దిశ నిందితుల ఎన్కౌంటర్పై స్పందించిన జాతీయ మానవ హక్కుల సంఘం ఓ బృందాన్ని హైదరాబాద్కు పంపింది. ఈ నెల 7న నగరానికి వచ్చిన బృందం నాలుగు రోజుల పాటు ఘటనపై అన్ని వివరాలు సేకరించింది. మొదటి రోజు ఎన్కౌంటర్ జరిగిన స్థలాన్ని పరిశీలించిన బృందం... దిశ హత్య చేయబడ్డ తొండుపల్లి టోల్ గేట్, చటాన్పల్లిలో ఆమెను కాల్చిన అండర్పాస్ ప్రాంతాన్ని పరిశీలించింది. అనంతరం ఎన్కౌంటర్ తర్వాత మహబూబ్నగర్ ప్రభుత్వ ఆస్పత్రితో ఉన్న నలుగురి నిందితుల మృతదేహాలను పరిశీలించింది. ఆ తర్వాత మూడు రోజులు తెలంగాణ పోలీస్ అకాడమీలో ప్రత్యేక బ్లాక్ నుంచి విచారణ సాగించింది.
ఎన్కౌంటర్పై అనుమానాలున్నాయా?
రెండవ రోజు నిందితులు కుటుంబ సభ్యుల్లో... కుటుంబానికి ఒక్కరిని చొప్పున అకాడమీలో రహస్యంగా విచారించింది. ఈ విచారణలో ఎన్కౌంటర్పై వారికి ఉన్న అనుమానాలు అడిగి తెలుసుకున్నారు. అంతే కాకుండా తమ వారితో కనీసం ఒక్కసారి కూడా మాట్లాడనివ్వకుండా కనీసం చూపించకుండా పోలీసులు చంపేశారనే విషయాన్ని మానవహక్కుల సంఘం దృష్టికి తీసుకువెళ్లారు. అనంతరం దిశ కుటుంబ సభ్యులైన తండ్రి, సోదరిలను కూడా బృందం విచారించింది. ఘటన జరగక ముందు ఉన్న పరిణామాలపై వారికి ఉన్న అనుమానాలపై ఆరా తీసింది.
పోలీసులను ప్రశ్నించిన ఎన్హెచ్ఆర్సీ
మూడో రోజు నిందితుల ఎన్కౌంటర్ సమయంలో ఎదురు దాడిలో గాయపడిన నందిగామ ఎస్సై వెంకటేశ్వర్లు, కానిస్టేబుళ్లను విచారించింది. గచ్చిబౌలిలోని కేర్ ఆస్పత్రిలో చికిత్స పొందుతున్న వారిని స్వయంగా వెళ్లి ఎన్కౌంటర్ జరిగిన విధానం, వారు గాయపడిన అంశాలపై సూటిగా ప్రశ్నలు వేసి వివరాలు సేకరించింది. నాలుగో రోజు ఎన్కౌంటర్లో పాల్గొన్న పోలీసు అధికారులను ఎన్హెచ్ఆర్సీ బృందం... అందుకు దారితీసిన పరిణామాలపై ఆరా తీసింది. కిడ్నాప్, అత్యాచారం, హత్య, కాల్చివేతకు సంబంధించి ఫోరెన్సిక్ ఆధారాలతో నివేదికను సైబరాబాద్ పోలీసుల బృందం ఎన్‌హెచ్‌ఆర్సీకి అందజేశారు. ఘటనాస్థలంలో దొరికిన రక్తం మరకలు, లారీ క్యాబిన్లో దొరికిన రక్తం మరకల నివేదికలను, లారీ తిరిగిన సీసీ ఫుటేజీని ఎన్హెచ్ఆర్సీ బృందానికి ఇచ్చారు. అంతే కాకుండా కొత్తూరు సమీపంలో పెట్రోల్ కొనుగోలు చేసిన నిందితుల సీసీటీవీ ఫుటేజ్ తో పాటుగా అన్ని నివేదికలను ఆధారాలతో సహా సమర్పించారు.
నాలుగు రోజుల పాటు విచారించిన ఎన్హెచ్ఆర్సీ బృందం
దీనిపై షాద్‌నగర్, శంషాబాద్ పోలీసులను కూడా జాతీయ మానవహక్కుల కమిషన్‌ సభ్యులు విచారించారు. వీరితో పాటు ఆ రోజు నిందితులు పెట్రోల్ పోయించుకున్న బంకులో పని చేస్తున్న సర్వీస్మెన్ ప్రవీణ్ని పోలీస్ అకాడమీకి పిలిచి విచారించింది. పోలీసులు ఇచ్చిన ఆధారాలు, ఫోరెన్సిక్ నివేదికను కూలంకషంగా పరిశీలించిన బృందం... ఘటనకు ముందు, తర్వాత పోలీసులు సేకరించిన సీసీటీవీ ఫుటేజ్ను పరిశీలించింది. చెన్నకేశవులు భార్య తన భర్తే ఈ దారుణానికి పాల్పడినట్టు సాక్ష్యాలు ఏంటని ప్రశ్నించడంతో దీనిపై పోలీసులను బృందం వివరణ కోరింది. నాలుగు రోజులపాటు చేసిన విచారణలో ఎన్హెచ్ఆర్సీ బృందం దాదాపు అన్ని అంశాలపై ఓ నివేదిక తయారు చేస్తున్నట్లు సమాచారం. రేపు కూడా ఎన్హెచ్ఆర్సీ బృందం హైదరాబాద్‌లోనే ఉండే అవకాశం ఉంది. మరో వైపు నిందితుల ఎదురుదాడిలో గాయపడి గచ్చి బౌలి కేర్ ఆస్పత్రిలో చికిత్స పొందుతున్న పోలీసులు పూర్తిగా కోలుకున్నట్లు సమాచారం.
దిల్లీకి వెళ్లిన సజ్జనార్..
దిశ ఘటనలో నిందితుల ఎన్కౌంటర్పై రేపు సుప్రీంకోర్టులో విచారణ ఉన్నందున సైబరాబాద్ సీపీ సజ్జనార్ దిల్లీకి వెళ్ళారు. ఘటనపై పూర్తి వివరాలను అడ్వకేట్లకు వివరించారు. మరో వైపు ఇక్కడ సేకరించిన అన్ని ఆధారాల నివేదికను ఎన్హెచ్ఆర్సీ బృందం దిల్లీకి పంపే అవకాశం ఉంది.
ఇవీ చూడండి: నాలుగో రోజు ముగిసిన ఎన్హెచ్ఆర్సీ విచారణ...
