ఎందుకు ఆగింది?..
మెట్రోరైలు తొలిదశలో కారిడార్‌-2ను జేబీఎస్‌ నుంచి ఫలక్‌నుమా వరకు ప్రతిపాదించారు. ప్రభుత్వ, ప్రైవేటు భాగస్వామ్యంతో ఈ ప్రాజెక్టు చేపట్టారు. ఎల్‌ అండ్‌ టీ హైదరాబాద్‌ మెట్రోరైలు సంస్థ తన నిధులతో ఈ పనులు పూర్తిచేయాలనేది ఒప్పందం. పాతబస్తీ మీదుగా మెట్రో వెళితే ప్రార్థనా స్థలాలు తొలగించాల్సి వస్తుందని అలైన్‌మెంట్‌ మార్చాలని ఎంఐఎం అడ్డుకుంది. తెరాస ప్రభుత్వం అధికారంలోకి వచ్చాక ప్రత్యామ్నాయాలు పరిశీలించాలని మెట్రో అధికారులను ఆదేశించింది. సాధ్యాసాధ్యాలను పరిశీలించాక మొదట ప్రతిపాదించిన అలైన్‌మెంట్‌నే మళ్లీ ఖరారు చేశారు. ఆ తర్వాత కూడా అభ్యంతరాలు వచ్చాయి. ఈ వ్యవహారం ఎటూ తేలకపోవడం.. మరోవైపు మిగతా మార్గాల్లో మెట్రో పనులు పూర్తికావడం.. నిర్మాణ వ్యయం పెరగడంతో పాతబస్తీ పనుల నుంచి ఎల్‌ అండ్‌ టీ మెట్రో వైదొలిగింది.
ఏడాది కిందటే నిర్ణయం..
నగరం మొత్తం మెట్రో పరుగులు తీస్తుండటం.. పాతబస్తీ వాసులు తమకెప్పుడు మెట్రో అంటూ అడుగుతుండటంతో ఎంఐఎంతో సహా అన్ని పార్టీలు పనులు పూర్తిచేయాలని కొన్నాళ్లుగా కోరుతున్నాయి. మిగిలిన ఈ పనులను సైతం ఎల్‌ అండ్‌టీనే పూర్తిచేసేలా సర్కారు ఆ సంస్థతో ఏడాది కిందటే సంప్రదింపులు జరిపింది. ఇప్పటికే అంచనాకు మించి ప్రాజెక్టుపై వ్యయం చేశామని.. సర్కారు ఆర్థిక సాయం చేస్తే చేపడతామని ఎల్‌ అండ్‌ టీ మెట్రో వర్గాలు అన్నాయి. ఇతర ప్రాజెక్టుల్లో అవకాశం ఇవ్వడమో.. మరో విధంగా ఆదుకుంటామని పనులు పూర్తిచేయాలని సర్కారు సూచించింది. ఎల్‌ అండ్‌టీ కూడా దాదాపుగా సుముఖత వ్యక్తం చేసింది. లాక్‌డౌన్‌తో పరిస్థితి మళ్లీ మొదటికొచ్చింది. ఈ లోపు సర్కారు ప్రాధాన్యాలు మారిపోయాయి. పాతబస్తీ మెట్రో ఎంజీబీఎస్‌ నుంచి ఫలక్‌నుమా మార్గం వెనక్కి వెళ్లిపోయింది. జేబీఎస్‌ నుంచి ఫలక్‌నుమా వరకు బదులుగా జేబీఎస్‌ నుంచి ఎంజీబీఎస్‌ వరకు మాత్రమే మెట్రో పూర్తిచేశారు. 11 కిలోమీటర్ల మార్గమే కావడంతో రోజువారీగా 10వేల మంది ప్రయాణించడం కూడా గగనంగా మారింది. తీవ్ర నష్టాల్లో నడుపుతున్నామని ఎల్‌ అండ్‌ టీ వర్గాలు అంటున్నాయి.
ఇప్పుడు ఇదొక్కటే మార్గం..
పాతబస్తీ మెట్రో పూర్తిచేయడం అటు సర్కారు, ఇటు ఎల్‌ అండ్‌ టీ మెట్రోకి అత్యవసరం. రెండోదశ పనులకు కేంద్ర సాయం అడుగుదామంటే.. మొదట పాతబస్తీ పనులు పూర్తిచేయాలని అక్కడి పెద్దలు అంటున్నారు. తొలిదశ ప్రాజెక్టుకు కేంద్రం సర్దుబాటు వ్యయం నిధి కింద రూ.1250 కోట్లు మంజూరు చేసింది. పాతబస్తీ పనులు ఆగిపోవడంతో రూ.200 కోట్ల వరకు సర్దుబాటు వ్యయ నిధులు కూడా ఆగిపోయాయి. వీటన్నింటి దృష్ట్యా సర్కారు, ఎల్‌ అండ్‌ టీకి పాతబస్తీ పనులు పూర్తిచేయడం అవశ్యంగా మారింది.
ఎంత వ్యయం..?
పాతబస్తీ 5.5 కి.మీ. మార్గం పూర్తిచేయాలంటే రూ.వెయ్యికోట్లపైనే వ్యయం అవుతుంది. ఇక్కడ 1500 వరకు ఆస్తులను సేకరించాలి. వీటికి మరో రూ.200కోట్లు అవుతాయి. ఎంఎంఐ సైతం పనులు మొదలెట్టాలని డిమాండ్‌ చేస్తున్న నేపథ్యంలో రహదారి విస్తరణ పెద్ద సమస్య కాదు. ఇప్పటికే ఆస్తుల మార్కింగ్‌ కూడా పూర్తైంది. ఫలక్‌నుమాలో మెట్రో డిపోకు స్థలం సైతం కేటాయించి ఉంది. పనులు మొదలు పెడితే రెండేళ్లలో పూర్తిచేయవచ్ఛు
- రూ.వెయ్యికోట్లలో విమానాశ్రయం వరకు మెట్రో విస్తరణకు కొంత కేటాయించినా.. పాతబస్తీ మెట్రో పూర్తికి సింహభాగం కేటాయించడం.. ఎల్‌ అండ్‌ టీ సైతం కొంత భరించేలా ఒప్పించగల్గితే పనులు త్వరగా పూర్తయ్యే అవకాశం ఉంది.
ఇవీచూడండి: 102 ఏళ్ల వయసులో కొవిడ్ వ్యాక్సిన్ తీసుకున్న ఎడ్లపాటి వెంకట్రావు
