ఏపీలోని శ్రీకాకుళం జిల్లా నందిగాం మండలం పెద్దతామరాపల్లికి చెందిన ఆనెం అప్పలమ్మ చేనేత కార్మికురాలు. తమ వృత్తి వారి కుటుంబానికి భృతి కల్పించకపోవడం వల్ల కుటుంబంతో కొన్నేళ్ల కిందట హైదరాబాద్ నగరంలోని బోయినపల్లికి చేరుకొని కూలి పనులు చేస్తూ కాలం వెళ్లదీస్తున్నారు. ప్రస్తుతం కూలి పనులు లేక ఒక పూట తింటే మరోపూట పస్తులుంటున్నామని ఆవేదన వ్యక్తం చేశారు. తమ సొంత రాష్ట్రం వెళితే ఆర్థిక తోడ్పాటు లభిస్తుందని ఆమె భావిస్తున్నారు.
శ్రీకాకుళం జిల్లా, సంత బొమ్మాళి మండలం హనుమంతుపురానికి చెందిన దుర్యోధన కుమార్తె పెళ్లి కోసం భూమి అమ్మి కొన్నేళ్ల కిందటే నగరంలోని మూసాపేట చేరుకొని కూలీగా మారారు. కరోనాతో కూలిపనుల్లేక ఇబ్బందులు పడుతున్నారు. ఇతనూ సొంత రాష్ట్రానికి వెళ్లాలని అనుకుంటున్నారు.
మహానగరంలో అనేక చోట్ల శ్రీకాకుళం జిల్లా కూలీల పేరుతో కాలనీలే ఏర్పడ్డాయి. లాక్డౌన్ వల్ల పనులు ఆగి ఉపాధి లేక వలస కూలీల్లో కొంతమందికి బియ్యం, ఆర్థిక సహాయం అందలేదు. తమ రాష్ట్రం వెళితే ఆర్థిక సహాయం, బియ్యం అందుకోవచ్చన్న ఉద్దేశంతో అనేకమంది వందల కిలోమీటర్ల కాలినడకన వెళుతున్నారు. ఇలా వెళ్లిన వారిని ఏపీ అధికారులు గుర్తించి క్వారంటైన్‌లో పెట్టారు.
ఎక్కువగా ఈ ప్రాంతాల్లో..
శ్రీకాకుళం జిల్లా నుంచి గతంలో అనేక రకాల చేతివృత్తుల వారు నగరానికి వచ్చి వివిధ ఉపాధి పనులు చేసుకుంటూ అద్దె ఇళ్లలో ఉంటున్నారు. మూసాపేట, భరత్‌నగర్‌లో 30వేల కుటుంబాలు, షాపూర్‌నగర్‌, సురారం, జీడిమెట్లలో 1, 000 కుటుంబాలు, ఈస్ట్‌ మారేడ్‌పల్లిలో 1,060, యూసఫ్‌గూడలో 2, 300, చర్లపల్లి, రామంతాపూర్‌, ఉప్పల్‌లో 1,300, కొంపల్లి, దూలపల్లి, సుచిత్రలో 1,500, శ్రీకాకుళం బస్తీ, జగద్గిరిగుట్ట, ఏ.బి.పురంలో 2,500, బౌరంపేటలో 1,500, నారపల్లిలో 1,050, బొల్లారం, మియాపూర్‌లో 1,200, ఎల్బీనగర్‌లో 350 కుటుంబాలు ఉన్నాయి.
కరోనా ప్రభావంతో బయట అడుగుపెట్టలేని పరిస్థితుల్లోతెలంగాణ ప్రభుత్వం కొంతమేరకు ఆదుకుంటున్నప్పటికీ చాలామంది కుటుంబాల్లో ఆకలి కేకలు వినిపిస్తున్నాయి. రేషన్‌కార్డులు లేవని, ఇతరత్రా కారణాలతో సహాయం అందలేదని వారు చెబుతున్నారు. సొంత జిల్లాకు వెళితే అప్పోసప్పో చేసి బతకొచ్చన్న ఉద్దేశంతో రోజూ వందలమంది ప్రయాణమవుతున్నారు.
ఇవీ చూడండి: సుజల దృశ్యం.. సీఎం కేసీఆర్‌తో సాక్షాత్కారం: కేటీఆర్
