ఆస్తి పన్ను వసూలు కోసం ప్రత్యేక అధికారులు

పట్టణాల్లో ఆస్తిపన్ను బకాయిల కోసం తెచ్చిన ఓటీఎస్ పథకం గడువు ప్రభుత్వం పొడిగించింది. ఈ నెలాఖరు వరకు గడువు పెంచుతూ పురపాలకశాఖ ఉత్తర్వులు జారీ చేసింది. 2019-20 ఏడాదికి 90 శాతం వడ్డీ మినహాయింపుతో బకాయిలు చెల్లించే వీలు కల్పించింది. అందుకోసం ప్రత్యేక అధికారులను నియమించింది.

జీహెచ్​ఎంసీ సహా రాష్ట్రంలోని అన్ని పట్టణాల్లో 2019-20 సంవత్సరానికి ఆస్తిపన్ను బకాయిల చెల్లింపు కోసం... అమలు చేస్తున్న ఓటీఎస్​ పథకం గడువును ప్రభుత్వం పొడిగించింది. బకాయిలను 90 శాతం వడ్డీ మినహాయింపుతో చెల్లించేలా రాష్ట్ర ప్రభుత్వం గతంలో ఓటీఎస్​ అవకాశం కల్పించింది.

నెలాఖరు వరకు గడువు పెంచుతూ పురపాలకశాఖ ఉత్తర్వులు జారీ చేసింది. ఆస్తి పన్ను బకాయిదారులందరూ ఈ అవకాశాన్ని వినియోగించుకునేలా చర్యలు తీసుకోవాలని... విస్తృతంగా అవగాహన కల్పించాలని అధికారులను ప్రభుత్వం ఆదేశించింది. నెలాఖరులోపు వంద శాతం పన్నుల వసూలే లక్ష్యంగా నిర్ధేశించుకున్న పురపాలకశాఖ... అందుకు ప్రత్యేకాధికారులను నియమించింది.

జీహెచ్​ఎంసీ మినహా మిగతా పట్టణాలు, నగరాల్లో ప్రతి సోమ, బుధ, ఆదివారాలతోపాటు.. సెలవు రోజుల్లో పన్నుల వసూలు కోసం ప్రత్యేక మేలాలు నిర్వహించాలని గతంలోనే ఉత్తర్వులు జారీ చేశారు. ఈ ప్రక్రియను పర్యవేక్షించేందుకు వీలుగా తొమ్మిది మంది ప్రత్యేకాధికారులను నియమించారు. ఆస్తిపన్ను, మంచినీటి బిల్లు, వ్యాపార లైసెన్స్​లు, ప్రకటనల రుసుములు తక్కువగా వసూలైన పట్టణాలపై ప్రత్యేకంగా దృష్టి సారించాలని సూచించారు.

ఇదీ చూడండి : అధికార పార్టీ వైఫల్యాలను ఎండగట్టండి: బండి సంజయ్​