Meat Adulteration: మాంసంతో రకరకాల వంటకాలు చేసి ఆరగించేస్తున్నారు.. సరే..! అది ఎంత స్వచ్ఛమో గమనించండి అంటూ హెచ్చరిస్తున్నారు...వైద్యులు. ఎప్పటికప్పుడు తనిఖీలు చేస్తున్నాం.. కల్తీని గుర్తించి దుకాణాలు సీజ్ చేస్తున్నామంటున్నారు...అధికారులు. ఈ 2 వాదనలూ ఎన్నో ఏళ్లుగా వినిపిస్తూనే ఉన్నాయి. ప్రజలకు మాత్రం స్వచ్ఛమైన మాంసం లభించటం లేదు. నిలదీయాల్సిన యంత్రాంగం నీళ్లు నములుతోంది. ప్రజలూ ప్రశ్నించే ఓపిక లేక వదిలేస్తున్నారు. అందుకే... కల్తీ మాంస విక్రయాలు జోరుగా కొనసాగుతున్నాయి.
రోగాలు తెచ్చి పెడుతున్న మాంసాహారం
meat adulteration in India: దేశంలో మాంసం వినియోగం పెరుగుతోంది. ప్రపంచవ్యాప్తంగా ఇదే ధోరణి కనిపిస్తోంది. భారత్‌లో.. ప్రత్యేకించి తెలుగు రాష్ట్రాల్లో మాంసం విక్రయాలపై పర్యవేక్షణ లోపిస్తోంది. ఎక్కడ చూసినా వ్యాపార ధోరణితో ప్రజారోగ్యం గాలికొదిలేస్తున్నారు. కల్తీలు, నాణ్యత లేని మాంసం, కుళ్లిన సరకు వినియోగదారులకు అంటగడుతున్నారు. అనారోగ్యాలపాలు చేస్తున్నారు. కొవిడ్-19 నేపథ్యంలో పౌష్టికాహారం పట్ల శ్రద్ధ పెరిగింది. మాంసంతోపాటు చికెన్, కోడి గుడ్లకు డిమాండ్ పెరిగి పోయింది. హైదరాబాద్, అమరావతి సహా అన్ని జిల్లాల్లో ప్రధాననగరాలు, పట్టణాల్లో నిబంధనలకి విరుద్ధంగా విక్రయాలు కొనసాగుతున్నాయి. పశుసంవర్థక శాఖ, నగరపాలక సంస్థలు, పురపాకల సంఘాల కనుసన్నల్లో కొనసాగాల్సిన మాంసం విక్రయాలను పట్టించుకునే దిక్కే కరవైంది.
యథేచ్ఛగా కొనసాగుతున్న నకిలీ దందా
meat adulteration scandals: మున్సిపాలిటీల్లో ప్రత్యేకంగా మాంసం మార్కెట్లు ఉండాలన్న నిబంధన అమలుకు నోచు కోవడం లేదు. వ్యాపారులు ఇష్టారాజ్యంగా గొర్రెలు, మేకలు, పశువులను వధిస్తున్నారు. పట్టణాల్లో మాంసం విక్రయాలకు ఓ పద్ధతి లేకపోవడం వల్ల ఎవరికి వారుగా దుకాణాలు తెరిచి మాంసం విక్రయిస్తున్నారు. వీధుల్లో నిబంధనలకు విరుద్ధంగా అమ్మకాలు సాగిస్తున్నారు. పలువురు వ్యాపారులు అత్యాశకు పోయి నాసిరకం, కల్తీ మాంసం విక్రయిస్తున్నారు. అనారోగ్యానికి గురైన గొర్రెలు, మేకలు, చనిపోయిన జీవాలను నిబంధనలకు విరుద్ధంగా అమ్ముతున్నారు. కల్తీ చేస్తున్నారు. అశుభ్ర వాతావరణంలో జంతువధ చేయడమేగాక, వేర్వేరు ప్రాంతాల నుంచి మృత, అనారోగ్యకర జంతువులను తీసుకొచ్చి, మార్కెట్లో అడ్డగోలుగా విక్రయిస్తుండం ఆందోళనకు తావిస్తోంది. పశువైద్య విభాగం అధికారులు దాడులు చేస్తున్నా పరిస్థితిలో ఏ మాత్రం మార్పు రావడం లేదు.
