హైదరాబాద్ మహానగరపాలక సంస్థ ఎన్నికల్లో.. ఓటర్లు విలక్షణ తీర్పునిచ్చారు. ప్రధాన పార్టీలు హోరాహోరీగా తలపడినప్పటికీ..ఏ పార్టీకీ స్పష్టమైన మెజార్టీ కట్టబెట్టలేదు. 2016నాటి జీహెచ్ఎంసీ ఎన్నికల్లో మొత్తం 150 డివిజన్లలో..99 గెల్చుకొని మేయర్ పీఠాన్ని దక్కించుకున్న తెరాస...ఈసారి 55 సీట్లకే పరిమితమైంది. తెరాస ఆధిక్యంలో ఉన్న నేరేడ్‌మెట్‌లో స్వస్తిక్ ముద్రకాకుండా..ఇతర ముద్ర ఉన్న ఓట్లు ఎక్కువగా ఉండడం వల్ల ఫలితాన్ని నిలిపివేశారు. గత ఎన్నికల్లో 4 డివిజన్లు మాత్రమే గెల్చిన భాజపా..ఈసారి తన బలాన్ని భారీగా పెంచుకుంది. ఆ పార్టీ ఏకంగా...48 డివిజన్లలో జయభేరి మోగించింది. ఎంఐఎం గతంలో గెల్చుకున్న 44 డివిజన్ల సంఖ్యను ఈసారి కూడా సాధించుకుంది. కాంగ్రెస్‌ పరిస్థితి ఈ ఐదేళ్లలో ఏమాత్రం మారలేదు. ఈసారి కూడా.. 2 స్థానాలకే పరిమితమైంది. తెలుగుదేశం, వామపక్షాలు కూడా పోటీచేసినప్పటికీ డిపాజిట్లు దక్కించుకోలేకపోయాయి.
మొత్తం 150 డివిజన్లు ఉన్న జీహెచ్ఎంసీలో సాధారణ మెజార్టీ 76 కాగా...మ్యాజిక్‌ మార్కును ఏ పార్టీ అందుకోలేదు. 55 స్థానాలతో తెరాస అతిపెద్ద పార్టీగా అవతరించినప్పటికీ, ప్రస్తుతం ఉన్న ఎక్స్‌అఫిషియో సభ్యుల ఓట్ల మద్దతుతోనూ.... పీఠం దక్కించుకోవడం తెరాసకు కష్టంగానే కనిపిస్తోంది. జీహెచ్ఎంసీ చట్టప్రకారం కార్పొరేషన్ పరిధిలోని... లోక్ సభ, శాసనసభ, మండలి సభ్యులతో పాటు.. ఓటర్లుగా నమోదు చేసుకున్న రాజ్యసభ, ఇతర ఎమ్మెల్సీలు కూడా... ఎక్స్ అఫిషియో సభ్యులుగా ఉంటారు. ప్రస్తుతం ఉన్న సమాచారం ప్రకారం తెరాసకు 31 మంది, మజ్లిస్ కు పది..., భాజపాకు ముగ్గురు ఎక్స్ అఫిషియో సభ్యులుగా ఉన్నారు. కాంగ్రెస్‌కు ఎంపీ రేవంత్‌ రెడ్డి ఉన్నప్పటికీ.... ఆయన బోడుప్పల్‌ మున్సిపాలిటీలో ఓటు వేసినందున... ఇక్కడ అవకాశం ఉండదు.
ప్రస్తుతం 150 మంది కార్పొరేటర్లతోపాటు 45 మంది ఎక్స్‌అఫిషియో సభ్యులున్నారు. ఫలితంగా.... మేయర్, డిప్యూటీ మేయర్ పీఠాలను దక్కించుకోవాలంటే 98 ఓట్లు అవసరం. అయితే... తెరాస గెల్చిన 55 మందితో పాటు ఎక్స్‌అఫిషియో సభ్యులు 31 మందిని కలుపుకుంటే... మొత్తం బలం 86కు చేరుతుంది. కొత్తగా ఎన్నికైన నలుగురు ఎమ్మెల్సీలకు కూడా..జీహెచ్ఎంసీలోనే ఓటు ఇచ్చినా....మరో ఏడెనిమిది మంది ఓట్లు అవసరం అవుతాయి. అయితే..... కొత్త మేయర్, డిప్యూటీ మేయర్ ఎన్నిక సమయంలో ఎక్స్‌అఫిషియో సభ్యుల నమోదుకు....మళ్లీ అవకాశం ఇస్తారు. ఇతర పురపాలక..., నగరపాలక సంస్థల సంస్థల్లో ఓటు వేయకుండా, జీహెచ్ఎంసీ పరిధిలో ఓటుహక్కు కలిగిన....ఎంపీలు, ఎమ్మెల్యేలు, ఎమ్మెల్యేలు ఇక్కడ నమోదు చేసుకుంటే వారు కూడా ఓటు వేయడానికి అర్హులు అవుతారు. ఈ పరిస్థితుల్లో.... తెరాస వ్యూహం ఎలా ఉండబోతోందనేది ఆసక్తిగా మారింది. గ్రేటర్లో 44 సీట్లు గెల్చిన మజ్లిస్ తెరాసకు మద్దతు తెలిపితే తెరాసకు ఎక్స్‌అఫిషియో సభ్యుల అవసరం ఉండదు.
ప్రస్తుత పాలకమండలి పదవీకాలం వచ్చే ఫిబ్రవరి పదో తేదీతో ముగియనుంది. ఆ తర్వాతే..కొత్త పాలకమండలి కొలువుతీరాలి. ప్రస్తుత నిబంధనల ప్రకారం కొత్త కార్పొరేటర్ల ప్రమాణ స్వీకారం, మేయర్, డిప్యూటీ మేయర్ ఎన్నిక..అప్పుడే జరగాలి. మేయర్ ఎన్నిక నాడు హాజరయ్యే సభ్యుల్లో మెజారిటీ ఉన్న పార్టీ అభ్యర్థిని... మేయర్‌గా ఎన్నుకుంటారు. తర్వాత డిప్యూటీ మేయర్ ఎన్నిక కూడా అలాగే జరుగుతుంది. తెరాసకు.. మజ్లిస్ నేరుగా మద్దతు ఇవ్వకుండా ఓటింగ్‌కు గైర్హాజరు అయితే... మేయర్ పదవి తెరాసకు సులభంగా లభిస్తుంది. ఈ అంశంపైనా చర్చ సాగుతోంది.
ఇవీచూడండి: 55 స్థానాల్లో గులాబీ అభ్యర్థుల జయకేతనం
