జవహర్‌నగర్‌ డంపింగ్‌ యార్డులో చెత్త నుంచి విద్యుదుత్పత్తి చేసే కేంద్రం అందుబాటులోకి వచ్చింది. ప్లాంటు అందుబాటులోకి రావడంతో రాజధానిలో ఉత్పత్తయ్యే వ్యర్థాల నిర్వహణకు సగం పరిష్కారం లభించినట్లేనని అధికారులు స్పష్టం చేస్తున్నారు. భవిష్యత్తులో ఈ తరహా విద్యుదుత్పత్తి కేంద్రాలను నగరం నలుమూలల ఏర్పాటు చేస్తామని, శాస్త్రీయ వ్యర్థాల యాజమాన్యంతో డంపింగ్‌ యార్డులను ఉద్యానవనాలుగా తీర్చిదిద్దుతామని ధీమా వ్యక్తం చేస్తున్నారు.
ఇప్పటి వరకు 5 మిలియన్‌ యూనిట్లు.. జవహర్‌నగర్‌ డంపింగ్‌యార్డు విద్యుదుత్పత్తి కేంద్రానికి రోజుకు 19.8 మెగావాట్ల విద్యుదుత్పత్తి సామర్థ్యం ఉంది. ఇందులో రెండు బాయిలర్లు ఉంటాయి. ప్రస్తుతం ఒకటే పని చేస్తోంది. అధికారికంగా ప్రారంభించాక రెండింటిని రంగంలోకి తేవాలని నిర్వహణ సంస్థ రాంకీ భావిస్తోంది. ఆగస్టు 20న ప్లాంటును మల్కారం సబ్‌స్టేషన్‌కు అనుసంధానం చేశారు. అప్పట్నుంచి ఉత్పత్తయ్యే విద్యుత్తు గ్రిడ్‌కు చేరుతోంది. రోజుకు గరిష్ఠంగా 2 లక్షల యూనిట్ల చొప్పున ఇప్పటి వరకు 2 మిలియన్‌ యూనిట్లు గ్రిడ్‌కు అందింది. ఒప్పందం ప్రకారం ప్రభుత్వం యూనిట్‌కు రూ.7.84 చొప్పున చెల్లించాలని అధికారులు చెబుతున్నారు. ఏడాదికి 174 మిలియన్‌ యూనిట్ల కరెంటును ఉత్పత్తి చేయాలనేది రాంకీ లక్ష్యం. దీనివల్ల పేరుకుపోతున్న వ్యర్థాల పరిమాణం ఐదో వంతు తగ్గుతుంది. భూగర్భ జలాల కాలుష్యం, దుర్వాసన, ఇతరత్రా సమస్యలు అదుపులోకి వస్తాయని జీహెచ్‌ఎంసీ ఆశాభావం వ్యక్తం చేస్తోంది.
రోజుకు 1600 టన్నుల బూడిద
పూర్తి సామర్థ్యంతో ప్లాంటు నడిస్తే రోజుకు 1600 టన్నుల మండే స్వభావమున్న చెత్త బూడిద అవుతుంది. ప్రస్తుతం రోజుకు 800 టన్నుల చెత్తను మండిస్తున్నారు.
జీహెచ్‌ఎంసీలో నిత్యం ఉత్పత్తయ్యే చెత్త 6,000 టన్నులు
- మండే స్వభావమున్న 1600 టన్నుల చెత్తను విద్యుదుత్పత్తికి వినియోగించి, మిగిలిన వ్యర్థాల్లోని తడి చెత్తను ఎరువుగా మార్చడం, ఎందుకు పనికిరాని వ్యర్థాలను గుట్టలపై కలపడం చేయనున్నారు.
- డంపింగ్‌ యార్డులోని వ్యర్థాల కొండలపై మూడు పొరల్ల్లో మట్టి ప్లాస్టిక్‌ కవర్లు కప్పి, వాటిపై పచ్చదనాన్ని అభివృద్ధి చేసే క్యాపింగ్‌ పనులు 90 శాతం పూర్తయ్యాయి. దీంతో చెత్త నుంచి గాఢ మురుగు జలాలు బయటకు వచ్చే సమస్య తగ్గుతుంది. క్రమంగా ఒక్కో పనిని పూర్తి చేస్తామని అధికారులు చెబుతున్నారు.
ఇదీ చదవండిః విస్తరిస్తోన్న మహమ్మారి.. పల్లెల్లోనే 86 శాతానికిపైగా కొవిడ్
