ఇంటర్ జవాబు పత్రాల కోడింగ్ ప్రక్రియ ఇవాళ ప్రారంబించినట్లు విద్యా శాఖ మంత్రి సబితా ఇంద్రారెడ్డి తెలిపారు. ఈనెల 12 నుంచి మూల్యాంకనం నిర్వహించి.. నెలాఖరు వరకు పూర్తి చేస్తామని తెలిపారు. జూన్ రెండో వారంలో ఇంటర్మీడియట్ ఫలితాలను ప్రకటించనున్నట్లు మంత్రి చెప్పారు. మూల్యాంకన కేంద్రాలను 12 నుంచి 33కి పెంచినట్లు పేర్కొన్నారు. మొత్తం తొమ్మిదిన్నర లక్షల మంది విద్యార్థులకు చెందిన 53 లక్షల జవాబు పత్రాలు మూల్యాంకనం చేయాల్సి ఉందని తెలిపారు. మూల్యాంకన కేంద్రాల్లో కరోనా నివారణ జాగ్రత్తలన్నీ తీసుకుంటున్నట్లు సబితా ఇంద్రారెడ్డి వివరించారు. మూల్యాంకన సిబ్బందికి రవాణ, వసతి సదుపాయాలు సిద్దం చేస్తున్నట్లు పేర్కొన్నారు.
హైకోర్టు అనుమతిస్తే పదోతరగతి పరీక్షలు
లాక్డౌన్ కారణంగా మార్చి 23న జరగాల్సిన ఇంటర్మీడియట్ ద్వితీయ సంవత్సరం మోడరన్ లాంగ్వేజెస్, జాగ్రఫీ పరీక్షను ఈనెల 18న నిర్వహించాలని నిర్ణయించినట్లు సబితా ఇంద్రారెడ్డి తెలిపారు. మిగిలిపోయిన ఇంటర్మీడియట్ పరీక్షను రాష్ట్రవ్యాప్తంగా 856 మంది రాయాల్సి ఉందన్నారు. పదో తరగతి పరీక్షలు, ఇంటర్మీడియట్ సమాధాన పత్రాల మూల్యాంకనం ఏర్పాట్లపై విద్యా శాఖ మంత్రి సబితా ఇంద్రారెడ్డి సమీక్ష నిర్వహించారు. పదో తరగతి పరీక్షల కోసం హైకోర్టు అనుమతి తీసుకుంటామని విద్యా శాఖ మంత్రి సబితా ఇంద్రారెడ్డి తెలిపారు. హైకోర్టు అనుమతిస్తే అన్ని జాగ్రత్తలతో పదో తరగతి పరీక్షలు నిర్వహిస్తామని మంత్రి చెప్పారు. ఒక్కో బెంచిపై ఒకే విద్యార్థి పరీక్ష రాసేలా ఏర్పాట్లు చేస్తామని.. దాని కోసం రాష్ట్రవ్యాప్తంగా 2500 పరీక్ష కేంద్రాలుండగా.. వాటిని రెట్టింపు చేస్తామన్నారు. విద్యార్థులందరికీ మాస్కులు, శానిటైజర్లు ఇవ్వనున్నట్లు చెప్పారు.
