'ప్రజాపాలన'లో అధికారుల అలసత్వం - ఆగ్రహానికి గురవుతున్న జనం

Praja Palana Applications Issue Telangana : ప్రభుత్వం ప్రతిష్ఠాత్మకంగా చేపట్టిన ప్రజాపాలన దరఖాస్తుల విషయంలో పలు ప్రాంతాల్లో అధికారుల నిర్లక్ష్యంతో ప్రజలు ఆగ్రహం వ్యక్తం చేస్తున్నారు. పథకం ప్రారంభించిన రెండో రోజు తెల్లవారుజామునే ఆయా కౌంటర్ల వద్ద ప్రజలు బారులు తీరారు. జగిత్యాల జిల్లా మెట్​పల్లిలో సమయానికి అధికారులు వార్డుల్లో లేకపోవడంతో గంటలపాటు వేచి చూడాల్సిన పరిస్థితి నెలకొంది. ఆలస్యంగా వచ్చిన అధికారుల చేతుల్లో దరఖాస్తు పత్రాలు లేకపోవడంతో అసహనంగా ప్రజలు వెనుదిరిగివెళ్లిపోయారు.

Praja Palana Applications Issue Telangana : రాష్ట్రవ్యాప్తంగా కాంగ్రెస్ సర్కార్ ప్రతిష్ఠాత్మకంగా చేపట్టిన గ్యారంటీల (Congress Six Guarantees) అభయ హస్త పథకం అధికారుల నిర్లక్ష్యంతో ప్రజల ఆగ్రహానికి గురవుతోంది. జగిత్యాల జిల్లా మెట్​పల్లి పురపాలక అధికారుల తీరుతో ప్రజలు అవస్థలు పడుతున్నారు. ప్రజాపాలన కార్యక్రమం ప్రారంభించిన రెండో రోజు తెల్లవారుజామునే ఆయా కౌంటర్ల వద్దకు ప్రజలు బారులు తీరారు. ఉదయం 8 గంటలకు రావాల్సిన అధికారులు పలు వార్డుల్లో ఆలస్యంగా రావడంతో ప్రజలకు ఎదురుచూపు తప్పలేదు. వచ్చిన అధికారులు తమ వెంట దరఖాస్తు పత్రాలు తీసుకురాకపోవడంతో నిరాశతో వెనుతిరిగారు.

Public Facing Abhaya Hastham Applications Issue : దరఖాస్తు పత్రాలు లేవని, పై అధికారులు ఇచ్చినప్పుడే వాటిని పంపిణీ చేస్తామని సంబంధిత అధికారులు ప్రజలకు తెలపడంతో వారు ఆగ్రహం వ్యక్తం చేశారు. దరఖాస్తు పత్రాలు లేకుంటే కౌంటర్​లో ఎందుకు కూర్చున్నారని ప్రశ్నించారు. ఈ విషయంపై పురపాలక కమిషనర్ జగదీశ్వర్ గౌడ్​ను వివరణ కోరగా తెచ్చిన దరఖాస్తు పత్రాలు పూర్తిగా అయిపోయాయని, జిరాక్స్​లు తీయిస్తున్నామని తొందర్లోనే ఆయా కౌంటర్ల వద్దకు అందిస్తామని తెలిపారు.

Praja Palana Program Issue Telangana : మరోవైపు రాష్ట్ర ప్రభుత్వం (Congress Government) అందించే ఆరు గ్యారెంటీలను ప్రజలకు చేరువ చేసేందుకు కృషి చేస్తున్నామని, జీహెచ్ఎంసీ (GHMC) అదనపు కమిషనర్ కిల్లు శివకుమార్ నాయుడు అన్నారు. ఆరు గ్యారంటీల పథకాలకు సంబంధించి దరఖాస్తు స్వీకరణ కార్యక్రమంలో భాగంగా, హిమాయత్​నగర్​ గాంధీ కుటీర్​లోని వార్డు కార్యాలయాన్ని టీపీసీసీ ఉపాధ్యక్షుడు వినోద్ కుమార్​రెడ్డితో కలిసి ఆయన సందర్శించారు. ఈ సందర్భంగా కిల్లు శివకుమార్ నాయుడు మాట్లాడారు. డిసెంబర్ 28 నుంచి జనవరి 6 వరకు తొలి దఫా ప్రజాపాలన కార్యక్రమం జరుగుతుందని తెలిపారు.

Praja Palana Telangana 2023 : ప్రతి నాలుగు నెలలకు ఒకసారి 8 రోజుల పాటు ఈ కార్యక్రమాన్ని నిర్వహిస్తామని పేర్కొన్నారు. ప్రజలు ఎవరు ఇబ్బందులకు గురికాకుండా ప్రతి వార్డు కార్యాలయంలో దరఖాస్తులు అందుబాటులో ఉంచుతున్నామని, ప్రజలకు ఏదైనా అనుమానాలు ఉంటే హెల్ప్ డెస్క్ సిబ్బంది పరిష్కరిస్తున్నారని వివరించారు. ఈ కార్యక్రమం నిరంతర ప్రక్రియ అని, నిజమైన లబ్ధిదారులకు పథకాలు వర్తిస్తాయని, దళారులను ఆశ్రయించి మోసపోవద్దని ఆయన సూచించారు. కొన్ని చోట్ల దరఖాస్తులు బ్లాక్​లో అమ్ముతున్నారని దృష్టికి వచ్చిందని అటువంటి వారిపై కఠిన చర్యలు తప్పవని హెచ్చరించారు. ఇదే వ్యవహారంలో ఇద్దరు, ముగ్గురిని పోలీసులకు కూడా అప్పజెప్పినట్లు తెలిపారు.