Pawan Kalyan fires on YCP over Ippatam incident: ఇప్పటం గ్రామంలో జనసేన అభిమానుల గడపలు కూల్చిన వైసీపీ సర్కారు గడప తాను కూలుస్తానని పవన్ కల్యాణ్ అన్నారు. ఇప్పటంలో బాధితులకు పవన్ కల్యాణ్ సాయం అందించారు. 2024లో రాజకీయాలు మారాలని ఆకాంక్షించారు. 2024లో వైసీపీ నేతలు ఎలా గెలుస్తారో చూస్తానన్నారు. వైసీపీ నేతలది ఆధిపత్య అహంకారమని దుయ్యబట్టారు. వారిలా తాను కోడికత్తులతో డ్రామాలు ఆడలేనని విమర్శించారు.
‘‘వైసీపీ రాజకీయ పార్టీనా? ఉగ్రవాద సంస్థా? మా వాళ్లను బెదిరిస్తారా? మాకు ఎవరూ అండగా ఉండకూడదా? రాజకీయం మీరే చేయాలా? మేం చేయలేమా? చేసి చూపిస్తాం.. ఫ్యూడలిస్టిక్‌ కోటలు బద్దలు కొట్టి తీరుతాం’’ అని జనసేన అధినేత పవన్ కల్యాణ్ అన్నారు. ఎవరికి అన్యాయం జరిగినా స్పందిస్తామని.. తమకు ఓట్లు వేసినా, వేయకపోయినా అండగా ఉంటానని చెప్పారు. మంగళగిరిలోని జనసేన పార్టీ కార్యాలయంలో ఇప్పటం ఇళ్ల కూల్చివేత బాధితులతో ఆయన సమావేశమయ్యారు. బాధితులకు రూ.లక్ష చొప్పున పవన్ ఆర్థిక సాయం అందజేశారు.
"2014 తర్వాత ప్రధానిని మూడు, నాలుగు సందర్భాల్లో కలిశాను. నేనేం మాట్లాడానో చెప్పాలని ప్రభుత్వ సలహాదారు సజ్జల అడుగుతున్నారు. నా దగ్గరకు రండి.. మీ చెవిలో చెప్తా. నేనెప్పుడు మాట్లాడినా దేశభద్రత, సగటు మనిషి రక్షణే కోరుకుంటా. నేను మీలా దిల్లీ వెళ్లి చాడీలు చెప్పను. వైకాపాను దెబ్బకొట్టాలంటే ప్రధానికి చెప్పి చేయను.. నేనే చేస్తా. ఇది నా నేల.. ఈ నేలలోనే పుట్టినోడిని.. ఆంధ్రుడిని.. ఆంధ్రలోనే తేల్చుకుంటా. నా యుద్ధం నేనే చేస్తా. ఇప్పటం గ్రామానికి సమస్య వస్తే దిల్లీ వెళ్లి అడగను. మేమే తేల్చుకుంటాం. అధికారం లేనోడిని.. నామీద పడి ఏడుస్తారేంటి? ఛాలెంజ్‌ విసురుతున్నా.. ఈసారి మీరు ఎలా గెలుస్తారో చూస్తా.’’ -పవన్ కల్యాణ్, జనసేన అధినేత
మాది రౌడీసేన కాదు.. విప్లవసేన: యువత కోసం ఆలోచించే నేతలు పాలకులుగా రావాలని పవన్కల్యాణ్ ఆకాంక్షించారు. తమది రౌడీ సేన కాదని.. విప్లవసేన అని వ్యాఖ్యానించారు. ఇంతగా అభిమాన బలం ఉన్న నన్నే ఇన్ని ఇబ్బందులకు గురిచేస్తే సామాన్యుల పరిస్థితి ఏంటని ప్రశ్నించారు. ఇప్పటంలో గ్రామస్థుల గడపలు కూల్చడాన్ని తాను మర్చిపోనన్నారు. అక్కడ కూల్చిన ప్రతిదీ తన గుండెపై కొట్టినట్లే అనిపించిందని చెప్పారు. దేశం, రాష్ట్రంలో లంచాలు లేని వ్యవస్థే లక్ష్యమని.. తన కంఠంలో ప్రాణం ఉన్నంత వరకు దానికోసం పోరాడతానన్నారు. మీ తాటాకు చప్పుళ్లకు భయపడనని జనసేన అధినేత పవన్ కల్యాణ్ చెప్పారు.
‘‘కులాలను ఎప్పుడూ నేను ద్వేషించను. నేనెప్పుడు మాట్లాడినా నా కులంలో పుట్టిన నేతలతో తిట్టిస్తారు. ఎలాంటి వికృతభావం లేకపోతే వాళ్లతోనే ఎందుకు తిట్టిస్తారు? విభజించి పాలిచిన బ్రిటిష్‌వారు దేశం నుంచి వెళ్లిపోయినా ఆ గుణగణాలు వీరిలో ఉన్నాయి. ఆ పరిస్థితి మారాలి. కులాలన్నీ దేహీ అనే ధోరణి నుంచి బయటకు రావాలి." -జనసేన అధినేత
ఇవీ చదవండి:
