స్టేషన్‌ ఘన్‌పూర్‌ ఎమ్మెల్యే, మాజీ ఉపముఖ్యమంత్రి తాటికొండ రాజయ్య సోదరుడు, ఘన్‌పూర్‌ సర్పంచి సురేశ్‌కుమార్‌ పేరు ఉండటం గమనార్హం. ఈ విషయమై అధికారులను వివరణ కోరగా.. దళితబంధు పథకంలో ఎస్సీల్లో పేదలకే ఇవ్వాలనే నిబంధన లేదని, ప్రభుత్వ ఉద్యోగులు కాని 60 ఏళ్ల లోపు వారు అంతా అర్హులేనని వివరించారు.

జాబితాలో తాటికొండ సురేశ్‌ కుమార్‌(4)

నేనేం తీసుకోను: ఇదిలా ఉండగా... ఈ అంశంపై ఎమ్మెల్యే సోదరుడు ఘన్​పూర్ సర్పంచ్ సురేశ్​కుమార్ స్పందించారు. తనకు వర్తించిన దళితబంధు పథకం స్వచ్ఛందంగా వదులుకుంటున్నట్లు తాటికొండ సురేశ్​ కుమార్ ప్రకటించారు. జిల్లాలో ఎంపిక చేసిన 185 మంది లబ్ధిదారుల జాబితాలో స్టేషన్ ఘన్​పూర్ ఎమ్మెల్యే తాటికొండ రాజయ్య సొదరుడు సురేష్ కుమార్ పేరు కూడా ఉండడం విమర్శలపాలైంది. నిరుపేదలకు ఉపయోగపడాల్సిన దళితబంధు పథకం తెరాస ప్రజాప్రతినిధులు దుర్వినియోగం చేస్తున్నారని.. తమ బంధువులు, కార్యకర్తలను అర్హుల జాబితాలో చేరుస్తున్నారంటూ విపక్షాలు ఆరోపిస్తున్నాయి. ఇవాళ స్టేషన్ ఘన్​పూర్​లో ఆందోళనలకు సిద్ధమైన నేపథ్యంలో వివాదం మరింత ముదురక ముందే సురేశ్​ కుమార్ మీడియా సమావేశాన్ని నిర్వహించి... స్వచ్ఛందంగా పథకం నుంచి వైదొలుగుతున్నట్లు ప్రకటించారు.

ఇటీవల 118 నియోజకవర్గాల్లో లబ్ధిదారుల ఎంపిక పూర్తయినప్పటికీ.. జాబితాలో లేని ఇతర ఆశావహ కుటుంబాల నుంచి వ్యతిరేకత వస్తుందన్న కారణంతో ప్రస్తుతం గోప్యత పాటిస్తున్నారు. ఎంపిక ప్రక్రియ పూర్తికాలేదని చెబుతున్నారు. ఎమ్మెల్యేలు.. నియోజకవర్గాల్లో తమ అనుచరులను, అనుకూలంగా ఉన్నవారిని ఎంపిక చేస్తున్నట్లు ఆరోపణలు వస్తున్నాయి. కొన్నిచోట్ల నేతల అనుచరులు.. ఎంపిక చేసిన లబ్ధిదారులతో వాటాలు (రూ.2-4 లక్షలు) మాట్లాడుకుంటున్నారన్న విమర్శలూ ఉన్నాయి. మహబూబ్‌నగర్‌ జిల్లాలో స్థానిక ప్రజాప్రతినిధుల పేర్లు చేర్చారని కొందరు కలెక్టర్‌కు ఫిర్యాదు చేశారు. నారాయణపేట, గద్వాలలో పేదలను కాకుండా ఎస్సీ కార్పొరేషన్‌ నుంచి రుణాలు తీసుకున్నవారిని మరోసారి ఎంపిక చేస్తున్నట్లు అక్కడి స్థానికులు పేర్కొంటున్నారు.

ఇదీ చదవండి: ఇక ప్రజా ఉద్యమాలు... భాజపా, తెరాసపై కాంగ్రెస్ పోరు