Special Buses for Men in Telangana : మహిళలకు ఉచిత ప్రయాణం అమల్లోకి వచ్చాక టీఎస్ఆర్టీసీ బస్సుల్లో రద్దీ గణనీయంగా పెరిగింది. కొన్ని బస్సుల్లో అయితే వెనక వరుస సీట్లలో కూడా వారే కనిపిస్తున్నారు. దీంతో సీటు దొరకలేదని పురుషులు దిగి వెళ్లిపోతున్నట్లు ఇటీవల నిర్వహించిన ఆన్‌లైన్‌ మీటింగ్‌లో కండక్టర్లు ఆర్టీసీ ఎండీ సజ్జనార్ దృష్టికి తీసుకువచ్చారు.
TSRTC Men Special Buses in Telangana : ఈ క్రమంలో అవసరమైన రూట్లు, సమయాల్లో పురుషుల కోసం ప్రత్యేక బస్సులు నడిపే విషయంపై టీఎస్ఆర్టీసీ(TSRTC) యోచిస్తోంది. వృద్ధులకు ప్రత్యేకంగా సీట్ల కేటాయింపుపైనా కసరత్తు జరుగుతోంది. మరోవైపు విద్యార్థులకు సైతం కొన్ని మార్గాల్లో బస్సులు నడిపే విషయాన్ని ఉన్నతాధికారులు చర్చిస్తున్నారు. సీనియర్ సిటిజన్లకు ప్రత్యేక సీట్లలో తొలి ప్రాధాన్యం ఇవ్వనున్నట్లు సమాచారం.
20 శాతం పెరిగిన ఓఆర్‌ : ఆర్టీసీ బస్సుల్లో సీట్ల భర్తీ నిష్పత్తిని తెలిపే ఓఆర్‌(Occupancy Ratio) గతంలో 69 శాతం ఉండేది. గతంలో నిత్యం మహిళా ప్రయాణికులు 12-14 లక్షలు ఉండగా, ఇప్పుడు రాష్ట్రంలో 29 లక్షలు దాటుతున్నట్లు ఆర్టీసీ గణాంకాలు చెబుతున్నాయి. ఈ క్రమంలో ఓఆర్‌ దాదాపు 89 శాతం నమోదవుతోంది. ఉన్న వాహనాలతోనే అంత రద్దీని తట్టుకోవడం ఆర్టీసీకి సవాలుగా మారుతోంది.
ఉచిత ప్రయాణం ఆనందం అంటున్న మహిళలు - నష్టపోతున్నామంటూ ఆటోడ్రైవర్ల ఆవేదన
Separate Seats For Men in TSRTC Buses : పట్టణాల నుంచి గ్రామాలకు వెళ్లే ఆఖరి బస్సుల్లో రద్దీ మరీ ఎక్కువగా ఉంటోంది. ఈ నేపథ్యంలో పరిస్థితుల్ని డ్రైవర్, కండక్టర్లు దాదాపు 20 మందికి పైగా ఎండీ సజ్జనార్కి వివరించారు. దీనిపై సమస్య పరిష్కారానికి సూచనలూ ఇచ్చారు. నిల్చొనేందుకు స్థలం లేక బస్సు ఎక్కలేక విద్యార్థులు అక్కడే ఆగిపోయి ఇబ్బందిపడ్డ ఘటనలూ ఉన్నతాధికారుల దృష్టికి చాలానే వచ్చాయి. కాగా ఉన్నతాధికారులు ఆయా అంశాలపై దృష్టి పెట్టారు. డిపో మేనేజర్లు సైతం క్షేత్రస్థాయి పరిస్థితిని వివరించారు.
'భద్రాచలం-ఖమ్మం ఎక్స్‌ప్రెస్‌లో మహిళా ప్రయాణికులు ఎక్కువగా ఉంటున్నారు. ఎడమ వరుస(ఇద్దరు కూర్చునే సీట్లు) పురుష ప్రయాణికులకు వదలండి. కుడి వరుస(ముగ్గురు కూర్చునే సీట్లు)లో మహిళలు కూర్చోండి అని చెబుతున్నాం. మహిళా ప్రయాణికులు దానిని అర్థం చేసుకుని ఒక వరుసకే పరిమితమవుతున్నారు. సీట్లు దొరకని వాళ్లు నిల్చుంటున్నారు.' అని కండక్టర్‌ కవిత పేర్కొన్నారు.
పురుషులు, విద్యార్థులు లేదా మహిళలకు ప్రత్యేకం : సమయాల వారీగా రద్దీపై సమగ్ర సమాచారం వచ్చాక విద్యార్థులకు, పురుషులకు ప్రత్యేక బస్సులు నడపడంపై ఉన్నతాధికారులు ఆలోచన చేయనున్నారు. ఇవి సాధ్యం కాదంటే మహిళలకు మాత్రమే ప్రత్యేక బస్సులు నడపడం, ఇలా రకరకాల చర్చలు జరుగుతున్నాయని తెలంగాణ ఆర్టీసీ వర్గాల సమాచారం. జీరో టికెట్ అని మహిళా ప్రయాణికుల్ని చిన్నచూపు చూడమని, వారి తరఫున ప్రభుత్వం ఆ ఛార్జీ చెల్లిస్తోందని ఓ ఉన్నతాధికారి పేర్కొన్నారు. ప్రయాణికులకు ఇబ్బంది కలగకుండా పలురకాల ప్రత్యామ్నాయాలపై దృష్టి పెట్టామని ఆయన తెలిపారు.
నేటి నుంచి మహాలక్ష్ములకు జీరో టికెట్ - ఆ గుర్తింపు కార్డు తప్పనిసరి