కుళ్లిన మాంసం అంటగడుతున్న వ్యాపారులు
meat adulteration mutton: మాంసం విక్రయాలను జాతీయ మాంసం నాణ్యత ప్రమాణాల సంస్థ నిపుణులు పరిశీలించి పరిస్థితులు దారుణంగా ఉన్నాయని తమ నివేదికల్లో పేర్కొంది. కోటిపై జనాభా ఉన్న హైదరాబాద్ సహా వరంగల్‌, కరీంనగర్, ఖమ్మం, విజయవాడ, గుంటూరు, నెల్లూరు, కర్నూలు తదితర నగరాల్లో మాంసం మార్కెట్లపై పర్యవేక్షణ, నియంత్రణ లేకపోవడం వల్ల వ్యాపారులు ఇష్టారాజ్యంగా వ్యవహరిస్తున్నట్లు అధికారులు తేల్చారు. చనిపోయిన మేకలు, గొర్రెలను సైతం ఇళ్ల వద్దనే ప్రాసెస్‌ చేసి విక్రయిస్తున్నట్లు ఆరోపణలు ఉన్నాయి. అమ్ముడుపోగా మిగిలిన మాంసం నిల్వచేసి విక్రయిస్తున్నారు. నిల్వచేసిన మాంసంలో బ్యాక్టీరియా వృద్ధి చెంది, మాంసం కండరాలు కుళ్లిపోయి ఆహారం కలుషితమవుతోంది.
పశువైద్య విభాగం అధికారులు దాడులు చేస్తున్నా..
పశువైద్యుడి సమక్షంలో ఆరోగ్యకర మేకలు, గొర్రెలు, ఆవులను వధించాల్సి ఉండగా అలా జరగడం లేదు. కోసిన ప్రతి భాగం వైద్యుడు పరిశీలించి తినకూడని భాగాలు తొలగించాలి. ఈ ప్రక్రియ ఎక్కడా అమలుకు నోచుకోవటం లేదు. ప్రతి వినియోగదారుడు దుకాణం వెళ్లి మాంసం కొనుగోలు చేసిన తర్వాత తప్పనిసరిగా యజమాని నుంచి బిల్లు తీసుకోవాలి. సూపర్‌ మార్కెట్లలో మాంసం లేదా చేపలు కొనుగోలు చేస్తే సంస్థ బిల్లు ఇస్తుంది. అదే తరహాలో దుకాణదారులు బిల్లు ఇవ్వకపోతే పశుసంవర్థక శాఖ, వెటర్నరీ విభాగాలకు ఫిర్యాదు చేయాలి. కొద్దిరోజుల క్రితం.. నెల్లూరులో పాలను కల్తీ చేసి మనుషుల ప్రాణాలతో చెలగాటం ఆడుతున్న వ్యక్తిని ఎన్‌ఫోర్స్‌మెంట్ అండ్ విజిలెన్స్ అధికారులు అరెస్టు చేశారు. కొద్ది రోజులకే విజయవాడలో అలాంటి మరో ఘటన వెలుగు చూసింది. చెడిపోయిన మాంసం విక్రయించి ప్రజారోగ్యంతో ఆటలాడుతున్న ముఠాను అధికారులు గుర్తించారు.
