జగిత్యాల జిల్లా మెట్పల్లి పరిధిలోని మెట్పల్లి, వేంపేట, రేగుంట, చౌలమద్ది, వెల్లుల్ల గ్రామాల్లో ఏప్రిల్ 25వ తేదీన 5 కొనుగోలు కేంద్రాలను ఏర్పాటు చేశారు. ధాన్యం కొనుగోళ్ల కోసం కొన్ని నిబంధనలు విధించి... వాటి ప్రకారమే కొనుగోలు చేస్తామని అధికారులు సూచించారు.
జగిత్యాల జిల్లా మెట్పల్లి సహకార సంఘం ఆధ్వర్యంలో ఏర్పాటు చేసిన రేగుంట కొనుగోలు కేంద్రంలో అన్నదాతలు... పండించిన పంటను అమ్ముకోవడానికి నానా కష్టాలు పడాల్సి వస్తోంది. ఆరుగాలం కష్టపడి సాగు చేసిన ధాన్యాన్ని విక్రయించుకునేందుకు ఎన్నో ఇబ్బందులు పడుతున్నారు. ఓ పక్క కరోనా వ్యాప్తి, లాక్డౌన్ల కారణంగా కూలీలు, హమాలీలు అందుబాటులో లేరు. మరో పక్క అకాల వర్షాలు ఎప్పుడు ముంచుకొస్తాయో తెలియదు. ఈ సంకట పరిస్థితుల్లో చేతిలోని పంటను తొందరగా అమ్ముకొని, భారాన్ని దించుకోవాలి అనేది ప్రతి రైతన్న ఆలోచన.
ఇదే అదనుగా భావించి... అధికారులు, దళారులు కుమ్మక్కై, ధాన్యం క్రయవిక్రయాలను ఆలస్యం చేస్తున్నారని అన్నదాతలు ఆరోపిస్తున్నారు. రైతుల వద్ద కొనుగోలు చేసే ధాన్యంలో తాలు, తప్ప పేరిట అదనంగా 2కిలోలు తూకం తీయండ కర్షకులకు తీవ్ర నష్టాన్ని కలిగిస్తోంది. గతంలో 40 కిలోలకు గాను ఒక కిలో అదనంగా తీసుకునేవారు కానీ ప్రస్తుతం 2 కిలోలు అదనంగా తీసుకుంటున్నారని రైతులు అంటున్నారు. డబ్బులు మాత్రం 40 కిలోలకే చెల్లిస్తున్నారని తెలిపారు. దీంతో పాటు గతంలో క్వింటాకు రూ. 22 ఉన్న హమాలీ ధరను ప్రస్తుతం అమాంతం రూ. 32కు పెంచేశారు. హమాలీకి డబ్బులు చెల్లించి కూడా, ధాన్యాన్ని తామే సంచుల్లో ఎత్తాల్సి వస్తోందంటున్నారు కర్షకులు. తేమ శాతం ఎక్కువగా ఉందని చెప్పి 20 రోజుల వరకు పంటను కొనుగోలు చేయడం లేదని వాపోతున్నారు.
ఉదయం నుంచి సాయంత్రం వరకు ధాన్యం ఆరబోత, రాత్రికి కుప్ప చేయడం... ఇదే వారికి రోజు వారి దినచర్యగా మారింది. అధికారుల నిర్లక్ష్య వైఖరితో కర్షకులు కుప్పల వద్దే పడిగాపులు కాస్తున్నారు. ధాన్యాన్ని తొందరగా పాస్ చేసి, కొనుగోలు చేసేలా చూడాలని కోరుతున్నారు. ఉన్నతాధికారులు స్పందించి ఇకనైనా తాలు, తప్ప పేరిట చేస్తోన్న అదనపు దోపిడిని అరికట్టి, తమను ఆదుకోవాలని అన్నదాతలు వేడుకుంటున్నారు.
ఇవీ చూడండి : భళా పోలీస్: ఓ వైపు కఠినత్వం.. మరోవైపు ఔదార్యం
