తెలంగాణ విద్యుత్ శాఖ అప్పులు రూ. 81,516 కోట్లు : భట్టి విక్రమార్క

Telangana Assembly Sessions Live News Today 2023 : రాష్ట్రంలో విద్యుత్ రంగం ఆందోళనకర పరిస్థితిలో ఉందని ఉప ముఖ్యమంత్రి భట్టి విక్రమార్క తెలిపారు. గత ప్రభుత్వ ఆలోచనలు, నిరర్ధక అప్పులతో విద్యుత్ రంగం కుదేలయిందన్నారు. అప్పుల ఊబి నుంచి బయటకు తెచ్చి వినియోగదారులకు నాణ్యమైన విద్యుత్​ను, వ్యవసాయానికి ఉచిత విద్యుత్ సరఫరా చేసేందుకు తమ ప్రభుత్వం కట్టుబడి ఉందని భట్టి విక్రమార్క పేర్కొన్నారు. గత ప్రభుత్వ విధానాల వల్ల డిస్కంల అప్పులు రూ.81 వేల 516 కోట్లకు చేరాయన్నారు. విద్యుత్ కొనుగోళ్లకు అవసరమైన నిధులను అప్పుల ద్వారా సమకూర్చుకోవడం కష్టంగా మారిందన్నారు.

Telangana Assembly Sessions Live News Today 2023 : విద్యుత్ రంగంపై వాస్తవాలు ప్రజలకు, శాసనసభ్యులకు తెలియాలన్న ఉద్దేశంతోనే శ్వేతపత్రం ప్రవేశపెట్టినట్లు ఉప ముఖ్యమంత్రి, విద్యుత్ శాఖ మంత్రి భట్టి విక్రమార్క తెలిపారు. రాష్ట్ర అభివృద్ధి, ఆర్థిక పురోగతిలో విద్యుత్ రంగం కీలక పాత్ర పోషిస్తుందని అన్నారు. పరిశ్రమలు, వ్యవసాయం, రవాణా, వైద్య, సమాచార, సేవా రంగం అభివృద్ధికి నమ్మకమైన, నాణ్యమైన విద్యుత్తే వెన్నెముకని భట్టి విక్రమార్క పేర్కొన్నారు. రాష్ట్ర మనుగడకు విద్యుత్ రంగ పరిపుష్టి చాలా అవసరమన్న ఆయన, ప్రజల నాణ్యమైన జీవన శైలికి సూచిక విద్యుత్తేనన్నారు. రాష్ట్రావిర్భావం నాటికి ఉన్న ప్రాజెక్టులు, ఆ తర్వాత ప్రారంభించినవి తదితర వివరాలన్నీ శ్వేతపత్రంలో స్పష్టంగా వివరించామన్నారు.

Telangana Government Released White Paper on Power Sector : అవసరమైన కొత్త ప్రాజెక్టులు తీసుకురాకపోగా, ఉన్న వాటిని కుదేలయ్యేలా చేసిన అప్పులు ఆందోళనకరంగా ఉన్నాయన్నారు. తెలంగాణ ఏర్పడిన 2014 నాటికి డిస్కంలు రూ.10 వేల 783 కోట్ల రుణంతో ఉండగా, ఈ ఏడాది అక్టోబరు నాటికి 39 వేల 457 కోట్లకు చేరాయని, ట్రాన్స్​కో అప్పులు రూ.2 వేల 911 కోట్లుగా ఉంటే, ప్రస్తుతం రూ.50 వేల 136 కోట్లకు చేరినట్లు ఉప ముఖ్యమంత్రి వివరించారు. జెన్ కో అప్పులు రూ.7 వేల 662 కోట్ల నుంచి రూ. 31 వేల 923 కోట్లకు పెరిగాయన్నారు. గత ప్రభుత్వ పాలన సక్రమంగా, ప్రణాళికబద్ధంగా లేకపోవడం వల్ల దూరదృష్టి లేక డిస్కంల లోటు రూ.62 వేల 496 కోట్లకు చేరిందన్నారు. వ్యవసాయ సబ్సిడీ అంతరం రూ.18 వేల 725 కోట్లుగా ఉందన్నారు.

తెలంగాణ రాష్ట్రావిర్భావం నాటికి జెన్ కో స్థాపిక విద్యుత్ ఉత్పత్తి సామర్థ్యం 4 వేల 365 మెగా వాట్లు ఉందని భట్టి విక్రమార్క తెలిపారు. రాష్ట్రం ఏర్పడక ముందే 2 వేల 960 మెగావాట్ల ఉత్పత్తి కేంద్రాలకు ప్రణాళికలు, పనులను కేంద్రంలోని అప్పటి యూపీఏ ప్రభుత్వం ప్రారంభించిందని తెలిపారు. రాష్ట్రం ఏర్పడిన తర్వాత ఆ కేంద్రాలే విద్యుత్​ను అందించడంలో కీలక పాత్ర పోషించాయని భట్టి విక్రమార్క తెలిపారు. తెలంగాణకు 1800 మెగా వాట్ల స్థాపిత విద్యుత్ వచ్చేలా పునర్​ వ్యవస్థీకరణ చట్టంలో ఆనాటి యూపీఏ ప్రభుత్వం ప్రత్యేక నిబంధనలు రూపొందించిందని ఉప ముఖ్యమంత్రి అన్నారు. తెలంగాణ రాష్ట్రం ఏర్పడిన తర్వాత గత ప్రభుత్వం 1080 మెగావాట్ల భద్రాద్రి థర్మల్ ప్రాజెక్టును మాత్రమే పూర్తి చేసిందని భట్టి విక్రమార్క తెలిపారు. అది కూడా ప్రమాణాలకు విరుద్ధంగా సుదీర్ఘ కాలం చేపట్టడం వల్ల పెట్టుబడి వ్యయం పెరిగిందని పేర్కొన్నారు. బొగ్గు గనులకు అత్యంత దూరంగా యాదాద్రి థర్మల్ ప్రాజెక్టును చేపట్టిందని, ఇందులో బొగ్గు సరఫరాకే ఏటా రూ.800 కోట్ల అదనపు వ్యయం వస్తోందన్నారు.