Nampally Court Allows One Day Custody Of Drug Smuggler Mohit: మాదక ద్రవ్యాల కేసులో పట్టుబడిన మోహిత్ను ఒక రోజు కస్టడీకి నాంపల్లి కోర్టు అనుమతించింది. దీంతో రాంగోపాల్ పేట్ పోలీసులు మోహిత్ను రేపు ఉదయం 10గంటలకు కస్టడీలోకి తీసుకొని.. సాయంత్రం 5 గంటల వరకు ప్రశ్నించనున్నారు. మోహిత్కు దాదాపు 50మంది ప్రముఖులతో పరిచయాలున్నట్లు నార్కోటిక్ విభాగం పోలీసులు అనుమానిస్తున్నారు. ఈ మేరకు మోహిత్ సెల్ఫోన్లో ఉన్న కాంటాక్ట్ లిస్ట్ను సేకరించారు. మోహిత్ను ప్రశ్నించడం ద్వారా వాళ్లతో అతనికి ఉన్న సంబంధాల గురించి తెలుసుకోవాలని పోలీసులు ప్రయత్నిస్తున్నారు.
బాలీవుడ్ నటి నేహ భర్త అయిన మోహిత్ ఇంటర్నేషనల్ డీజే నిర్వాహకుడిగా కూడా పని చేస్తున్నాడు. ఈ క్రమంలో హైదరాబాద్లోని పలు పబ్బులలో పార్టీలు ఏర్పాటు చేసి మాదక ద్రవ్యాలు సరఫరా చేస్తున్నట్లు పోలీసులు అనుమానిస్తున్నారు. గతేడాది నవంబర్లో గోవా మాదక ద్రవ్యాల స్మగ్లర్ ఎడ్విన్ను అరెస్ట్ చేసినప్పుడు మోహిత్ బండారం బయటపడింది. ఎడ్విన్ ద్వారా మాదక ద్రవ్యాలు కొనుగోలు చేసిన మోహిత్ వాటిని పబ్బులలో సరఫరా చేసినట్లు నార్కోటిక్ విభాగం పోలీసులు ఆరోపిస్తున్నారు.
కృష్ణ కిశోర్కు బెయిల్ మంజూరు: మోహిత్ను ప్రశ్నించడం ద్వారా ఈ కేసులో పురోగతి వచ్చే అవకాశం ఉందని పోలీసులు భావిస్తున్నారు. మోహిత్తో పాటు పోలీసులకు దొరికిపోయిన స్థిరాస్తి వ్యాపారి కృష్ణ కిశోర్కు కోర్టు బెయిల్ మంజూరు చేసింది. కృష్ణ కిశోర్ గోవా, ముంబయి, బెంగళూర్ నుంచి మాదక ద్రవ్యాలను తెప్పించుకొని వినియోగిస్తున్నట్లు పోలీసుల దర్యాప్తులో తేలింది. నాంపల్లి కోర్టు షరతులతో కూడిన బెయిల్ మంజూరు చేయడంతో కృష్ణ కిశోర్ చంచల్ గూడ జైలు నుంచి బయటికి రానున్నారు.
అసలు మోహిత్ ఎలా దొరికాడు: రాంగోపాల్పేట్ పీఎస్‌ పరిధిలో నవంబర్ 11 నమోదైన కేసు ఆధారంగా దర్యాప్తు చేస్తున్న పోలీసులకు గర్వ్ హరీశ్ బెలనీ అనే వ్యక్తి 4.5 గ్రాముల ఎండీఎంఏతో దొరికాడు. పోలీసులు అతడిని అరెస్ట్ చేసి విచారించిగా గోవా డ్రగ్ డాన్ ఎడ్విన్ న్యూన్స్, బాల మురుగన్ పేర్లు బయటకు వచ్చాయి. పక్కా ప్రణాళికతో వీరిని గోవాలో నార్కోటిక్స్ వింగ్ పోలీసులు అరెస్ట్ చేసి.. వారి నుంచి సేకరించిన సమాచారంతో మరో నిందితుడు మోహిత్ అగర్వాల్ అలియాస్ మైరాన్ మోహిత్పై నిఘా పెట్టి.. అరెస్టు చేశారు.
డ్రగ్స్ సరఫరాదారులతో మోహిత్కు లింకులు: మోహిత్ డీజే ఈవెంట్లు నిర్వహించి మత్తు పదార్థాలు సరఫరా చేసేవాడు. ఇతనిపై గోవాలో ప్రత్యేక బృందం 10రోజులుగా రిక్కీ నిర్వహించింది. అందినట్లే అంది తృటిలో తప్పించుకున్నాడు. ఇంతలోనే కొత్త సంవత్సరం ప్రారంభం కావడంతో స్మగ్లర్ మోహిత్ హైదరాబాద్ వచ్చినట్లు పోలీసులు.. ఆఖరికి జూబ్లీహిల్స్‌లోని ఓ పబ్‌ సమీపంలో అదుపులోకి తీసుకున్నారు. అతని సెల్ఫోన్ స్వాధీనం చేసుకున్న పోలీసులు.. 50మందికి పైగా సరఫరాదార్లతో మోహిత్కు లింకులు ఉన్నట్లు గుర్తించారు.
ఇవీ చదవండి:
