గ్రేటర్ హైదరాబాద్లోని నివాస, వాణిజ్య ఆస్తుల‌కు సంబంధించిన 2020-2021 ఆర్థిక ఏడాది ఆస్తి పన్నును ఈనెల 31వ తేదీలోగా చెల్లించి.. ఐదు శాతం ఎర్లీబర్డ్ రాయితీ పొందాల‌ని జీహెచ్ఎంసీ కమిషనర్ లోకేశ్ కుమార్ విజ్ఞప్తి చేశారు. 8.24 లక్షల ఆస్తిపన్ను బ‌కాయిదారుల‌కు ఎర్లీబర్డ్ రాయితీ మెస్సేజ్‌లు పంపించామన్నారు.
ఎర్లీబర్డ్ పథకంలో ఆస్తి పన్నును సిటిజన్ సర్వీస్ సెంటర్లు, ఆన్‌లైన్‌, మీ-సేవా కేంద్రాలు, పౌరసేవా కేంద్రాల్లో చెల్లించాలని కోరారు. బుధవారం బల్దియా ప్రధాన కార్యాలయంలోని సర్వీస్ సెంటర్కు నగర వాసులు భారీ సంఖ్యలో వచ్చి పన్నులు చెల్లించారు. నగ‌రంలోని య‌శోద కార్పొరేట్ ఆసుపత్రులకు సంబంధించిన ఆస్తిపన్ను రూ. 2.67 కోట్ల రూపాయలు చెల్లించి... 5 శాతం ఎర్లీబర్డ్ కింద రూ. 14.29 లక్షలు రాయితీ పొందారు.
గతంలో కేవలం రూ.30 వేల వరకే ఆస్తి పన్ను చెల్లించిన వారికే ఎర్లీబర్డ్ రాయితీ వర్తించేది. కానీ ఇప్పుడు ఎంతవరకు ఆస్తి పన్ను ఉన్నా... ఈనెల 31వ తేదీ లోపు చెల్లిస్తే రాయితీ వర్తిస్తుందని కమిషనర్ వెల్లడించారు.
