'శాసనసభ సమావేశాలకు ఆటంకం కలిగిస్తే చర్యలు తప్పవు'

శాసనసభ సమావేశాలకు ఆటంకం కలిగించేలా విద్యార్థి సంఘాల నేతలు గుంపులుగా అసెంబ్లీ పరిసరాల్లోకి వచ్చినందుకే వారిని అడ్డుకున్నామని హైదరాబాద్ సీపీ అంజనీ కుమార్ తెలిపారు. చట్టప్రకారమే పోలీసు బలగాలను ఉపయోగించామని పేర్కొన్నారు.

శాసనసభ సమావేశాలకు ఎలాంటి ఆటంకం కలగకుండా చేసేందుకే విద్యార్థి సంఘాలను అడ్డుకున్నట్లు హైదరాబాద్​ సీపీ అంజనీకుమార్​ తెలిపారు. ఏబీవీపీ, పీడీఎస్​యూ కార్యకర్తలు అసెంబ్లీ గేటులోపటికి చొచ్చుకెళ్లేందుకు ప్రయత్నించారని సీపీ పేర్కొన్నారు.

అసెంబ్లీ పరిసరాల్లో గుమిగూడకుండా నిషేధం విధిస్తూ ఇదివరకే ఉత్తర్వులు జారీ చేశామని అంజనీ కుమార్ తెలిపారు. శాసనసభ సమావేశాలను ఆటంకంపరచాలని ఎవరూ చూడొద్దని కోరారు. అసెంబ్లీ ఎదుట గుమిగూడే ప్రయత్నం చేస్తే చట్టపరంగా కఠిన చర్యలు తీసుకుంటామని హెచ్చరించారు.

ఇదీ చూడండి: విద్యార్థులపై పోలీసుల తీరు అమానుషం: డీకే అరుణ