increase GSDP Plan of Telangana: రాష్ట్ర స్థూల జాతీయోత్పత్తిలో వృద్ధిరేటు సానుకూలంగా ఉండటంతో.. మరింతగా పెంచుకోవడంపై ప్రభుత్వం దృష్టిసారించింది. ఉన్న అవకాశాలను మరింతగా సద్వినియోగం చేసుకోవడం ద్వారా జీఎస్డీపీని ఇంకా పెంచుకోవాలన్నది సర్కార్ ఆలోచన. 2013-14లో రాష్ట్ర జీఎస్డీపీ రూ. 4 లక్షల 51వేల 580 కోట్లుకాగా.. 2021-22 నాటికి రూ. 11 లక్షల54 లక్షల 860 కోట్లకు చేరింది. 2015-16 నుంచి రాష్ట్ర జీఎస్డీపీ వృద్ధిరేటు జాతీయ సగటుకంటే అధికంగా నమోదవుతోంది.
ఈ తరుణంలో రాష్ట్రంలోని సానుకూలఅంశాలు, పరిస్థితులదృష్ట్యా జీఎస్డీపీ ఇంకా పెరిగే అవకాశాలున్నాయని భావిస్తున్నారు. ప్రభుత్వవిధానాలు.. వివిధ వర్గాలకు అమలు చేస్తున్న కార్యక్రమాలు, అనుకూలపరిస్థితులు.. ఇందుకు దోహదం చేస్తాయని అంటున్నారు. అందులో భాగంగా.. ఆయా రంగాల్లో ప్రస్తుతం ఉన్న విధానాలు సమీక్షించుకొని ముందుకెళ్లడం సహా అవసరమైన మార్పులు చేయడం ద్వారా మరింత వృద్ధిచెందడంపై సర్కార్ దృష్టిపెట్టింది.
ఈ మేరకు వివిధరంగాలపై ప్రభుత్వ ప్రధాన కార్యదర్శి సోమేష్ కుమార్ ఉన్నతస్థాయి సమావేశాలు నిర్వహిస్తున్నారు. ఐఏఎస్లతో పాటు సంబంధిత శాఖల అధికారులు, అనుభవజ్ఞులతో మేధోమథనం నిర్వహిస్తున్నారు. కీలకమైన వ్యవసాయం, అనుబంధరంగాలతోపాటు పారిశ్రామిక, ఐటీ రంగాలపై ఇప్పటికే సమావేశాలు ముగిశాయి. వ్యవసాయం, అనుబంధ రంగాల ద్వారా అధిక వృద్ధి, మరింత ఉపాధి కల్పనతో పాటు ప్రైవేట్ పెట్టుబడులకు దోహదపడేలా విధానాల్లో చేయాల్సిన మార్పులపై చర్చించారు.
అధిక ఉత్పాదకతేలక్ష్యంగా విధాన పరమార్పులపై దృష్టిసారించాలని అధికారులకు సూచించారు. పంటలఉత్పాదకత పెంపు, ఉద్యాన రంగం బలోపేతం, పంటకోత తర్వాత మెరుగైన నిర్వహణ, వ్యవసాయ యాంత్రీకరణ, పరిశోధన, విస్తరణ ద్వారా వృద్ధిని వేగవంతం చేసెందుకు కొన్నివ్యూహాలు అమలు చేయనున్నట్లు వ్యవసాయశాఖ తెలిపింది. పారిశ్రామిక, ఐటీ రంగాల్లో ఉన్న సానుకూలత దృష్ట్యా ప్రైవేట్ రంగంలో మరిన్ని పెట్టుబడులు, ఉద్యోగాల కల్పనపై సమీక్షించారు.
సరళతర వాణిజ్యం, జీవన ప్రమాణాలు మెరుగుదల ధ్యేయంగా తీసుకోవాల్సిన చర్యలపై చర్చించారు. ఫర్నీచర్, బొమ్మల తయారీ.. డిజిటల్‌ ఎంటర్‌టైన్‌మెంట్, గ్రీన్‌హైడ్రోజన్‌ను ప్రాధాన్యతారంగాలుగా దృష్టి సారిస్తున్నట్లు తెలిపింది. ఇదే తరహాలో మిగతా అన్ని రంగాలకు సంబంధించి కసరత్తు చేయనున్నారు. ఆయా శాఖల ప్రతిపాదనలు, వ్యూహాలపై విస్తృత స్థాయిలో చర్చిస్తారు. మెరుగైన ఫలితాల కోసం చేపట్టాల్సిన చర్యలు, తీసుకురావాల్సిన విధానపర మార్పులపై కసరత్తు చేస్తారు. అందుకు అనుగుణంగా ఆయా శాఖల్లో మార్పులు తీసుకురావడంతో పాటు సంస్కరణలు అమలు చేస్తారు.
ఇవీ చదవండి:
