GOLD MERCHANTS: 'హాల్​మార్క్​ కొత్త నిబంధనలు ఎందుకో అర్థం కావడం లేదు'

బంగారం హాల్​మార్క్​ యూనిక్​ ఐడీ (హెచ్‌యూఐడీ) నూతన నిబంధనలపై బంగారు వర్తకులు ఆందోళన వ్యక్తం చేశారు. దేశవ్యాప్త జ్యూయలరీ దుకాణాల ఒక్కరోజు బంద్​ పిలుపులో భాగంగా.. దుకాణాలు మూసివేసి ఆందోళన చేపట్టారు. నూతన విధానంతో దుకాణదారులు, వినియోగదారులు ఇద్దరూ ఇబ్బంది పడాల్సి వస్తుందని ఆందోళన వ్యక్తం చేశారు. కొత్త విధానంలో న్యాయపరమైన ఇబ్బందులు ఉన్నాయన్నారు.

బంగారం అభరణాల విక్రయాల్లో హాల్‌మార్క్ యూనిక్​ ఐడీ (హెచ్‌యూఐడీ) అమలును వ్యతిరేకిస్తూ హైదరాబాద్​లోని పలు జ్యూయలరీ అసోసియేషన్స్​ బంద్​ నిర్వహించాయి. దేశవ్యాప్త జ్యూయలరీ దుకాణాల ఒక్కరోజు బంద్​లో భాగంగా.. ఆందోళన చేపట్టాయి. అబిడ్స్​లోని దుకాణాలను మూసేసి నిరసన వ్యక్తం చేశారు.

కేంద్ర ప్రభుత్వం నూతనంగా తీసుకువచ్చిన హాల్​మార్క్​ యూనిక్​ ఐడీ (హెచ్​యూఐడీ) వ్యవస్థ అమలు అసాధ్యమని.. ట్విన్​ సిటీస్​ జ్యూయలరీ అసోసియేన్​ కార్యదర్శి ప్రవీణ్​కుమార్​ తెలిపారు. ఆరు అంకెల హాల్​మార్క్​ యూనిక్​ ఐడీ కోసం అస్సెయింగ్​ అండ్​ హాల్​మార్కింగ్​ సెంటర్​(AHC) వద్ద చాలా సమయం పడుతోందని.. ఫలితంగా నగరు పేరుకుపోతున్నాయని ఆవేదన వ్యక్తం చేశారు. ఈ విధానం వల్ల వినియోగదారులు అయోమయానికి గురవుతున్నారన్నారు. గతంలో ఉన్న విధానాన్నే కొనసాగించాలని డిమాండ్​ చేశారు.

కేంద్రం తీసుకొచ్చిన నూతన విధానాలపై నిజామాబాద్​ నగరంలోనూ బంగారు దుకాణాల మర్చంట్స్​ అసోసియేషన్​ ఆధ్వర్యంలో నిరసన దీక్ష చేపట్టారు. హాల్​మార్క్​ ప్రకారం కొనుగోలుదారుల ప్రయోజనాలను స్వాగతిస్తున్నట్లు చెప్పారు. కానీ హెచ్​యూఐడీ నిబంధనల ప్రకారం.. ప్రతి బంగారు దుకాణ వ్యాపారి తప్పకుండా కంప్యూటర్​ నిర్వహణ, ప్రతి నగకు స్కానింగ్, అప్‌లోడ్‌ చేసుకోవడం, విక్రయాల నమోదు చేయడం తదితర వివరాలను నిక్షిప్తం చేసుకోవడానికి అదనపు సమయం, ఆర్థిక భారం ఉంటుందన్నారు. ఈ నిబంధనలను మాత్రమే తాము వ్యతిరేకిస్తున్నట్లు చెప్పారు.

'హెచ్​యూఐడీతో వినియోగదారులకు లాభమేంటో అర్థంకావడం లేదు. ఆ విషయాన్ని ప్రభుత్వం వివరించాలి. నూతన విధానంతో దుకాణదారులు అవస్థలు పడుతున్నారు. ప్రస్తుత విధానం చక్కగా అమలువుతున్నప్పుడు మళ్లీ హెచ్​యూఐడీ పద్ధతి ఎందుకు. ప్రభుత్వం ఈ నిర్ణయం ఎందుకు తీసుకుందో వివరించాలి.'

- ప్రవీణ్ కుమార్, ట్విన్ సిటీస్ జ్యూయలరీ అసోసియేషన్ కార్యదర్శి

'మాకు హాల్​మార్క్​ పద్ధతితో ఎటువంటి సమస్య లేదు. హెచ్​యూఐడీతోనే అసలు సమస్య వచ్చింది. అందులోని న్యాయపరమైన ఇబ్బందులు ఉన్నాయి. హెచ్​యూఐడీ విధానాన్ని నిలిపివేయాలి.'

- అవినాష్ గుప్త, ఆల్ జేమ్స్ అండ్ జ్యూయలరి డొమెస్టిక్ కౌన్సిల్ డైరెక్టర్

'కేంద్రం నూతనంగా తీసుకువచ్చిన విధానంలో భాగంగా.. చాలా వివరాలు కంప్యూటరీకరణ చేయాల్సి ఉంటుంది. గ్రామీణ ప్రాంతాల్లో ఆ మేరకు సదుపాయాలు ఉండవు. ఇంకా వినియోగదారుల డేటాను సేకరించాల్సి ఉంటుంది. ఆ సమాచారాన్ని.. సంబంధిత పోర్టల్​లో నమోదుచేయాల్సి ఉంటుంది. ఏ బంగారు దుకాణాదారుడు వినియోగదారుని సమాచారం పంచుకోడానికి సిద్ధం లేరు.'

- మహేందర్ తహెల్, హైటెక్ సిటీ జ్యూయలరీ మ్యానిఫ్యాక్చర్స్ అసోసియేషన్ అధ్యక్షుడు

ఇవీచూడండి: