తెరాస అధ్యక్ష పదవికి ఈ నెల 25న ఎన్నిక జరగనుంది. అదే రోజు పార్టీ ప్లీనరీ నిర్వహిస్తామని తెరాస పార్టీ కార్యనిర్వహక అధ్యక్షుడు, రాష్ట్ర మంత్రి కేటీఆర్ ప్రకటించారు. ఈ నెల 25న హైటెక్స్లో తెరాస ప్లీనరీ జరగనుంది. హైటెక్స్లో ప్లీనరీ ఏర్పాట్లను కేటీఆర్ పరిశీలించారు. తెరాస ద్విదశాబ్ధి వేడుకలను ఘనంగా నిర్వహిస్తామని మంత్రి కేటీఆర్ ఇప్పటికే వెల్లడించారు. తెరాస నేతలు, వివిధ విభాగాల అధికారులతో కేటీఆర్ భేటీ అయ్యారు.అనంతరం పార్కింగ్, ట్రాఫిక్, పారిశుద్ధ్య నిర్వహణ, భద్రత ఏర్పాట్లపై చర్చించారు.హైటెక్స్లో మంత్రి శ్రీనివాస్ గౌడ్, ఎంపీలు, ఎమ్మెల్యేలు, మేయర్ విజయలక్ష్మితో కలిసి ఏర్పాట్లను మంత్రి కేటీఆర్ పరిశీలించారు.
2019లో పార్లమెంట్‌ ఎన్నికల కారణంగా.. 2020, 2021లలో కరోనా కారణంగా ప్లీనరీ నిర్వహించలేదని మంత్రి తెలిపారు. ప్రస్తుతం ఇతర రాష్ట్రాలకంటే తెలంగాణలో కరోనా తీవ్రత తగ్గిందని.. టీకాల ప్రక్రియ కూడా వేగంగా జరుగుతోందని ఆయన వెల్లడించారు. హైటెక్స్లో నిర్వహణ కోసం ఈనెల 17న పార్టీ అసెంబ్లీ, పార్లమెంటరీ సభ్యుల సమావేశం నిర్వహిస్తారని ఆయన ప్రకటించారు.
పాసులు ఉంటేనే..
ప్లీనరీ సమావేశం కోసం ప్రజాప్రతినిధులకు పాసులు మంజూరు చేస్తామని.. పాసులు ఉన్నవారినే అనుమతిస్తారని కేటీఆర్ వెల్లడించారు. ముఖ్యమంత్రి కేసీఆర్ నేతృత్వంలో తెలంగాణ అభివృద్ధి పథంలో దూసుకెళ్తోందని ఆయన పేర్కొన్నారు. రాష్ట్ర సంక్షేమాన్ని చూసి సరిహద్దులోని ఇతర రాష్ట్రాల ప్రజలు తెలంగాణలో కలిసేందుకు ముందుకొస్తున్నారన్నారు. భారత ప్రభుత్వం తెలంగాణను స్ఫూర్తి పొందే స్థాయికి రాష్ట్రం చేరుకుందన్నారు. తెలంగాణ సర్కారు ప్రవేశపెట్టిన కొన్ని పథకాలను చూసి కేంద్రం కూడా స్ఫూర్తి పొందిందని.. ముఖ్యమంత్రి కేసీఆర్ ప్రవేశపెట్టిన రైతుబంధును చూసి కేంద్ర ప్రభుత్వం పీఎం కిసాన్ అనే పథకాన్ని తీసుకొచ్చిందన్నారు. మిషన్ భగీరథను చూసి కేంద్రం జల్ జీవన్ను తీసుకొచ్చిందని ఆయన అభిప్రాయపడ్డారు. టీఎస్ ఐపాస్ నుంచి స్ఫూర్తి పొంది 'ఇన్వెస్ట్ ఇండియా'ను తీసుకొచ్చారన్నారు. ఈ 20 ఏండ్ల తెలంగాణ రాష్ట్ర సమితి ప్రస్థానాన్ని పురస్కరించుకుని పార్టీ ద్విదశాబ్ధి వేడుకతో పాటు, తెరాస అధ్యక్ష ఎన్నిక.. ఈ రెండు ముఖ్యమైన ఘట్టాలను తెరాస ఆధ్వర్యంలో నిర్వహించడం జరుగుతుందన్నారు.
కమిటీల ఏర్పాటు
ప్లీనరీ కార్యక్రమాన్ని ఘనంగా నిర్వహించాలనే ఉద్దేశంతో పార్టీ తరఫున కమిటీలను ఏర్పాటు చేసినట్లు మంత్రి కేటీఆర్ వెల్లడించారు.
- ఆహ్వాన కమిటీ- మంత్రి సబితా ఇంద్రారెడ్డి(అధ్యక్షతన), రంజిత్రెడ్డి, అరికపూడి గాంధీ, విజయలక్ష్మి
- సభా ప్రాంగణ కమిటీ - గ్యాదరి బాలమల్లు(అధ్యక్షతన), మారెడ్డి శ్రీనివాస్ రెడ్డి, గోపినాథ్, ఎమ్మెల్సీ నవీన్ కుమార్, బొంతు రామ్మోహన్
- వాలంటీర్స్ కమిటీ- శంభీపూర్ రాజు(అధ్యక్షతన)- యువజన విభాగం మొత్తం ఈ కమిటీలో ఉంటుంది
- వాహనాల పార్కింగ్ కమిటీ- ఎమ్మెల్యే కేపీ వివేకానంద, బండి రమేశ్
- భోజన ఏర్పాట్ల కమిటీ- మాధవరం కృష్ణారావు
- తీర్మానాల కమిటీ -మాజీ స్పీకర్ సిరికొండ మధుసూధనా చారి(అధ్యక్షతన), కృష్ణమూర్తి
- మీడియా కమిటీ - ఎమ్మెల్సీ భానుప్రసాద్, కర్నె ప్రభాకర్
నగర అలంకరణ కోసం, హోర్డింగ్స్ ఏర్పాట్ల కోసం మంత్రులు తలసాని శ్రీనివాస్ యాదవ్, మల్లారెడ్డి, సబితా ఇంద్రారెడ్డి, మహమూద్ అలీల నేతృత్వంలో ఏర్పాట్లు జరగనున్నాయని మంత్రి కేటీఆర్ వెల్లడించారు.
ఇదీ చదవండి: KTR: తెరాస అధ్యక్షుడి ఎన్నికకు షెడ్యూల్.. కేటీఆర్ ఏమన్నారంటే...
