తెరాస, భాజపాలకు ఎమ్మెల్సీ ఎన్నికల్లో తగిన బుద్ధి చెప్పాలని పీసీసీ చీఫ్ ఉత్తమ్ కుమార్ రెడ్డి పట్టభద్రులకు సూచించారు. హైదరాబాద్లోని గాంధీ భవన్లో టీపీసీసీ అనుబంధ సంఘాలతో ఆయన సమావేశమయ్యారు. కేంద్ర, రాష్ట్ర ప్రభుత్వాలపై తీవ్రస్థాయిలో విమర్శలు గుప్పించారు. శాండ్, లాండ్, మైన్స్, వైన్స్ వ్యాపారాలే తెరాస నాయకులు లక్ష్యమని విమర్శించారు. ప్రజాసంక్షేమం గాలికొదిలేశారని అన్నారు.
రాష్ట్రంలో తెరాస పతనం మొదలైందని ఉత్తమ్ కుమార్ రెడ్డి అన్నారు. రాబోయేది కాంగ్రెస్ ప్రభుత్వమేనని ఆయన జోస్యం చెప్పారు. క్షేత్రస్థాయిలో కాంగ్రెస్ బలంగా ఉందని.. టీపీసీసీ అనుబంధ సంఘాల వ్యవస్థ పటిష్టంగా ఉందన్నారు. కొంతమంది స్వార్థపరులు మాత్రమే పార్టీని వీడుతున్నారని.. ఇది చాలా దుర్మార్గమైన చర్యగా అభిప్రాయపడ్డారు.
భాజపాతో రాష్ట్రానికి ఒరిగిందేమీ లేదు: ఉత్తమ్ కుమార్ రెడ్డి
కేంద్రంలో మోదీ ప్రభుత్వం అధికారంలోకి వచ్చి ఏడేళ్లయినా దేశానికీ, రాష్ట్రానికి ఏం చేశారని ఉత్తమ్ కుమార్ రెడ్డి ప్రశ్నించారు. భాజపా వల్లే తెలంగాణకు తీవ్ర నష్టం జరిగిందని ఆరోపించారు. యూపీఏ హయాంలో ఇచ్చిన ఐటీఐఆర్ను అమలు చేయలేకపోయాయని విమర్శించారు. దీని వల్ల లక్షల మందికి రావాల్సిన ఉద్యోగాలు పోయాయని ధ్వజమెత్తారు. పెట్రోల్, డీజిల్, గ్యాస్ ధరలను నియంత్రించడంలో కేంద్రం విఫలమైందని ఆరోపించారు. ఈ కార్యక్రమంలో ఎన్ఎస్యూఐ అధ్యక్షులు బలమూరి వెంకట్, యువజన కాంగ్రెస్ అధ్యక్షుడు శివసేనా రెడ్డి, ఎస్సీ విభాగం అధ్యక్షుడు ప్రీతమ్, మైనారిటీ అధ్యక్షుడు అబ్దుల్ సోహైల్, ఎన్నారై విభాగం ఛైర్మన్ వినోద్, ఎస్టీ విభాగం ఛైర్మన్ జగన్ లాల్ నాయక్, ఫిషర్మెన్ ఛైర్మన్ మెట్టుసాయి కుమార్ పాల్గొన్నారు.