ప్రాణాంతక క్యాన్సర్ వ్యాధిన బారిన పడే ముప్పు
100 డిగ్రీల సెంటీగ్రేడ్ వరకు మాంసం ఉడికించి వండుతాం కాబట్టి... ఏమైనా బ్యాక్టీరియా ఉంటే చనిపోతుంది. వ్యాధుల సంక్రమణకు అవకాశాలు తక్కువగా ఉంటాయి. అయితే... ఉరుకుల పరుగుల జీవితంలో అధికశాతం వినియోగదారులు నిల్వ చేసుకుని వండుకుని తినడం అలవాటు అయింది. దుకాణాల్లోనూ మిగిలిన మాంసం నిల్వ చేసి మరునాడు విక్రయిస్తున్నారు. హోటల్లో ఇవాళ వండిన మాంసం మిగిలిపోతే...రాత్రి దాచిపెట్టి మరునాడు మళ్లీ వేడి చేసి వడ్డించడం కూడా పరిపాటైపోయింది. రిఫ్రిజిరేటర్‌లో నిల్వ చేసినప్పుడు బయటకు తీసి మళ్లీ సాధారణ స్థితిలోకి రాక ముందే...అలాగే కూరలు చేస్తున్నారు. రుచి కోసం ఫ్రై, డీప్‌ ఫ్రై చేస్తున్నారు. ఇలా చేయటం వల్ల ఆ మాంసం.. కార్సోజెనిక్ కారకంగా మారుతుంది. ప్రాణాంతక క్యాన్సర్ వ్యాధిన బారిన పడే ముప్పు ఎక్కువవుతోంది.
చనిపోయిన జీవాలను అమ్ముతున్న పలువురు
దేశవ్యాప్తంగా జరిగిన ఒక సర్వే ప్రకారం, భారత్‌లో మూడింట 2వంతుల మంది కనీసం ఏదోక రకమైన మాంసం తింటున్నారు. ఏటా ఒక వ్యక్తి మాంసం వినియోగం సగటున 4 కిలోలు. అంటే... ఈ మాంసమంతా కల్తీ అయితే.. అది ఏ మేర ప్రజలపై ప్రభావం చూపుతుందో అర్థం చేసుకోవచ్చు. హైదరాబాద్ విషయమే చూస్తే...మాంసం వ్యాపారంలో జియాగూడ కబేళా నుంచి వెళ్లే జీవాలు 80% ఉంటాయి. ఈ కబేళా కేంద్రంగా భారీ వ్యాపారం జరుగుతుంది. కశ్మీర్‌ నుంచి మొదలుపెడితే.. అనేక రాష్ట్రాల నుంచి జియాగూడ కబేళాకు జీవాలు వస్తాయి. అందులో అనారోగ్యమున్న జీవాలు, చనిపోయిన మేకలు, గొర్రెలు ఉంటాయని, వాటినీ వ్యాపారులు మార్కెట్‌కు తరలిస్తున్నారని ఫిర్యాదులున్నాయి. మాంసం దుకాణాలపై జరుపుతున్న తనిఖీల ఆధారంగా చూస్తే.. ఖైరతాబాద్‌ జోన్‌లో ఎక్కువగా కల్తీ మాంసం లభిస్తోందని, సికింద్రాబాద్‌, కూకట్‌పల్లి జోన్లలోనూ సంబంధిత దుకాణాలను గుర్తిస్తున్నామని అధికారులు చెబుతున్నారు.
