నేటి నుంచే పది పరీక్షలు

పదో తరగతి పరీక్షలకు ఏర్పాట్లు పూర్తయ్యాయి. నేటి నుంచి ఏప్రిల్ 3 వరకు జరగనున్న పరీక్షల కోసం 2 వేల 563 కేంద్రాలను సిద్ధం చేశారు. పరీక్ష ప్రారంభ సమయం తొమ్మిదిన్నర కాగా.. మరో ఐదు నిమిషాల వరకు లోనికి అనుమతిస్తామని పాఠశాల విద్యా శాఖ తెలిపింది.

పదో తరగతి పరీక్షలకు సర్వం సిద్ధమైంది. రాష్ట్రవ్యాప్తంగా 11,023 పాఠశాలలకు చెందిన 5,52,302 మంది విద్యార్థులు పరీక్షలు రాయనున్నారు. వారిలో 2,55,318 మంది అబ్బాయిలు, 2,52,492 మంది అమ్మాయిలు ఉన్నారు. మొత్తం రాష్ట్రవ్యాప్తంగా 2,563 కేంద్రాలను సిద్ధం చేశారు.

ఉచితంగా ప్రయాణ సౌకర్యం
విద్యార్థులు సమాధానాలు రాసేందుకు మెయిన్, అడిషనల్, గ్రాఫ్ షీట్లను ఇప్పటికే కేంద్రాలకు పంపించినట్లు పాఠశాల విద్యాశాఖ సంచాలకులు విజయ్ కుమార్ తెలిపారు. మాల్ ప్రాక్టీస్, కాపీయింగ్​కు​ పాల్పడితే కఠిన చర్యలు తప్పవని హెచ్చరించారు. రాష్ట్రవ్యాప్తంగా 140 ఫ్లయింగ్ స్క్వాడ్​లు.. హైదరాబాద్​లోని ప్రభుత్వ పరీక్షల సంచాలకుడి కార్యాలయం నుంచి నలుగురు ప్రత్యేక ఫ్లయింగ్ స్క్వాడ్​లను నియమించారు. హాల్ టికెట్ చూపించి ఆర్టీసీ బస్సుల్లో విద్యార్థులు ఉచితంగా ప్రయాణం చేయవచ్చునని పేర్కొన్నారు.

ఆలస్యమైనా... రావొచ్చు
పరీక్ష ప్రారంభ సమయం ఉదయం తొమ్మిదిన్నర అయినప్పటికీ... తర్వాత ఐదు నిమిషాల వరకు లోనికి అనుమతిస్తామని విద్యాశాఖ అధికారులు తెలిపారు. ఉదయం 8 గంటల 45 నిమిషాల వరకే కేంద్రాలకు చేరుకోవాలని సూచించారు. ప్రశ్నపత్రం లీకైందని పుకార్లు వస్తుంటాయని.. వాటిని నమ్మవద్దని తల్లిదండ్రులు, విద్యార్థులను కోరారు.

పరీక్షా కేంద్రాల వద్ద మందులు, ఓఆర్​ఎస్ ద్రావణం..!
ఈనెల 22న ఎమ్మెల్సీ ఎన్నికలను దృష్టిలో ఉంచుకుని ఆరోజు జరగాల్సిన ఆంగ్లం పేపర్-​2పరీక్షను ఏప్రిల్ 3 వ తేదీకి వాయిదా వేశామని మరోసారి గుర్తు చేశారు. వేసవి తీవ్రతను దృష్టిలో ఉంచుకొని... పరీక్ష కేంద్రాల వద్ద ఏఎన్​ఎం, ఆశా ఉద్యోగిని, మందులు, ఓఆర్​ఎస్ ద్రావణం సిద్ధంగా ఉంచాలని వైద్యారోగ్య శాఖను విద్యాశాఖ కోరింది. పరీక్ష కేంద్రాల వద్ద 144 సెక్షన్ అమల్లో ఉంటుంది.

ఇవీ చూడండి:8 మందితో కాంగ్రెస్​ తొలి జాబితా