సముద్ర తీరం కలిగిన రాష్ట్రాలు సముద్రం నుంచి ఎదురయ్యే సవాళ్లను ఎదుర్కొనేందుకు సిద్ధంగా ఉండాలని కేంద్ర ప్రభుత్వం ఆదేశించింది. ఇందుకు సంబంధించి అన్ని సముద్ర తీర ప్రాంత రాష్ట్రాల ఉన్నతాధికారులతో వీడియో కాన్ఫరెన్సు ద్వారా కేంద్ర హోం శాఖ సమీక్ష నిర్వహించింది. నిరంతరం అప్రమత్తంగా ఉండాలని స్పష్టం చేసింది. తీరప్రాంత భద్రత, సముద్రం వైపు నుంచి ఎదురయ్యే ఉగ్ర సవాళ్ల అంశంపై జాతీయ స్థాయిలో ఏర్పాటు అయిన కమిటీ ప్రస్తుత పరిస్థితిని సమీక్షిచింది. కేంద్ర కేబినెట్ కార్యదర్శి రాజీవ్ గౌబ వీడియో కాన్ఫరెన్సు ద్వారా ఏపీ ప్రభుత్వ ప్రధాన కార్యదర్శి ఎల్వీ సుబ్రహ్మణ్యం, డీజీపీ గౌతమ్ సవాంగ్ తదితరులతో మాట్లాడారు. సముద్రంలో చేపల వేట సాగించే వివిధ మోటరైజ్డ్ బోట్లు, ఇతర రకాల బోట్ల నియంత్రణను సంబంధిత శాఖలు పటిష్ఠ నిఘాతో పర్యవేక్షించాలని కేంద్రం ఆదేశించింది.
మెకనైజ్డ్ బోట్ల ద్వారా చేపలవేట సాగించే మత్స్యకారులందరికీ బయోమెట్రిక్ గుర్తింపు కార్డులు జారీ చేయాలని స్పష్టం చేసింది. తీరప్రాంత భద్రతా దళం, నౌకాదళం, రాష్ట్ర మెరైన్ పోలీస్, స్థానిక ప్రభుత్వ యంత్రాంగాలు సముద్ర తీర భద్రత విషయంలో పూర్తి సమన్వయంతో పనిచేయాలని సూచించింది. తీరప్రాంత రాష్ట్రాలన్నీ మారిటైమ్ బోర్డులను ఏర్పాటు చేసి నిరంతరం సముద్రం నుంచి ఎదురయ్యే సవాళ్లను ఎదుర్కొనేందుకు సిద్ధంగా ఉండాలని కేంద్ర కేబినెట్ కార్యదర్శి స్పష్టం చేశారు. సముద్రంలో చేపలవేట సాగించే బోటులకు ఉపగ్రహ ఆధారిత ట్రాన్స్ పాండర్లను ఏర్పాటు చేసేలా చర్యలు చేపట్టాలన్నారు.
దీనిపై స్పందిచిన ఏపీ ప్రభుత్వ ప్రధాన కార్యదర్శి ఎల్వీ సుబ్రహ్మణ్యం ఆంధ్రప్రదేశ్లో ఇప్పటికే మారిటైమ్ బోర్డును ఏర్పాటు చేసినట్టు వివరించారు. ఈ బోర్డును మరింత సమర్థంగా నిర్వహించేందుకు వీలుగా భద్రతా దళాలకు చెందిన కొంత మందిని సభ్యులుగా తీసుకోవాల్సి ఉందని తెలిపారు. తీర ప్రాంత రక్షణలో భాగంగా రాష్ట్రానికి మొదటి విడతగా 18 ఇంటర్ సెప్టార్ బోట్లను కేటాయించారని వాటికి వార్షిక మరమ్మతులు అవసరం ఉందని తెలిపారు.
ఇదీ చదవండిః వినోద్ ట్వీట్కు... కేటీఆర్ ఏం చేశాడంటే!
