Telangana BJP professionals and intellectuals Meet : 'బీజేపీ.. సిద్ధాంతాల పార్టీ.. బీఆర్​ఎస్​కు ఏం విధానం ఉంది?'

Telangana BJP professionals and intellectuals Meet : బీజేపీ సిద్ధాంతాలు ఆధారంగా నడిచే పార్టీ అని.. బీఆర్​ఎస్​కు ఏ విధానం ఉందని కేంద్ర హోంమంత్రి అమిత్​ షా ప్రశ్నించారు. సికింద్రాబాద్​లోని ఇంపీరియల్​ గార్డెన్​లో జరిగిన తెలంగాణ బీజేపీ మేధావుల సమావేశంలో ఆయన పాల్గొని.. ఎన్నికల్లో అనుసరించాల్సిన వ్యూహాలపై చర్చించారు.

Telangana BJP professionals and intellectuals Meet : బీఆర్​ఎస్​ కుటుంబ పార్టీ.. ఇలాంటి పార్టీలు ప్రజాస్వామ్యబద్ధంగా ఉండవని కేంద్రమంత్రి అమిత్​షా(Amit Shah) చెప్పారు. బీజేపీ సిద్ధాంతాల ఆధారంగా నడిచే పార్టీ అనీ.. బీఆర్​ఎస్(BRS)​కు ఏం విధానం ఉందని ఆయన ప్రశ్నించారు. సికింద్రాబాద్​లోని ఇంపీరియల్​ గార్డెన్​లో జరిగిన తెలంగాణ బీజేపీ మేధావుల సమావేశం(Telangana BJP Intellectuals Meeting)లో ఆయన పాల్గొని.. ఎన్నికల్లో అనుసరించాల్సిన వ్యూహాలపై చర్చించారు.

వచ్చే 50 ఏళ్లలో ప్రపంచంలోనే భారత్​ కీలక పాత్ర పోషించబోతోందని అమిత్​ షా ఆశాభావం వ్యక్తం చేశారు. అనేక రంగాల్లో భారతదేశం అగ్రస్థానానికి చేరబోతోందని అన్నారు. మోదీ నాయకత్వంలో దేశం ప్రగతిపథంలో దూసుకుపోతోందని తెలిపారు. బీజేపీ సిద్ధాంతాల ఆధారంగా నడిచే పార్టీనని.. బీఆర్​ఎస్​కు ఏం విధానం ఉందో చెప్పాలని ప్రశ్నించారు.

Amit Shah Attended BJP Intellectuals Meeting : బీఆర్​ఎస్​ కుటుంబ పార్టీనని.. కేటీఆర్​ను సీఎం చేయడం తప్ప కేసీఆర్​కు మరో విధానం అన్నదే లేదని అమిత్​ షా విమర్శించారు. బీఆర్​ఎస్​ ప్రభుత్వ స్టీరింగ్​ ఎంఐఎం చేతుల్లో ఉందని ఎద్దేవా చేశారు. తెలంగాణలో కాషాయ జెండా ఎగరబోతోందని ధీమా వ్యక్తం చేశారు. ఇది అమృత కాలం.. సంకల్పం తీసుకోవాల్సిన కాలమని అన్నారు. బీజేపీ హయాంలో 12 కోట్ల మందికి ఇళ్లు నిర్మించి ఇచ్చామని వివరించారు. మోదీ ప్రభుత్వం 9 కోట్ల మందికి గ్యాస్​ కనెక్షన్లు ఇచ్చిందన్నారు. నరేంద్ర మోదీ నేతృత్వంలోనే కొవిడ్​ను సమర్థవంతంగా ఎదుర్కొన్నామని స్పష్టం చేశారు. కొవిడ్​ వ్యాక్సిన్లను రాహుల్​ గాంధీ ఎద్దేవా చేశారని.. డిజిటల్​ పేమెంట్ల వ్యవస్థను దేశవ్యాప్తం చేసిన ఘనత మోదీకే దక్కుతుందన్నారు.

Amit Shah Telangana Tour : కుటుంబ, అవినీతి పార్టీ చేతుల్లో రాష్ట్రాన్ని పెట్టొద్దని అమిత్​ షా తెలంగాణ ప్రజలను కోరారు. మజ్లిస్​తో దోస్తీ కారణంగానే తెలంగాణ విమోచన దినోత్సవాన్ని కేసీఆర్​ నిర్వహించలేదన్నారు. కేంద్రం రెండేళ్లుగా తెలంగాణ విమోచన దినోత్సవ వేడుకలు నిర్వహిస్తోందని మేధావుల సభలో చెప్పారు. నీళ్లు, నిధులు, నియామకాలపైనే తెలంగాణ పోరాటం జరిగిందన్నారు. కాళేశ్వరం ప్రాజెక్టు పేరుతో వేల కోట్లు దోచుకున్నారని ఆరోపించారు. మోదీ సర్కార్​ తెలంగాణకు తొమ్మిదేళ్లలో 9 లక్షల కోట్ల రూపాయలను ఇచ్చిందని అన్నారు. రాష్ట్రానికి కేసీఆర్​ ఏం చేశారని.. ఇక్కడి ప్రజలు అడుగుతున్నారన్నారు. తెలంగాణ ప్రజలను ఓటు అడిగే హక్కు కేసీఆర్​కు లేదన్నారు. కాంగ్రెస్​, బీఆర్​ఎస్​ నాటకాలు ఆడుతున్నాయని.. మోదీపై భరోసా ఉంచి ఈసారి తెలంగాణలో అవకాశం ఇవ్వాలని అమిత్​ షా తెలంగాణ ప్రజలను కోరారు. అంతకు ముందు ఆదిలాబాద్​లో జరిగిన బీజేపీ జనగర్జన సభలో పాల్గొన్నారు.