ఈయన పేరు క్లెమెంటో... తెలంగాణ జానపద గేయాల రచయిత, గాయకుడు, సంగీత దర్శకుడు. 32 ఏళ్ల కిందట మాయదారి మైసమ్మ పాటతో మొదలైన క్లెమెంటో పాటల ప్రస్థానం... అంచలంచెలుగా ఎదుగుతూ.. నాలుగున్నర వేల పాటలకు చేరింది. ఇంకా రాస్తూ... పాడుతూనే ఉన్నారు. క్లెమెంటో రాసిన పాటలు వింటుంటే... తెలుగు రాష్ట్రాల ప్రజలే కాదు... పొరుగునున్న కర్ణాటక, తమిళనాడు ప్రజల్లో కూడా ఉరిమే ఉత్సాహం వచ్చేస్తుంది. ఆయన పాడుతుంటే ఎంతటి వారైనా సరే అప్రయత్నంగా చిందులేస్తుంటారు. జానపదాలు రాసే రచయితలు ఎంతో మంది ఉన్నా... క్లెమెంటో శైలే వేరు. అందుకే ఏళ్లు గడుస్తున్నా ఆయన రాసిన, రాస్తోన్న.. పాటలు.. గల్లీల్లో మారుమోగుతూనే ఉన్నాయి.
చిన్నప్పటి నుంచే
సికింద్రాబాద్ లాలగూడలో క్రైస్తవ కుటుంబంలో జన్మించిన క్లెమెంటోకు... పాటలు రాయడమంటే చిన్నప్పటి నుంచి ఎంతో ఆసక్తి. ఎనిమిదో తరగతిలోనే లాలగూడ రైల్వే బాయ్స్ హైస్కూల్లో వార్షిక పత్రికలో పాట రాసి ప్రశంసలందుకున్నాడు. ఎన్నో చోట్ల అవకాశాల కోసం ప్రయత్నించినా... నిరాశే మిగిలింది.
బోనాల పాట..
1986లో గణేశ్ నిమజ్జన వేడుకల్లో తన మిత్రుల సహకారంతో పాఠశాలలో రాసిన "పెద్ద చిక్కు వచ్చినాదిరో" పాట పాడాడు. ఆ పాట విన్న డీఆర్సీ రికార్డింగ్ కంపెనీ అధినేత యాదగిరిరావు క్లెమెంటోను ప్రోత్సహించి తన ఆడియో క్యాసెట్లో పాటపాడే అవకాశం ఇచ్చారు. లష్కర్ జాతరలో బోనాల పండుగ పాట పాడిన క్లెమెంటో అక్కడి నుంచి వెనక్కి తిరిగిచూడలేదు. మూడేళ్లలో 80కిపైగా పాటలు రాశాడు. రాయడంతోపాటు పాడటం, సంగీతం చేకూర్చడం చేసేవాడు.
మలుపు తిప్పిన మైసమ్మ..
1990లో హైదరాబాద్ మాండలికంలో ఉర్దూ తొణికిసలాడేలా... 25 నిమిషాల్లో మాయదారి మైసమ్మ పాట రాశాడు. ఆ పాట బాగా నచ్చిన ఎస్వీసీ రికార్డింగ్ కంపెనీ... క్లెమెంటోతోనే పాట పాడించింది. మాయదారి మైసమ్మ పాట సూపర్ డూపర్ హిట్ అయ్యింది. మూడు రోజుల్లోనే 5 వేల క్యాసెట్లు అమ్ముడుపోయాయి. తమిళ, హిందీ, ఇంగ్లీష్లో దాండియా, మర్ఫా ఇలా అన్ని తాళాల్లోనూ మాయదారి మైసమ్మ పాట పాడారు.
పల్లె జనాల స్ఫూర్తితో..
ఎవరి దగ్గర శిక్షణ పొందని క్లెమెంటో... భాగ్యనగరానికి వచ్చే పల్లె జనాలను చూస్తూ వారిని మాటలను పాటలుగా రాసేవాడు. తెల్లవారుజామునే మూడు గంటలకు లేచి తనకు తోచిన పదాలతో పాట రాసేవాడు. జానపదాల్లో ఏ వాక్యానికి ఏ ట్యూన్ వాడాలో తెలుసుకున్న క్లెమెంటో... ఈసీఐఎల్లో ఉన్న స్టూడియోకు వచ్చి వాటిని రికార్డ్ చేస్తుంటాడు.
లంబా.. లంబా..
తుల్జా భవానీ, సమ్మక్క- సారక్క, ఏడుపాయల దుర్గ, ఎల్లమ్మ, పెద్దమ్మ, మైసమ్మ, పోచమ్మలపై 2 వేలకుపైగా పాటలు రాశారు. లష్కర్ జాతర బోనాల పండుగ, లంబా లంబా కంబా మీద, పాలపోరగాణ్ని, బాలామణి, కాళ్లకు గజ్జెలు కట్టినాదానా తదితర పాటలు విశేష ప్రజాదరణ పొందాయి. ఇప్పటి వరకు సుమారు నాలుగన్నర వేల పాటలను రచించిన క్లెమెంటోకు అమెరికా, యూరప్, ఆస్ట్రేలియాల్లోనూ అభిమానులు ఉండటం విశేషం.
ఇదీ చూడండి: 32 ఏళ్లుగా.. వేల పాటలు రాసి అలరిస్తోన్న క్లెమెంటో
