కరోనాతో మరణించిన వారి అంత్యక్రియలపై ప్రభుత్వం ప్రత్యేక దృష్టి

కరోనాతో మరణించిన వారి అంత్యక్రియల నిర్వహణపై ప్రభుత్వం ప్రత్యేక దృష్టిపెట్టింది. సర్కారు మార్గదర్శకాల అమలును ప్రత్యేక బృందం పర్యవేక్షిస్తోంది. కరోనా బాధితుల మృతదేహాన్ని ప్రత్యేకంగా తయారు చేసిన కవర్‌లో చుట్టి శ్మశానవాటికలో అంత్యక్రియలు ముగిసే వరకు శిక్షణ పొందిన సిబ్బంది దగ్గరుండి చూసుకుంటున్నారు. కుటుంబసభ్యులను దూరం నుంచి కేవలం కడచూపు చూసుకునే అవకాశం కల్పిస్తున్నారు.

కరోనా నిర్ధరణ తర్వాత ఆస్పత్రుల్లో చికిత్స పొందుతూ కొందరు ప్రాణాలు కోల్పోతుండగా.. మరికొందరికి చనిపోయాక వైరస్‌ సోకినట్లు గుర్తిస్తున్నారు. ఈ నేపథ్యంలో మృతదేహాల నుంచి వైరస్‌ సోకే ప్రమాదం ఉండటం వల్ల వాటి ఖననాన్ని ప్రత్యేకంగా నిర్వహిస్తున్నారు. 8 మందితో కూడిన కమిటీ.. కేంద్ర మార్గదర్శకాలకు అనుగుణంగా రాష్ట్ర ప్రభుత్వం రూపొందించిన విధివిధానాల అమలును పర్యవేక్షిస్తోంది. కేవలం ఐదుగురిని మాత్రమే చివరి చూపు చూసేందుకు అనుమతి ఇస్తున్నారు.

4 డిగ్రీల సెంటిగ్రేడ్​ ఉష్ణోగ్రతతో..

అంత్యక్రియలకు సంబంధించి కుటుంబసభ్యులకు అధికారులు ముందే కౌన్సెలింగ్ ఇస్తున్నారు. మృతదేహంపై వైరస్‌ నిరోధక ద్రావణం పిచికారీ చేసి.. ప్రత్యేక బ్యాగ్‌లో ఉంచి సీల్ వేస్తున్నారు. 4 డిగ్రీల సెంటిగ్రేడ్ ఉష్ణోగ్రతతో మృతదేహాన్ని శ్మశానవాటికకు తరలిస్తున్నారు. కడసారి చూసేందుకు.. 4 మీటర్ల దూరంలో గీత గీసి.. అక్కడి నుంచి చూసే వీలు కల్పిస్తున్నారు. మతపరమైన ఆచారాలను 4 మీటర్ల దూరం నుంచే చేయాలని కుటుంబసభ్యులకు చెబుతున్నారు. 8 అడుగుల లోతు తవ్విన గుంతలో మృతదేహాన్ని పూడ్చేస్తున్నారు. అనంతరం శ్మశానవాటికలో రెండుసార్లు క్రిమిసంహారక మందు పిచికారీ చేస్తున్నారు.

జాగ్రత్తలు తీసుకోవాలి

అంత్యక్రియల్లో పాల్గొన్న వాళ్లు ఆరోగ్య జాగ్రత్తలు తీసుకోవాలని అధికారులు సూచిస్తున్నారు. అనారోగ్య సమస్యలేమైనా తలెత్తితే వైద్యులను సంప్రదించాలని చెబుతున్నారు. కరోనా సోకి చనిపోయిన వాళ్లను చూసేందుకు రావాలంటే బంధువుల సైతం వెనుకంజ వేస్తున్నారని.. కేవలం ముగ్గురు, నలుగురు కుటుంబసభ్యులు మాత్రమే వస్తున్నారని అంటున్నారు.

ఇదీ చూడండి: సడలింపులపై రాష్ట్ర ప్రభుత్వం విముఖత