Police Crackdown on Drug Trafficking: హైదరాబాద్‌లో మత్తుపదార్థాల రవాణాకు అడ్డుకట్ట వేసేందుకు పోలీసులు కఠిన చర్యలు తీసుకుంటున్నారు. మూడు కమిషనరేట్ల సీపీలు స్వయంగా పర్యవేక్షిస్తున్నారు. మత్తుకు అలవాటుపడి విక్రేతలుగా మారిన వారి జాబితా సేకరిస్తున్నారు. మారుపేర్లతో తప్పించుకుంటున్న ప్రధాన సూత్రదారులను గుర్తించేందుకు సాంకేతిక పరిజ్ఞానం ఉపయోగిస్తున్నారు. నగరంలోని కొన్ని పబ్‌లు, బార్‌ అండ్‌ రెస్టారెంట్స్, వ్యాయామ కేంద్రాల్లో ఎనర్జీడ్రింక్స్, ప్రొటీన్స్‌ పేరుతో అక్కడికి వచ్చే వారికి మాదకద్రవ్యాల రుచి చూపుతున్నారా! అనే కోణంలోనూ ఆరా తీస్తున్నారు.
దొరికితే అంతే.. బంజారాహిల్స్, జూబ్లీహిల్స్, గచ్చిబౌలి, మాదాపూర్‌లోని కొన్ని వ్యాయామ కేంద్రాలపై ఆరోపణలు రావటంతో నిర్వాహకులను పోలీసులు హెచ్చరించినట్టు తెలుస్తోంది. అక్కడకు వచ్చే యువతీయువకుల వివరాలు, ఆధార్‌కార్డు నెంబర్లతో సహా రికార్డులో నమోదు చేయాలని సూచించినట్టు సమాచారం. పట్టుబడిన వారి సెల్‌ఫోన్ల నుంచి విక్రేతలు, వినియోగదారుల సమాచారం రాబట్టి హెచ్చరిస్తున్నారు. డ్రగ్స్ వినియోగిస్తూ దొరికితే ఉద్యోగం ఊడటమే గాకుండా జైలు ఊచలు లెక్కపెట్టాల్సి ఉంటుందని ఘాటుగానే హెచ్చరిస్తున్నారు.
విద్యార్థులు, ఐటీ ఉద్యోగులే అధికం: మాదకద్రవ్యాల కట్టడి పోలీసులకు సవాల్‌గా మారింది. నిత్యం తనిఖీల్లో ఏదోచోట మత్తుపదార్థాలతో సంబంధమున్న వ్యక్తులు పట్టుబడుతున్నారు. హైదరాబాద్, సైబరాబాద్, రాచకొండ పోలీసు కమిషనరేట్‌ పరిధిలో కేవలం 3 నెలల వ్యవధిలో 500 మందికిపైగా అరెస్టయ్యారు. వారి వద్ద గంజాయి, కొకైన్, హెరాయిన్, నల్లమందు, ఎల్‌ఎస్‌డీ బ్లాట్స్, హాష్‌ ఆయిల్‌ కొనుగోలు చేసిన చిట్టాలో విద్యార్థులు, నిరుద్యోగులు, ఐటీ, కార్పొరేట్‌ సంస్థల్లో పనిచేస్తున్న ఉద్యోగులే అధికంగా ఉన్నారని పోలీసులు గుర్తించారు.
కఠినంగా వ్యవహరిస్తున్న పోలీసులు: మత్తులో తూలుతున్న ఐటీ నిపుణులను దారికి తీసుకొచ్చేందుకు పోలీసులు కఠినంగా వ్యవహరిస్తున్నారు. ఇప్పటివరకు పట్టుబడిన బాధితుల్లో సుమారు 100 మంది ఐటీ నిపుణులున్నట్టు తెలిపారు. వారి వివరాలను కంపెనీలకు పంపేందుకు సిద్ధమవుతున్నారు. తాజాగా 15మంది వివరాలు వారి హెచ్ఆర్ విభాగానికి పంపినట్టు తెలుస్తోంది. మత్తు వలలో చిక్కుకున్న విద్యార్థుల సమాచారాన్ని తల్లిదండ్రులకు పంపుతున్నారు. వారికి తగిన కౌన్సెలింగ్ ఇప్పించాలని సూచిస్తున్నారు.
ఇదీ చదవండి: ఆన్లైన్ విచారణలో రాసలీలలు.. లాయర్కు రూ.4లక్షలు ఫైన్
