కరోనా పరిస్థితుల్లో ఫీజులకు సంబంధించిన ప్రభుత్వ ఉత్తర్వులను హైదరాబాద్లోని పది ప్రైవేట్ పాఠశాలలు ఉల్లంఘించాయని పాఠశాల విద్యా శాఖ హైకోర్టుకు నివేదించింది. రాష్ట్ర ప్రభుత్వ ఉత్తర్వులను ఉల్లంఘించిన పాఠశాలలపై చర్యలు తీసుకోవాలని సీబీఎస్ఈ, ఐసీఎస్ఈ బోర్డులకు నివేదిక ఇస్తామని పేర్కొంది. ప్రైవేట్ పాఠశాలల్లో ఆన్లైన్ తరగతులు, అధిక ఫీజులపై హైదరాబాద్ స్కూల్ పేరెంట్స్ అసోసియేషన్ దాఖలు చేసిన ప్రజా ప్రయోజన వ్యాజ్యంపై ప్రధాన న్యాయమూర్తి జస్టిస్ ఆర్ఎస్ చౌహాన్, జస్టిస్ బి.విజయ్ సేన్ రెడ్డి ధర్మాసనం ఇవాళ మరోసారి విచారణ చేపట్టింది.
హైదరాబాద్లోని 11 కార్పొరేట్ పాఠశాలలపై అందిన ఫిర్యాదులపై చేసిన విచారణ నివేదికను పాఠశాల విద్యా శాఖ సంచాలకురాలు శ్రీదేవసేన హైకోర్టుకు నివేదిక సమర్పించారు. మణికొండలోని మౌంట్ లిటెరా జీ, బంజారాహిల్స్ మెరిడియన్, హిమాయత్నగర్ ఆక్స్ ఫర్డ్ గ్రామర్, అమీర్పేట నీరజ్ పబ్లిక్ స్కూల్, జూబ్లీహిల్స్ పబ్లిక్ స్కూల్, గీతాంజలి, ఆబిడ్స్ లిటిల్ ఫ్లవర్, కల్ప, బోయిన్ పల్లి, మారేడ్పల్లిలోని సెయింట్ ఆండ్రూస్ పాఠశాలలు జీవోకు విరుద్ధంగా ఫీజులు వసూలు చేసినట్లు విచారణలో తేలినట్లు శ్రీదేవసేన వివరించారు.
డీడీ కాలనీలోని నారాయణ హైస్కూల్పై విచారణ కొనసాగుతోందని తెలిపారు. జీవో 46 అమలుకు కట్టుబడి ఉన్నట్లు పాఠశాల విద్యా శాఖ తెలిపింది. వాదనలు వినిపించేందుకు సీబీఎస్ఈ తరఫు న్యాయవాది గడువు కోరటంతో న్యాయస్థానం విచారణను ఈనెల 25కి వాయిదా వేసింది.
ఇదీ చదవండి: భార్య గొంతు కోసి కాలువలో పడేసి...
