యానిమేషన్ నేర్చుకుని ఎంటర్టైన్మెంట్ రంగంలో రాణించాలన్నది ఆ యువకుడి కల. సరైన మార్గనిర్దేశకులు లేక ఏ కోర్సు ఎంచుకోవాలో తెలియక చివరికి ఇంజినీరింగ్లో చేరాడు ఫణి. కాని మనసెప్పుడూ నచ్చిన రంగంలో లేననే బాధ వెంటాడుతూ ఉండేది. కాని తాను అనుకున్నది సాధించలేక పోయానని దిగులుపడుతూ కూర్చేలేదు ఆ యువకుడు. తనకు లభించని కెరీర్ గైడెన్స్ను నేటి తరానికి అందించాలని భావించాడు. తన స్నేహితుడు నిఖిల్తో కలిసి యువజ్ఞాని పేరుతో ఓ స్వచ్ఛంద సంస్థను స్థాపించాడు.
ఐఏఎస్ కావాలని కలలుకంటున్న యువతీ యువకులకు తనవంతు సాయం చేయటంతో పాటు.. సివిల్ సర్వెంట్లుగా ఏం సాధించవచ్చో విద్యార్థుల తల్లిదండ్రులకు వివరిస్తున్నాడు. ఇగ్నైట్ ఐఏఎస్ అకాడమీతో కలిసి తెలుగు రాష్ట్రాల్లో టాలెంట్ టెస్ట్లు నిర్వహిస్తూ .. ఉత్తీర్ణులైన వారిని సివిల్స్కు ఎంపిక చేసే బాధ్యత నెత్తిన వేసుకున్నాడు.
ఉచిత శిక్షణ.. ఉపకారవేతనం అందిస్తూ
యువజ్ఞాని సంస్థ గత రెండు నెలలుగా రెండు తెలుగు రాష్ట్రాల్లోని 20కి పైగా ప్రాంతాల్లో టాలెంట్ టెస్ట్లు నిర్వహించారు. అందులో అర్హత సాధించిన వారికి ఇటీవలే హైదరాబాద్లో గ్రాండ్టెస్ట్ నిర్వహించి దానిలో మొదటి మూడు స్థానాల్లో నిలిచిన వారికి ఐదేళ్ల పాటు ఉచిత ఐఏఎస్ శిక్షణ ఇప్పిస్తారు. తర్వాతి పది మందికి ఏటా రూ.50వేలు, ఆతర్వాతి 30 మందికి 30 చొప్పున ఉపకార వేతనం అందించనున్నారు.
చదువుకోవాలనే ఆసక్తి ఉండి.. సరైన మార్గనిర్దేశకులు.. ఆర్థిక స్తోమతలేని తమలాంటి ఎందరో విద్యార్థులకు వెన్నదన్నుగా నిలిచిందంటున్నారు టాలెంట్ టెస్ట్ విజేతలు. తమ భవిష్యత్తు కోసమే తప్ప పక్కవారిగురించి ఆలోచించుకోని నేటి రోజుల్లో సమాజానికి ప్రతిభావంతులైన ఐఏఎస్ అధికారులను అందించడానికి కృషిచేస్తున్నాడు ఫణి. నిండా పాతికేళ్లు నిండని ఇతని పటిష్ఠ సంకల్పం ఎందరికో ఆదర్శం.
ఇదీ చదవండి: బోఫోర్స్ కేసు విచారణపై వెనక్కు తగ్గిన సీబీఐ