ప్రాణాలతో చెలగాటమాడే వారిపై కొరవడిన నిఘా
వెటర్నరీ విభాగం అధికారులు ఆమోద ముద్ర వేసిన జంతు కళేబరాల నుంచే మాంసాన్ని కొనుగోలు చేయాలని సూచిస్తున్నా...వినియోగదారులు పట్టించుకోవటం లేదన్నది మరో వాదన. లెక్కకైతే...అధికారిక కబేళాల్లో వధించిన మేక, గొర్రె పొట్టేలు, గొడ్డు మాంసాన్ని మాత్రమే ఉపయోగించాలి. కానీ...అంత తీరిక, ఓపిక ప్రజలకు ఉండటం లేదు. రుచి కోసం ఆరోగ్యాన్ని పణంగా పెడుతున్నారు. నిజానికి...ప్రతీ మాంస విక్రయ దుకాణంలో సీసీ కెమెరా ఏర్పాటు చేయాలి. బిల్లింగ్ మిషన్ కూడా ఏర్పాటుకు ప్రభుత్వమే సరఫరా చేయాలి. ఆన్‌లైన్ బిల్లింగ్ వ్యవస్థ ఏర్పాటు చేసుకోవడం వల్ల ఎన్ని గొర్రెలు, మేకల్ని వధించారు..? ఎన్ని కిలోల మాంసం విక్రయించారు అన్న లెక్కలు తేలతాయి.
మాంసం విక్రయాలపై లోపించిన పర్యవేక్షణ
adulteration of food: హైదరాబాద్‌లో 40 వేలు పైగా మాంసం దుకాణాలు ఉన్నాయి. రోజూ ఒక్కో దుకాణంలో 100 కిలోలు మాంసం అమ్మినా 4 లక్షల కిలోల విక్రయం సాగుతుంది. నిత్యం అత్యంత రద్దీగా ఉండే పంజాగుట్టలో ఒక్కమాంసం దుకాణంలోనే 2వేల కిలోలు పైగా అమ్ముతారంటే ఆశ్చర్యం కలగకమానదు. ఈ రకంగా 40 లక్షల రూపాయలు పైగా ఆదాయం సమకూరుతుంది. ఆదివారం చెప్పనక్కరలేదు. ఆ సొమ్ము పశుసంవర్థక శాఖకు కేటాయించి ఫిక్స్‌డ్ సెక్యూరిటీ కింద జమ చేయ వచ్చు. పరిశుభ్రమైన ఆరోగ్యకర పద్ధతుల కోసం మాంసం దుకాణాలు ఆధునీకరణకు వెచ్చించ వచ్చు. లేదా కార్పస్ ఫండ్ కింద పెట్టి సీసీ కెమెరాల ఏర్పాటు సహా ఇతర కార్యక్రమాలకు కూడా వినియోగించవచ్చు. అలాగే, మాంసం దుకాణాల్లో పనిచేస్తున్న వర్కర్లకు అంటు వ్యాధులు సోకకుండా టీకా ఇచ్చేందుకూ వాడుకోవచ్చు. ఇలా నిపుణులు పలు సూచనలు చేస్తున్నా.. పట్టించుకునే వారేరి..?
ఇప్పుడిప్పుడే దేశవ్యాప్తంగా ఈ సమస్యపై కాస్త చలనం కనిపిస్తోంది. భారత వ్యవసాయ పరిశోధన మండలి, జాతీయ మాంసం పరిశోధన సంస్థలు పరిష్కార మార్గం అన్వేషించే పనిలో నిమగ్నమయ్యాయి. ఆరోగ్య పద్ధతుల్లో పశు వధ, మాంసం ఉత్పత్తి, ఆహారోత్పత్తులు, మార్కెటింగ్, పరిశ్రమల స్థాపనపై పరిశోధనలు సాగుతున్నాయి. ఈ వ్యాపార రంగంలోకి ప్రవేశించే ఔత్సాహికపారిశ్రామికవేత్తలకు శిక్షణ ఇస్తూ బ్యాంకుల నుంచి రుణ సదుపాయాలు కల్పిస్తున్నారు. ఈ చర్యల వరకు బాగానే ఉన్నా...ఇవి ఏ మాత్రం...ప్రజలకు కల్తీలేని మాంసం అందించటంలో సఫలమవుతాయో తేలాల్సి ఉంది.
ఇదీ చదవండి: Cyber Crime Today : సైబర్ కేటుగాళ్ల నయా పంథా.. అద్దె ఇళ్ల నుంచే మోసాలు
