ఆంధ్రప్రదేశ్లోని నరసాపురం ఎంపీ రఘురామకృష్ణ రాజుపై ఏపీ సీఐడీ పోలీసులు థర్డ్ డిగ్రీ ప్రయోగించడాన్ని భాజపా రాష్ట్ర అధ్యక్షుడు బండి సంజయ్ తీవ్రంగా ఖండించారు. గౌరవ పార్లమెంట్ సభ్యుడిని లోక్సభ స్పీకర్ అనుమతి లేకుండా అరెస్టు చేయడానికి అనుమతి ఉండదు అలాంటిది అరికాళ్లు కందిపోయేలా కొట్టడం దారుణమన్నారు. ఎంపీ కాళ్ల గాయాలు చూస్తుంటే ఆయనను ఏపీ సీఐడీ పోలీసులు చాలా దుర్మారంగా కొట్టారని స్పష్టం అవుతోందని విమర్శించారు. సామాన్య పౌరులను కొట్టడానికే పోలీసులకు అధికారం ఉండదని... ఎంపీపై అత్యంత క్రూరంగా ప్రవర్తిస్తారా? అని ప్రశ్నించారు.
చట్టాన్ని చేతుల్లోకి తీసుకుంటారా?
ఏపీలో ప్రజాస్వామ్యం ఉందా? నియంతృత్వం కొనసాగుతుందా? అని మండిపడ్డారు. కేసు నిరూపించగలిగితే కోర్టు శిక్షవేస్తుందని... కానీ చట్టాన్ని చేతులోకి తీసుకొని ఎంపీపై విచక్షణా రహితంగా దాడి చేస్తారా అని ప్రశ్నించారు. కొందరి మెప్పుకోసం పోలీసులు ఎంపీపై అత్యంత కూర్రంగా వ్యవహరించినట్లు స్పష్టం అవుతోందని... అందరూ చట్టం పరిధిలోనే వ్యవహరించాల్సి ఉంటుందని ఆగ్రహం వ్యక్తం చేశారు. రాజకీయ నాయకులు, పాలకులు శాశ్వతం కాదని పోలీసులు గుర్తించుకోవాలని హితవు పలికారు. ఏంపీల హక్కులకు భంగం వాటిల్లితే పార్లమెంటరీ ప్రివిలేజ్ కమిటీ ఉంటుందన్న విషయాన్ని మరిచిపోవద్దన్నారు.
ప్రాణాలకే ప్రమాదం!
ఎంపీపై దాడిచేసిన పోలీసు అధికారులు చట్టపరమైన చర్యల నుంచి తప్పించుకోలేరన్నారు. నాలుగు నెలల కిందట హార్ట్ సర్జరీ చేసుకున్న వ్యక్తిపై థర్డ్ డిగ్రీ ప్రయోగిస్తారా అని ప్రశ్నించారు. ఒకవైపు కరోనా వ్యాప్తి తీవ్రంగా ఉందని... ఈ సమయంలో ఎంపీ రఘురామకృష్ణరాజును అరెస్టు చేయడం సరికాదని అన్నారు. ఆయనపై థర్డ్ డిగ్రీ ప్రయోగించడం చూస్తుంటే ఆయన ప్రాణాలకే ప్రమాదం ఉందన్న అనుమానం కలుగుతోందన్నారు. ప్రభుత్వానికి వ్యతిరేకంగా రాసే పత్రికలపై కేసులు బనాయించడాన్ని తీవ్రంగా ఖండిస్తున్నట్లు... ప్రజాస్వామ్యానికి నాలుగో స్తంభమైనా మీడియాను నియంత్రించడం నియంతృత్వానికి నిదర్శమని బండి సంజయ్ అన్నారు.
ఇదీ చదవండి: బ్లాక్‌ఫంగస్‌ కేసుల తీవ్రత దృష్ట్యా అప్రమత్తమైన ప్రభుత్వం
