ఎన్నికల ప్రచారంలో తెరాస కార్యనిర్వాహక అధ్యక్షుడు కేటీఆర్ పదేపదే సారు... కారు... సర్కారు అని చెప్పడం వెనుక ఆంతర్యం ఏంటో ఇప్పుడు అర్థమైందని పీసీసీ ప్రచార కమిటీ ఛైర్మన్ విజయశాంతి ఎద్దేవా చేశారు. యాదాద్రిలో చేపడుతున్న ఆధునీకరణ పనుల్లో భాగంగా నిర్మిస్తున్న స్థూపాల్లో దేవతామూర్తులతో పాటు... కేసీఆర్ బొమ్మను.. కారు గుర్తును... చెక్కించుకోవడం ఏంటని ప్రశ్నించారు. తెరాస సర్కార్ గుర్తును చెక్కడం ద్వారా... కేసీఆర్ తనను తాను మహారాజుగా ఊహించుకుంటున్నట్లు అర్థమవుతోందని ఆరోపించారు. రాజులు, రాజ్యాలు కనుమరుగైన తర్వాత కూడా కేసీఆర్ తన దొరతనాన్ని ప్రదర్శించాలనుకోవడం ప్రజాస్వామ్యానికే ముప్పు అని వ్యాఖ్యానించారు. యాదాద్రిని ప్రజలు పవిత్ర క్షేత్రంగా భావిస్తారని... దానిని రాజకీయ ప్రచారానికి వాడుకుంటూ ఆలయ పవిత్రను దెబ్బతీస్తున్నారని ధ్వజమెత్తారు. కేసీఆర్ సర్కార్ వ్యవహరిస్తున్న నియంతృత్వ తీరుపై మఠాధిపతులు... పీఠాధిపతులు స్పందించాల్సిన అవసరం ఉందని అభిప్రాయపడ్డారు.
ఇదీ చూడండి: చంద్రయాన్-2: ఒక లక్ష్యం- వెయ్యి మెదళ్లు
