సాఫ్ట్​వేర్ ఉద్యోగినిని బలిగొన్న రోడ్డు ప్రమాదం

ఉప్పల్​లో రోడ్డు ప్రమాదం జరిగింది. రాత్రి విధులు ముగించుకుని ఇంటికి వస్తున్న సమయంలో లారీ ఢీకొని సాఫ్ట్​వేర్ ఉద్యోగిని మరణించింది. పండుగ వేళ కుమార్తె మృతితో కుటుంబసభ్యులందరూ శోక సంద్రంలో మునిగిపోయారు. లారీ డ్రైవర్ పరారీలో ఉన్నట్లు పోలీసులు వెల్లడించారు.

హైదరాబాద్ ఉప్పల్​లో జరిగిన రోడ్డు ప్రమాదంలో ఓ సాఫ్ట్​వేర్ ఉద్యోగిని మృతి చెందింది. మేడిపల్లి మండలం పర్వతాపూర్​కు చెందిన కొండవేటి సోనాలీ రామంతాపూర్​లోని ఓ సంస్థలో పని చేస్తోంది. రాత్రి విధులు ముగించుకుని ద్విచక్ర వాహనంపై ఇంటికి బయలుదేరింది. ఉప్పల్ చౌరస్తాలోని విద్యుత్ కార్యాలయం వద్దకు రాగానే వెనుక నుంచి లారీ ఢీ కొట్టింది. ఆమె అక్కడికి అక్కడే మృతి చెందింది. మృతురాలి తల్లి ఫిర్యాదు మేరకు పోలీసులు కేసు నమోదు చేసుకొని దర్యాప్తు చేస్తున్నారు. మృతదేహాన్ని గాంధీ ఆస్పత్రికి తరలించారు.

ఇవీ చూడండి: విడాకుల నోటీసు పంపడంతో వివాహిత ఆత్మహత్య