సీఎం కేసీఆర్ ఆదేశాల మేరకు రాష్ట్రంలోని పలు డెయిరీల్లో సభ్యులుగా ఉన్న లబ్దిదారులుకు... త్వరలోనే పాడి గేదెలను పంపిణీ చేయనున్నట్లు పశుసంవర్ధక శాఖమంత్రి తలసాని శ్రీనివాస్ యాదవ్ తెలిపారు. హైదరాబాద్ మసాబ్ ట్యాంక్ పశు సంక్షేమ భవన్‌లో జరిగిన విజయ డెయిరీ బోర్డ్ సమావేశానికి మంత్రి ముఖ్య అతిధిగా హాజరయ్యారు.
కరోనా మహమ్మారి ఆరంభంలో లాక్‌డౌన్ ఆంక్షలు, ఇతర కారణాలతో పాడి గేదెల పంపిణీ తాత్కాలికంగా నిలిచిపోయిన దృష్ట్యా... మళ్లీ ప్రారంభించేందుకు తీసుకోవాల్సిన చర్యలపై చర్చించారు. పాడిగేదెలు కొనుగోలు సమయంలో బీమా సౌకర్యం కల్పించిన విషయాన్ని ప్రస్తావించారు. ఇప్పటి వరకూ పంపిణీ చేసిన పాడి గేదెల్లో 2,691 చనిపోయాయని... వాటికి సంబంధించి క్లెయిమ్ కింద పాడి గేదెలు కొనుగోలు చేసి... పంపిణీ చేసే ప్రక్రియ వెంటనే చేపట్టాలని మంత్రి ఆదేశించారు.
లీటర్ పాలపై రూ. 4 ప్రోత్సాహకం అందిస్తుండగా ఇక నుంచి ప్రభుత్వం రూ. 3, ఆయా డెయిరీలు రూ. 1 చొప్పున కలిపి రైతులకు చెల్లించడం జరుగుతుందని తలసాని తెలిపారు. కరీంనగర్, మదర్, ముల్కనూర్ డెయిరీలలో పాలు పోసే రైతులకు చెల్లించాల్సిన ప్రోత్సాహకం బకాయిల్లో రూ. 8 కోట్లు విడుదల చేస్తున్నట్లు మంత్రి పేర్కొన్నారు. ఈ కార్యక్రమంలో విజయ డెయిరీ ఛైర్మన్ లోక భూమారెడ్డి, పశుసంవర్ధక శాఖ కార్యదర్శి అనిత రాజేంద్ర, డెయిరీ ఎండీ శ్రీనివాసరావు, పశుసంవర్ధక శాఖ డైరెక్టర్ లక్ష్మారెడ్డి, పాల్గొన్నారు.
ఇదీ చదవండి: ప్రతిభను నమ్మారు.. కోటీశ్వరులయ్యారు
