మాట్లాడడం సులువైంది!
ఇంతకుముందు ఎవరైనా స్నేహితులతో మాట్లాడాలంటే ఫోన్ చేసి మాట్లాడేవాళ్లం. అంతకుముందైతే కేవలం ఉత్తరాలు, లేదా కలుసుకొని మాట్లాడుకోవడమే.. మరి ఇప్పుడో.. సోషల్ మీడియా ద్వారా ఇరవై నాలుగ్గంటలు దగ్గరగానే ఉండచ్చు. ఎప్పుడు కావాలంటే అప్పుడు మాట్లాడుకోవచ్చు. దీంతో ఎప్పుడూ స్నేహితులకు అందుబాటులోనే ఉండే అవకాశం లభించింది.
బృందంగానూ కలుసుకోవచ్చు..!
స్నేహితులంటే కేవలం ఒకరిద్దరు కాదు.. అంతా కలిస్తేనే ఆనందం. అందరూ కలిసి సరదాగా గడిపే రోజుల్ని మిస్సవ్వని వ్యక్తులు ఉండరంటే నమ్మండి. అలాంటి మీటింగులు కూడా టెక్నాలజీ వచ్చిన తర్వాత సులువైంది. వివిధ దేశాల్లో ఉన్న స్నేహితులంతా కలిసి ఏక కాలంలో మాట్లాడే వీలు ప్రస్తుతం టెక్నాలజీ కల్పిస్తోంది. దీని ద్వారా అందరూ వర్చువల్ గానే కలుసుకున్నా.. ఇంతకుముందు తాము కలిసి ఉన్నప్పుడు చేసిన అల్లరికి ఇదేమీ తక్కువ కాదంటే అతిశయోక్తి కాదు..
స్నేహితుల జీవితంలో చోటుచేసుకునే అపురూప ఘట్టాల్లోనూ పాలుపంచుకునే అవకాశం టెక్నాలజీ ద్వారా లభిస్తోంది. జూమ్, గూగుల్ మీట్ లాంటి వేదికల ద్వారా దగ్గర లేకపోయినా నిజంగా కలుసుకున్న భావనను సొంతం చేసుకునే అవకాశం కలుగుతోంది.
జాగ్రత్తలూ అవసరమే!
టెక్నాలజీ ఎంతగా మన బంధాలను పెనవేయడానికి ఉపయోగపడినా.. దాన్ని వినియోగించడంలో జాగ్రత్త వహించడం మంచిది. టెక్నాలజీ వల్ల ఎప్పుడో పరిచయమైన స్నేహితులతోనూ టచ్‌లో ఉండొచ్చు. అయితే మన స్నేహితులెవరైనా బాధలో ఉన్నప్పుడు ఆ వ్యక్తి నేరుగా వచ్చి పరామర్శించడానికి, టెక్నాలజీ ద్వారా పరామర్శించడానికి తేడా ఉంటుంది. అలాగే మనసు పొరల్లో గూడు కట్టుకున్న భావాలను వ్యక్తీకరించడానికి టెక్నాలజీ పూర్తిగా ఉపయోగపడకపోవచ్చు. అందుకే మరీ సాధ్యం కాని పరిస్థితుల్లో ఈ మాధ్యమాలను ఉపయోగించినప్పటికీ, వీలు కుదిరినప్పుడు మాత్రం స్నేహితులను నేరుగా కలవడం, మాట్లాడడం.. వంటివి చేయాలి.
ఇలాంటి వాటికి స్నేహితుల దినోత్సవం వంటి వేడుకలు చక్కటి వేదికలవుతాయి. ఇలాంటి సందర్భాల్లో స్నేహితులంతా ఒకసారి కలుసుకుంటే అది వచ్చే సంవత్సరం లేదా మళ్లీ కలుసుకునే వరకూ మీ బంధానికి వూపిరి పోస్తుంది. అయితే ఇలా వ్యక్తిగతంగా కలిసే సందర్భాలలో కరోనా జాగ్రత్తలు మాత్రం మర్చిపోరు కదూ!
ఇదీ చదవండి: RS PRAVEEN KUMAR: 'లక్షల మంది గుండెల్లో నేనున్నా.. ఏం చేస్తారు?'
