తెలంగాణ గ్రామీణ జీవన ముఖ చిత్రాన్ని మార్చేందుకు ప్రభుత్వం సమగ్ర గ్రామీణ విధానాన్ని అమలు చేస్తోందని రాష్ట్ర ఆర్థిక మంత్రి హరీశ్ రావు అన్నారు. పంచాయతీరాజ్, గ్రామాభివృద్ధికి బడ్జెట్లో రూ.23,005 కోట్లు కేటాయిస్తున్నట్లు తెలిపారు.
విధుల పట్ల నిర్లక్ష్యంగా వ్యవహరించే ప్రజా ప్రతినిధులపై, ఉద్యోగుల పై కఠిన చర్యలు తీసుకోవడానికి నూతన పంచాయతీరాజ్ చట్టం వీలు కల్పించిందని మంత్రి పేర్కొన్నారు. అధికారులు, ప్రతినిధుల్లో జవాబుదారీతనాన్ని పెంచేందుకు చర్యలు తీసుకుందని వెల్లడించారు.
రాష్ట్రంలో పట్టణీకరణ శరవేగంగా పెరుగుతోందని మంత్రి హరీశ్ రావు అన్నారు. పురపాలికల కోసం బడ్జెట్లో రూ.14,809 కోట్లు కేటాయించినట్లు వెల్లడించారు. మున్సిపాలిటీల పనితీరులో పారదర్శకతను పెంపొందించేందుకు ప్రభుత్వం నూతన పురపాలక చట్టాన్ని అమల్లోకి తీసుకువచ్చిందని తెలిపారు.
టీఎస్-ఐపాస్ తరహా సులభ పద్ధతుల్లో భవన నిర్మాణ అనుమతులు ఇచ్చేందుకు టీఎస్-బీపాస్ విధానాన్ని ప్రభుత్వం త్వరలో అమలు చేయనున్నట్లు హరీశ్ రావు పేర్కొన్నారు.
- ఇదీ చూడండి : తెలంగాణ బడ్జెట్.. రూ.1,82,914 కోట్లు
