Sunday Special Non Veg Curries : మాంసాహార ప్రియులకు ఆదివారం వచ్చిందంటే కంచంలోకి ముక్క చేరాల్సిందే. ప్రతి ఆదివారం చికెన్, మటన్, చేపలు.. ఇలా ఏదో ఒక వెరైటీ ప్రయత్నిస్తూ.. తమ జిహ్వ చాపల్యాన్ని తీర్చుకుంటారు. మనకు అందుబాటులో దొరికే నాన్వెజ్తో ఎప్పుడు ఒకే రకం కాకుండా కొంచెం కొత్తగా ట్రై చేయాలనుకుంటున్నారా.. అయితే ఈ స్టోరీ మీ కోసమే.. ఈ స్టోరీ చదివేయండి.. ఈ సండే ఫండేగా మీకు పసందైన నాన్ వెజ్ వంటకాలు రుచి చూసేయండి.
నాటుకోడి కూర..
Natu Kodi Curry : మనం తరచుగా పౌల్ట్రీ చికెన్ మాంసం తింటుంటాం. ఈ ఆదివారం మాత్రం కాస్త వైరైటీ కోసం.. నాటు కోడి ట్రై చేయండి. ముందుగా కేజీ నాటు కోడి మాంసాన్ని సిద్ధం చేసుకోవాలి. చికెన్కు తగినంత నూనె, కారం, ఉప్పు పట్టించి కొద్దిగా నీళ్లు పోసి.. ఐదు విజిల్స్ వచ్చే వరకూ ఉడికించుకోవాలి. ఆ తర్వాత లవంగాలు, ధనియాలు, యాలకులు వేయించుకున్న గసగసాలు, మిరపకాయలు, కొబ్బరిపొడి, వెల్లులి, ఉప్పు వేసి తగినన్ని నీళ్లతో మెత్తగా గ్రైండ్ చేసి పక్కన పెట్టుకోవాలి. అనంతరం కడాయిలో నూనె వేసుకుని ఉల్లిపాయముక్కలు, పచ్చిమిర్చి, కరివేపాకు వేసి వాటిని గోధుమరంగులోకి వచ్చేవరకూ వేయించుకోవాలి. ఉడికించుకున్న చికెన్ కడాయిలో వేసి ఆ తర్వాత.. తయారు చేసుకున్న మసాలాను వేయాలి. నాలుగు నిమిషాల తర్వాత గరంమసాలా, ఉప్పు వేసి.. ఐదు నిమిషాలు ఉడకనివ్వాలి. చివరగా కొత్తిమీర వేయండి. ఇప్పుడిక టేస్టీ నాటుకోడి చికెన్ కర్రీ సిద్ధం అయ్యింది.
బోటీ మసాలా ఫ్రై..
Boti Masala Fry : ముందుగా కేజీ బోటీని తెచ్చుకుని మంచి నీటితో శుభ్రం చేసి.. కుక్కర్లో పోసుకుని నాలుగు విజిల్స్ వచ్చే వరకూ ఉడికించుకోవాలి. ఆ తర్వాత నీళ్లు తీసేసి పక్కన పెట్టుకోవాలి. ఒక కడాయిలో నూనె పోసుకుని అందులో ఉల్లిపాయముక్కలు, షాజీరా వేసుకుని గోధుమరంగులోకి వచ్చేంతవరకూ వేయించుకోవాలి. ఆ తర్వాత అల్లం వెల్లుల్లి పేస్ట్‌ పచ్చివాసన పోయేంత వరకూ వేయించాలి. అనంతరం ఉడకబెట్టి ఉంచిన బోటీని కడాయిలో వేయాలి. రెండు నిమిషాలు మంటపైన వేయించుకోవాలి. అప్పుడు గరంమసాలా, మిరియాలపొడి, ధనియాలపొడి, ఉప్పు, కారం, కరివేపాకు వేసి ఐదు నిమిషాల పాటు సన్నమంట మీద ఉంచాలి. దించేటప్పుడు పుదీనా, కొత్తిమీర చల్లుకుంటే సరిపోతుంది.
How to Prepare Gongura Mutton Curry : గోంగూర మటన్ కర్రీ ఇలా ట్రై చేయండి.. ఎవరైనా ఫిదా అయిపోతారు!
మటన్ మసాల కర్రీ..
