Mission Bhageeratha: వేసవిలో ఏ ఒక్క గ్రామంలోనూ నీటి ఎద్దడి రావద్దని ఇంజినీర్లకు మిషన్ భగీరథ శాఖ కార్యదర్శి స్మితా సబర్వాల్ సూచించారు. అధికారులు ప్రతి గ్రామానికి వెళ్లి పరిస్థితిని సమీక్షించాలని ఆదేశించారు. జలాశయాల్లో నీటిమట్టాన్ని ఎప్పటికప్పుడు పరిశీలించాలని తెలిపారు. ప్రజలకు నీటిని పొదుపుగా వాడేలా అవగాహన కల్పించాలన్నారు. వేసవిలో నీటి ఎద్దడి తలెత్తకుండా తీసుకోవాల్సిన చర్యలపై అన్ని జిల్లాల ఎస్ఈలు, ఈఈలతో దృశ్యమాధ్యమ సమీక్ష నిర్వహించారు. నీటి నాణ్యత, పరిమాణం విషయంలో అసలు రాజీపడొద్దని స్పష్టం చేశారు.
వేసవిలో ఎక్కడా తాగునీటికి ఇబ్బంది లేకుండా చర్యలు తీసుకోవాలని ఇంజినీర్లను స్మితా సబర్వాల్ ఆదేశించారు. వేసవిలో నాలుగు నుంచి ఐదు డిగ్రీల మేర ఉష్ణోగ్రతలు పెరుగుతాయన్న హెచ్చరికల నేపథ్యంలో తాగునీటి సరఫరాలో తగిన జాగ్రత్తలు తీసుకోవాలని సూచించారు. ప్రజలకు తాగునీటి కష్టాలు ఉండరాదన్న ప్రభుత్వ సంకల్పాన్ని చిత్తశుద్ధితో కొనసాగించాలని తెలిపారు. గ్రామపంచాయతీల అభిప్రాయాలు తీసుకుంటూ నీటి సరఫరా చేయాలని చెప్పారు. పైపు లీకేజీలు అరికట్టి నీటి వృథా కాకుండా చూడాలని అధికారులకు సూచించారు.
ట్రీట్మెంట్ ప్లాంట్లలో మోటార్లు, పంపులు, ఎలక్ట్రో మెకానికల్ పనితీరును ఎప్పటికప్పడు పరిశీలించాలని స్మితా సబర్వాల్ తెలిపారు. ఎక్కడైనా సమస్యలు ఉంటే వెంటనే మరమ్మతులు చేయాలన్నారు. అధికారులు ప్రతి గ్రామానికి వెళ్లి పరిస్థితులను ఎప్పటికప్పుడు సమీక్షించాలని పేర్కొన్నారు. కింది స్థాయి సిబ్బందితో చీఫ్ ఇంజినీర్లు ప్రతిరోజూ మాట్లాడి సమన్వయంతో పని చేయాలన్నారు. మిషన్ భగీరథకు దేశంలోనే ఉన్న మంచిపేరును నిలబెట్టుకునేలా అందరూ పనిచేయాలని కోరారు. ఈ సమీక్షలో ఈఎన్సీ కృపాకర్ రెడ్డి, ప్రభుత్వ సలహాదారు జ్ఞానేశ్వర్, ఇంజినీర్లు పాల్గొన్నారు.
ఇదీ చూడండి: Wipro Consumer Care: 'అజీమ్‌ ప్రేమ్‌జీ వ్యక్తిత్వం అందరికీ ఆదర్శం'
