Money Seizures in Telangana During Election Code 2023 : కేంద్ర ఎన్నికల సంఘం ఆదేశాలు, హెచ్చరికలు, అధికారుల చర్యలతో శాసనసభ ఎన్నికల వేళ భారీగా నగదు, మద్యం, ఆభరణాలు, ఇతర వస్తువులు పట్టుబడుతున్నాయి. ఎన్నికల్లో ప్రలోభాలు కట్టడి చేయాలన్న ప్రధాన ఉద్దేశంతో ఉన్న ఈసీ.. పదే పదే ఆ విషయమై అధికారులను హెచ్చరించింది. గత అనుభవాల నేపథ్యంలో అధికారుల వ్యవహార శైలి, పనితీరు పట్ల అసంతృప్తి వ్యక్తం చేసిన సీఈసీ.. పని చేయకపోతే పని చేయిస్తామంటూ ఘాటుగా వ్యాఖ్యానించారు. పదే పదే కర్ణాటక, గుజరాత్ సహా ఇతర రాష్ట్రాల్లో ఎన్నికలను ప్రధానంగా ప్రస్తావిస్తూ వచ్చారు.
Telangana Assembly Elections 2023 : ఎన్నికల సందర్భంగా అక్కడ స్వాధీనం చేసుకున్న నగదు, మద్యం, ఆభరణాలు, కానుకలు పెద్ద మొత్తంలో పెరిగాయని.. తెలంగాణలో ఎందుకు జరగడం లేదని ప్రశ్నించారు. వివిధ అంశాలను దృష్టిలో పెట్టుకొని పలువురు ఐఏఎస్, ఐపీఎస్, ఇతర అధికారులను ఈసీ బదిలీ చేసింది. కేంద్ర ఎన్నికల సంఘం ఖచ్చితమైన ఆదేశాలతో అధికారులు విస్తృతంగా తనిఖీలు చేపట్టారు. ఎన్నికల షెడ్యూల్ కంటే ముందే తనిఖీలు ప్రారంభించారు. సరిహద్దుల్లో 148 చెక్ పోస్టులు ఏర్పాటు చేశారు. ఈ నెల తొమ్మిదో తేదీన ఎన్నికల ప్రకటన వెలువడిన వెంటనే ఎక్కడికక్కడ తనిఖీలు ముమ్మరం చేశారు. సరైన వివరాలు లేని నగదు, ఆభరణాలతో పాటు అక్రమంగా సరఫరా చేస్తున్న మద్యం, కానుకలు, గంజాయిని స్వాధీనం చేసుకుంటున్నారు.
Police Impose Election Code Strictly in Telangana : భారీ ఎత్తున నోట్ల కట్టలు, బంగారు, వెండి ఆభరణాలు, మద్యం పట్టుబడుతోంది. స్వాధీనం అయిన సొత్తు మొత్తం ఇప్పటికే గత ఎన్నికలను అధిగమించింది. ఈ నెల తొమ్మిదో తేదీ నుంచి స్వాధీనం చేసుకున్న మొత్తం నగదు రూ.77 కోట్ల 87 లక్షలు. అక్రమ సరఫరా ద్వారా పట్టుబడిన మద్యం 59,091 లీటర్లు. 18,088 కిలోల నల్ల బెల్లం, 614 కిలోల ఆలం కాగా.. వాటి విలువ రూ.8.99 కోట్లు. రూ.7.55 కోట్ల విలువైన 2,320 కిలోల గంజాయి పట్టుబడింది. సరైన ఆధారాలు, పత్రాలు, వివరాలు లేని 72 కిలోల బంగారు, 429 కిలోల వెండి, 42 క్యారట్ల వజ్రాలు, ఆభరణాలు స్వాధీనం చేసుకున్నారు. వాటి విలువ రూ.62 కోట్ల 73 లక్షలకు పైగా ఉంది. వీటితో పాటు రూ.8.64 కోట్ల విలువైన ల్యాప్‌టాప్లు, వాహనాలు, కుక్కర్లు, చీరలు, క్రీడా సామగ్రి, బియ్యం మొదలైన వస్తువులు పటుబడ్డాయి.
నగదు, అన్ని వస్తువులు కలిపితే ఇప్పటి వరకు స్వాధీనం అయిన మొత్తం సొత్తు విలువ రూ.165 కోట్ల 81 లక్షల 4 వేల 699. ఇది గత శాసనసభ ఎన్నికల రికార్డును అధిగమించింది. 2018 ఎన్నికల సమయంలో రూ.97 కోట్ల నగదు, 2.3 కోట్ల విలువైన మద్యం, రూ.42 లక్షల విలువైన మత్తు పదార్థాలు, 3.2 కోట్ల బంగారం, వెండి, తదితర విలువైన వస్తువులు స్వాధీనం చేసుకున్నారు. మరో 34 కోట్ల విలువైన ఇతర వస్తువులు, సామగ్రిని స్వాధీనం చేసుకున్నారు. నగదు, అన్ని వస్తువులను కలిపితే 2018 ఎన్నికల సమయంలో స్వాధీనం చేసుకున్న మొత్తం విలువ రూ.137 కోట్ల 97 లక్షలు మాత్రమే. అప్పుడు ఎన్నికల ప్రక్రియ మొత్తంలో స్వాధీనం అయిన మొత్తం కంటే.. ఈ దఫాలో షెడ్యూల్ నుంచి పది రోజుల్లోనే అంతకు మించిన మొత్తం పట్టుబడింది.
నామినేషన్ల ఘట్టం, ప్రచారం, ఎన్నికల ప్రక్రియ పూర్తయ్యే వరకు ఇంకా ఎంత మొత్తం స్వాధీనం చేసుకుంటారో చూడాలి. అయితే, ఎన్నికల కోడ్ పేరిట తాము ఇబ్బందులకు గురవుతున్నామని పలువురు ఆవేదన వ్యక్తం చేస్తున్నారు. అత్యవసరాలు, వ్యాపారం కోసం తీసుకెళ్తున్న నగదును కూడా స్వాధీనం చేసుకుంటున్నారని అంటున్నారు. రోజువారీ లావాదేవీలు, బ్యాంకులకు వెళ్తున్న సమయంలోనూ తమ వద్ద ఉన్న నగదు స్వాధీనం చేసుకుంటున్నారని మద్యం దుకాణదారులు ఇప్పటికే ఫిర్యాదు చేశారు. ఆభరణాలు అన్నింటికీ రసీదులు ఉండబోవని, వాటిని కూడా స్వాధీనం చేసుకోవడం వల్ల తమ ఉపాధి దెబ్బ తింటుందని స్వర్ణకారుల సంఘం వాపోతోంది.