Mutton Masala Curry : ముందుగా కేజీ మటన్ తెచ్చుకుని కడిగి శుభ్రం చేసుకోవాలి. కొబ్బరిపొడి, గసగసాలను కొద్దిగా వేయించుకుని మిక్సీలో వేసుకుని ముద్దగా చేసుకుని పక్కన పెట్టుకోవాలి. కుక్కర్లో నూనె వేసి అందులో ఉల్లిపాయముక్కలు వేసుకుని గోధుమ రంగులోకి వచ్చేంతవరకూ దోరగా వేయించుకోవాలి. ఆ తర్వాత అల్లంవెల్లుల్లి, పసుపు ముద్ద వేసి పచ్చివాసన పోయేవరకూ వేయించుకోవాలి.
ఇప్పుడు కుక్కర్లో మటన్ ముక్కలు వేసుకోవాలి. ఆ తర్వాతే ధనియాలపొడి, కారం, ఉప్పు వేసుకోవాలి. మంటని సన్నని సెగమీద ఉంచి పది నిమిషాలపాటు ఉడికించుకోవాలి. ఇప్పుడు ముందుగా సిద్ధం చేసి పెట్టుకున్న గరంమసాలా, కొబ్బరిపేస్ట్‌, పెరుగు, వేసుకోవాలి. బాగా కలిపి... మూడు నిమిషాల అనంతరం నీళ్లుపోసి కుక్కర్ మూతపెట్టేయాలి. మాంసం ఉడికే వరకూ ఉంచి.. ఉడికిన తర్వాత కొత్తిమీరతో గార్నిష్ చేస్తే మటన్ కర్రీ సిద్ధమయినట్లే.
తలకాయ కూర..
Goat head Curry : ముందుగా వేడినీటిలో కొద్దిగా పసుపు, ఉప్పు వేసి తలకాయ మాంసాన్ని శుభ్రం చేసుకోవాలి. ఒక కడాయిలో నూనె వేసుకుని వేడెక్కాక ఉల్లిపాయముక్కలు, షాజీరా, పచ్చిమిర్చి వేసి నాలుగు నిమిషాల పాటు వేయించాలి. అవి మగ్గిన తర్వాత అందులో ఉప్పు, టమాటా ముక్కలు వేసి మరో మూడు నిమిషాల పాటు వేగనివ్వాలి. ఇప్పుడు తలకాయ మాంసం అందులో వేసుకుని.. పసుపు, అల్లంవెల్లుల్లి పేస్ట్‌ వేసి బాగా కలిపి పదినిమిషాలుంచితే అందులోని నీరంతా పోతుంది. ఆ తర్వాత జీలకర్రపొడి, కారం, గరంమసాలాపొడి, ధనియాలపొడి, పుదీనా వేసి ఐదునిమిషాల పాటు వేయించాలి. అనంతరం తగినన్ని నీళ్లు పోసి మీడియం మంటపైన.. నలభై నిమిషాలపాటు ఉడికించుకోవాలి. చివరిగా కొత్తిమీరతో గార్నిష్ చేసుకుని దించుకోవడమే.
How to Prepare Hyderabadi Chicken Dum Biryani : సండే ధమాకా.. హైదరాబాదీ బిర్యానీ.. ట్రై చేయండిలా..!
లివర్ ఫ్రై..
Liver Fry Curry : ముందుగా కేజీ మేక కార్జాన్ని శుభ్రం చేసి.. గరం మసాలాపొడి, మిరియాల పొడి, పసుపు, కారం, ధనియాలపొడి, తగినంత ఉప్పు, పుదీనా ఆకులు వేసి బాగా కలుపుకుని ఓ అరగంటపాటు పక్కనపెట్టుకోవాలి. ఇప్పుడు కడాయిలో నూనె పోసుకుని అందులో మెంతి ఆకులు, ఉల్లిపాయముక్కలు గోధుమరంగు వచ్చే వరకు వేయించుకోవాలి. వేగిన తర్వాత అందులో మనం ముందుగా మారినేట్‌ చేసి పెట్టుకున్న కార్జం, పచ్చిమిర్చి, వేసుకుని ఉడకనివ్వాలి. దగ్గరకు వచ్చాక కొత్తిమీర చల్లుకుంటే.. లివర్ ఫ్రై రెడీ అయినట్లే
