రంగారెడ్డి, హైదరాబాద్, మహబూబ్నగర్ పట్టభద్రుల ఎమ్మెల్సీ ఎన్నికల ప్రచారంలో భాగంగా మేడ్చల్ జిల్లాలోని కుత్బుల్లాపూర్లో కాంగ్రెస్ కార్యకర్తల సమావేశం నిర్వహించారు. ఈ కార్యక్రమానికి ఎంపీ రేవంత్ రెడ్డి, కాంగ్రెస్ ఎమ్మెల్సీ అభ్యర్థి చిన్నారెడ్డి హాజరయ్యారు. సంవత్సరానికి రెండు కోట్ల ఉద్యోగాలు ఇస్తామన్న మోదీ, ఇంటికో ఉద్యోగం ఇస్తామన్న కేసీఆర్ వాటిని నెరవేర్చడంలో సఫలం కాలేదని రేవంత్ ఆరోపించారు. తెలంగాణలో నీళ్లు ఏపీ సీఎం జగన్కు, నియామకాలు ఆయన కుటుంబానికి, నిధులన్ని ఆయన బంధువులకు ఇచ్చారని వ్యాఖ్యానించారు.
పునర్‌విభజన చట్టం ప్రకారం తెలంగాణకు ఇచ్చిన హామీలను రాబట్టేందుకు తెరాస కలిసి రావాలని కాంగ్రెస్ పార్టీ కార్యనిర్వాహక అధ్యక్షుడు రేవంత్‌రెడ్డి పిలుపునిచ్చారు. జంతర్‌మంతర్‌ వద్ద దీక్షకు దిగుదామని మంత్రి కేటీఆర్కు సవాల్‌ విసిరారు. కాంగ్రెస్ పార్టీ తెలంగాణకు హామీలు ఇస్తే.. భాజపా విస్మరించినా పోరాడేందుకు తెరాస భయపడుతోందని రేవంత్ ఎద్దేవా చేశారు. హైదరాబాద్ పట్టభద్రుల ఎన్నికల్లో చిన్నారెడ్డిని గెలిపిస్తే నిరుద్యోగుల వాణిని మండలిలో వినిపిస్తారని విజ్ఞప్తి చేశారు.
ఇదీ చూడండి: 'బాబ్లీ కోసం పోరాడినట్లే కోచ్ ఫ్యాక్టరీ కోసం పోరాడతాం'
