'మేడారం జాతరకు శాశ్వత ఏర్పాట్లు'

​​​​​​​ భారతదేశంలో కుంభమేళ తర్వాత అత్యధికంగా భక్తులు తరలివచ్చే మేడారం జాతరను ఘనంగా నిర్వహించేందుకు ప్రభుత్వం సిద్ధమైంది. ఇందుకు సంబంధించి ఏర్పాట్లపై మంత్రులు దయాకర్​ రావు, కొప్పుల, ఇంద్రకరణ్​ రెడ్డి సమీక్షించారు. మేడారం జాతరను జాతీయ పండుగగా గుర్తించాలని కేంద్ర ప్రభుత్వానికి మరోసారి విజ్ఞప్తి చేయాలని నిర్ణయించారు. శాశ్వత ఏర్పాట్ల కోసం పది కోట్లతో భూసేకరణ చేయాలని అధికారులను ఆదేశించించారు. జాతర నిర్వహణపై పూజారులు, గిరిజన సంఘాలతో సంప్రదింపులు చేసే బాధ్యతను ములుగు కలెక్టర్, ఐటీడీఏ పీఓకు అప్పగించారు.

ప్రతిష్ఠాత్మక మేడారం జాతరను ఘనంగా నిర్వహించేలా శాశ్వత ప్రాదిపదికన ఏర్పాట్లు చేయాలని ప్రభుత్వం నిర్ణయించింది. జాతర ఏర్పాట్లపై మంత్రులు ఎర్రబెల్లి దయాకర్ రావు, ఇంద్రకరణ్ రెడ్డి, కొప్పుల ఈశ్వర్ సమీక్ష నిర్వహించారు. గద్దెల పరిసరాల్లో భక్తుల వసతులు, ఆర్టీసీ సేవలు, పోలీసు సిబ్బందికి అవసరమైన శాశ్వత నిర్మాణాల కోసం తొలిదశలో పదికోట్లతో భూసేకరణ ప్రణాళిక రూపొందించాలన్నారు. జాతరకు కోటి 40 లక్షలకుపైగా మంది భక్తులు వచ్చే అవకాశం ఉన్నందున అన్ని శాఖలు, ముఖ్యంగా పోలీసు శాఖతో సమన్వయంతో జాతరకు వచ్చే భక్తుల సంఖ్యకు అనుగుణంగా ఏర్పాట్లు ఉండాలని చెప్పారు.

సమగ్ర నివేదిక

జాతరలో కీలకమైన పారిశుద్ధ్యం, తాగునీటి కోసం ఇప్పటి నుంచే ఏర్పాట్లు చేయాలని... మిషన్‌ భగీరథ నీటిని సరఫరా చేసేలా ఉండాలని ఆదేశించారు. జాతరకు కావాల్సిన అన్ని అంశాలపై సమగ్ర నివేదికను తయారు చేయాలని... వచ్చే నెలలో మరోమారు సమావేశమై ప్రతిపాదనలను ముఖ్యమంత్రి కేసీఆర్​కు సమర్పించాలని తెలిపారు. మేడారం పూజారులు, ఆదివాసీల మనోభావాలు, సంప్రదాయాల ప్రకారం జాతరను నిర్వహించాలని స్పష్టం చేశారు. వారితో సంప్రదింపులు జరిపే బాధ్యతను ములుగు కలెక్టర్, ఏటూరునాగారం ఐటీడీఏ పీఓలకు మంత్రులు అప్పగించారు.

నగరాల్లో డిజిటల్‌ స్క్రీన్లు

జాతర గొప్పదనాన్ని అందరికీ తెలిపేలా హైదరాబాద్, వరంగల్‌ నగరాల్లో డిజిటల్‌ స్క్రీన్లు ఏర్పాటు చేయాలని అధికారులను ఆదేశించారు. మేడారం జాతరకు కేంద్ర గిరిజన సంక్షేమ మంత్రి, అన్ని రాష్ట్రాల గిరిజన సంక్షేమ శాఖల మంత్రులతోపాటు ప్రపంచ వ్యాప్తంగా ఉన్న ప్రముఖ గిరిజన సంఘాల ప్రతినిధులను అహ్వానించనున్నట్లు తెలిపారు.

ఇదీ చూడండి: చిరునవ్వుల చిన్నమ్మకు వినూత్న నివాళి!