hyderabad consumer court : వస్తువులను భద్రంగా చూసుకుంటామని హామీ ఇచ్చి నిర్లక్ష్యంగా వ్యవహరించిన లియో ప్యాకర్స్ అండ్ మూవర్స్ తీరుపై జిల్లా వినియోగదారుల కమిషన్ అభ్యంతరం వ్యక్తం చేసింది. మరమ్మతులకు గురైన వాటికి పరిహారం చెల్లించాలని ఆదేశాలు జారీచేసింది.
ఫిర్యాదుదారుడు హైదరాబాద్ బంజారాహిల్స్‌కు చెందిన అశోక్ కొండపాటి విశ్రాంత ఉద్యోగి. తాను ఉంటున్న ఇంట్లోని వస్తువులను వేరే చోటికి తరలించి భద్రపరిచేందుకు.. లియో ప్యాకర్స్ అండ్ మూవర్స్ ప్రైవేట్ లిమిటెడ్‌ సంస్థను ఆశ్రయించారు. గచ్చిబౌలి, బాలానగర్‌ ప్రాంతాల్లోని వేర్హౌస్లలో సామగ్రిని భద్రపరచొచ్చు అని సంస్థ చెప్పింది. అశోక్ స్వయంగా ఈ రెండు ప్రాంతాలను పరిశీలించిన అనంతరం బాలానగర్‌ వేర్హౌస్కు తరలించాలని కోరారు. ఇందుకోసం 15 నెలలకు రూ.1,69,648 (డెలివరీ, స్టోరేజ్‌ ఛార్జీలు) చెల్లించారు.
అనంతరం కొండాపూర్‌లో తాను కొత్తగా కొనుగోలు చేసిన అపార్ట్‌మెంట్‌కు ఆయా వస్తువులను భద్రంగా చేర్చాలని లియో ప్యాకర్స్ అండ్ మూవర్స్ సంస్థను అశోక్ కోరారు. అయితే తన వస్తువులు గచ్చిబౌలిలోని వేర్హౌస్లో ఉన్నాయని తెలుసుకొని అశోక్ అక్కడకి వెళ్లారు. అయితే తన వస్తువులన్నీ పాడైపోయి కనిపించాయి. దీనిపై సదరు సంస్థ ప్రశ్నించారు. తన అనుమతి లేకుండా వస్తువులను గచ్చిబౌలికి ఎందుకు తరలించారని నిలదీశారు. తనకు పరిహారం ఇవ్వాలని డిమాండ్ చేశారు. దీనిపై లియో ప్యాకర్స్ అండ్ మూవర్స్ సంస్థ స్పందించలేదని అశోక్ తెలిపారు. దీంతో జిల్లా వినియోగదారుల కమిషన్ను ఆశ్రయించినట్లు చెప్పారు. అశోక్ పిటిషన్ను విచారించిన వినియోగదారుల కమిషన్.. వస్తువుల మరమ్మతులకు రూ.50 వేలు, పరిహారంగా రెండు లక్షల రూపాయలు, కేసు ఖర్చుల కోసం మరో రూ.5 వేలు చెల్లించాలని తీర్పు ఇచ్చింది.
ఇదీచూడండి: నిరుద్యోగులకు గుడ్ న్యూస్.. ఈ నెలలోనే ఉద్యోగాల భర్తీకి నోటిఫికేషన్!
