TSRTC T-24 Tickets : T-24 టికెట్ ధరల్ని పెంచిన ఆర్టీసీ

T-24 ticket prices : గ్రేటర్ హైదరాబాద్ పరిధిలోని సిటీ బస్సుల్లో తక్కువ ధరలో 24 గంటల పాటు ప్రయాణించడానికి టీ-24 టికెట్ ఎంతో ఉపయోగపడుతుంది. టీ-24 టికెట్‌ ప్రస్తుత ధరల్ని పెంచుతూ ఆర్టీసీ నిర్ణయం తీసుకుంది.

TSRTC hikes t 24 Ticket Price : ఒక్కసారి టికెట్ తీసుకున్నామంటే 24 గంటల పాటు నగరంలో ఎక్కడైనా తిరిగే వెసలుబాటు ఉంటుంది. వంద రూపాయల లోపే ఉన్న ఈ టికెట్ ధరలు సామాన్యులకు ఎంతో ఊరటగా ఉంటాయి. ఒక్కరోజులో సిటీ అంతా చక్కర్లు కొట్టే అవకాశం ఉంటుంది. అయితే హైదరాబాద్‌ పరిధిలోని సిటీ బస్సుల్లో 24 గంటలపాటు ప్రయాణించడానికి వెసులుబాటు కల్పించే టీ-24 టికెట్‌ ప్రస్తుత ధరల్ని పెంచుతూ ఆర్టీసీ నిర్ణయం తీసుకుంది. సాధారణ ప్రయాణికులకు ఈ టికెట్ ధరను 90 రూపాయల నుంచి వందకు పెంచినట్లు అధికారులు తెలిపారు.

సాధారణ ప్రయాణికులకు ఈ టికెట్‌ ధరను రూ.90 నుంచి రూ.100కి పెంచింది. సీనియర్‌ సిటిజన్ల(పురుషులు, మహిళలు, 12 ఏళ్లపైబడిన బాలికలు)కు రూ.80 ఉండగా రూ.90 చేసింది. ఈ మేరకు ఆర్టీసీ ఈడీ(ఆపరేషన్స్‌) ఉత్తర్వులు జారీ చేసింది. ఈ టీ-24 టికెట్‌ ధరలు జూన్‌ 16 నుంచి జులై 31 వరకు అమల్లో ఉంటాయని అధికారులు ఉత్తర్వుల్లో పేర్కొన్నారు. గతంలో సాధారణ ప్రయాణికులకు టీ-24 టికెట్‌ ధర రూ.100 ఉండగా.. ఏప్రిల్‌ 26న రూ.90కి తగ్గించింది. సీనియర్‌ సిటిజన్లకు రూ.80కి అందించింది. తాజాగా పాత ధరల్ని తీసేసి కొత్త ధరల్ని తీసుకొచ్చారు.

ఆర్టీసీ ఈడీ కార్యాలయాల తరలింపు : సిటీ బస్సులకు సంబంధించి జూబ్లీ బస్‌స్టేషన్‌లో ఉన్న గ్రేటర్‌ ఈడీ కార్యాలయాన్ని మిధానిలోని కమ్యూనిటీ ఎమినిటీస్‌ సెంటర్‌కు మార్చనున్నారు. అలాగే ఎంజీబీఎస్‌లో ఉన్న హైదరాబాద్‌ జోన్‌ ఈడీ ఆఫీస్‌ను కాచిగూడలోని కమ్యూనిటీ ఎమినిటీస్‌ కేంద్రానికి మార్చనున్నారు. ఎండీ సజ్జనార్‌ ఆదేశాల మేరకు ఈ నిర్ణయం తీసుకున్నట్లు ప్రధాన కార్యాలయం బస్‌భవన్‌ ఈడీ (పరిపాలన) ఆదేశాలు జారీ చేశారు.

TSRTC Vehicle Tracking App ​: ఎవరైనా ప్రయాణికుడు ఏదైనా స్టాపులో ఉన్న.. తాను వెళ్లాల్సిన బస్సు కోసం, ఆ మార్గంలో ప్రయాణించే బస్సుల జాడ గురించి ఈ టీఎస్ఆర్టీసీ వెహికల్ ట్రాకింగ్ యాప్ సహాయంతో తెలుసుకోవచ్చు. బస్సు నంబర్లతో సహా మొత్తం వివరాలు ఇందులో అందుబాటులో ఉంటాయి. మనం ఎక్కాల్సిన బస్సు ఎక్కడుంది? ఎంతసేపట్లో మనం ఉన్న స్టేజి వద్దకు బస్సు వస్తుందన్న వివరాలు ఇందులో ఉంటాయి.

టీఎస్ఆర్టీసీ వెహికల్ ట్రాకింగ్ యాప్ : గూగుల్ ప్లే స్టోర్​లో ఈ యాప్​ను డౌన్‌లోడ్ చేసుకోవచ్చు. బస్సుల సమాచారాన్ని పొందటానకి ఈ ఎంతో ఉపయోగపడుతుందని అధికారులు తెలిపారు. సిటీ బస్సులో డ్రైవర్ సీటు వెనుక కానీ.. కండక్టర్ వద్ద పీడీఎఫ్ ఫార్మాట్‌లో ఉన్న క్యూఆర్‌ కోడ్‌ను స్కాన్ చేసి కూడా ఈ యాప్‌ను డౌన్‌లోడ్ చేసుకోవచ్చని అధికారులు పేర్కొన్నారు. గ్రేటర్ పరిధిలోని మెట్రో ఎక్స్​ప్రెస్ బస్సుల్లోనూ దీనిని అందుబాటులోకి తీసుకొచ్చినట్లు.. గ్రేటర్ హైదరాబాద్ జోన్ ఆర్టీసీ ఈడీ యాదగిరి తెలిపారు.

ఇవీ చదవండి :