హైదరాబాద్లో ఉన్న పబ్లన్నీ దాదాపు జూబ్లీహిల్స్, బంజారాహిల్స్ ప్రాంతాల్లోనే ఉన్నాయి. ఈ పబ్ల వల్ల ఆ ప్రాంతం మీదుగా రాకపోకలు సాగించే వాళ్లు ఇబ్బందులు ఎదుర్కొంటున్నారు. సాయంత్రం 7 గంటల నుంచి అర్ధరాత్రి వరకు ఈ ప్రాంతంలో మద్యం బాబుల హంగామా ఉంటుంది. బడి, గుడికి దూరంగా వీటిని ఏర్పాటు చేయాల్సి ఉంది. కానీ జూబ్లీహిల్స్ లోని పెద్దమ్మ గుడి సమీపంలోనే ఓ పబ్ ఏర్పాటు చేశారు.
అనుమతి లేకున్నా!
ప్రముఖులు నివాసం ఉండే ఈ ప్రాంతాల్లో పబ్ల ఏర్పాటు విషయంలో ఏమాత్రం జాగ్రత్తలు తీసుకోవడం లేదు. బార్ల పేరుతో అనుమతి తీసుకొని పబ్లు నిర్వహిస్తున్నట్లు విమర్శలున్నాయి. చాలా పబ్లకు జీహెచ్ఎంసీ అనుమతి కూడా లేదు. పబ్ నిర్వాహకులు సైతం పార్టీల పేరుతో వేలల్లో డబ్బులు గుంజుతున్నారు. ఇటీవలి ఓ పబ్లోడబ్బు చెల్లింపుల విషయంలో తలెత్తిన చిన్నపాటి వివాదం... దాడికి దారి తీసింది. యువకులు పోలీసులకు ఫిర్యాదు చేయగా... బౌన్సర్ల ఆగడాలపై పశ్చిమ మండల డీసీపీ ప్రత్యేక దృష్టి సారించారు.
పట్టించుకోరా!
పబ్లలో హుక్కా విక్రయం, మైనర్ల ప్రవేశం, చెవులు చిల్లులు పడేలా శబ్దం, అశ్లీల నృత్యాలు సర్వ సాధారణం. ఓ పబ్లో నృత్యం చేసే ఓ మహిళ.... తనను వ్యభిచారం చేయాలని ఒత్తిడి చేస్తున్నారని నిర్వాహకులపై ఫిర్యాదు చేసింది. ఇలా పాశ్చాత్య సంస్కృతి పేరుతో పబ్లలో ఇష్టారీతిన వ్యవహరిస్తున్నా పట్టించుకునే వాళ్లేలేరు.
చర్యలు తీసుకోండి...
పబ్బుల వద్ద ఘర్షణలు, బౌన్సర్ల దాడులు, బాధితుల ఫిర్యాదులు వచ్చినప్పుడు మాత్రమే సంబంధిత అధికారులు వాటిపై దృష్టి సారిస్తున్నారు. ఆ తర్వాత పట్టించుకోవడం లేదు. ఇప్పటికైనా నిబంధనలకు విరుద్ధంగా నడుస్తున్న పబ్బులపై చర్యలు తీసుకోవాలని నగరవాసులు కోరుతున్నారు.
- ఇదీ చూడండి : నేటి నుంచి ఎంబీబీఎస్, బీడీఎస్ వెబ్ కౌన్సెలింగ్
