BRS Protest against Singareni privatization: ప్రధాని మోదీ ఈనెల 8న రాష్ట్ర పర్యటనకు రానున్నారు. ఈ మేరకు సింగరేణి జిల్లాల్లో మహా ధర్నాలు చేయాలని బీఆర్ఎస్ నిర్ణయించింది. కేంద్ర ప్రభుత్వం సింగరేణిని ప్రైవేటీకరించే కుట్రలు చేస్తోందని కేటీఆర్ మండిపడ్డారు. ప్రైవేటీకరణ ప్రయత్నాలను ఆపాలని రాష్ట్ర ప్రభుత్వంతో పాటు సింగరేణి కార్మికులు అనేకసార్లు కోరినప్పటికీ.. కేంద్రం కుట్రపూరితంగా గనుల వేలం ప్రక్రియను మరోసారి తెరపైకి తెచ్చిందన్నారు.
BRS Maha Dharna in Singareni : వేలం లేకుండా బొగ్గు గనులను సింగరేణికి కేటాయించాలని కేటీఆర్ అన్నారు. ప్రైవేటీకరణ చేయబోమని మాటిచ్చి నిలుపుకోలేక పోయిన ప్రధాని నరేంద్ర మోదీ.. రాష్ట్రానికి వచ్చి ఏం చెబుతారని మంత్రి ప్రశ్నించారు. తెలంగాణను దెబ్బ కొట్టాలన్న దురుద్దేశంతోనే కేంద్ర ప్రభుత్వం పదేపదే సింగరేణి ప్రైవేటీకరణను తెరపైకి తెస్తోందని కేటీఆర్ ఆరోపించారు. లాభాల్లో నడుస్తున్న అనేక ప్రభుత్వరంగ సంస్థలను అప్పనంగా అమ్మేస్తున్న కేంద్ర ప్రభుత్వం... సింగరేణిని సైతం అమ్మాలని చూస్తుందని మండిపడ్డారు.
BRS Maha Dharna in Singareni Tomorrow : లాభాల బాటలో ఉన్న సింగరేణికి.. భవిష్యత్తులో బొగ్గు గనులు కేటాయించకుండా నష్టాల బాట పట్టించాలన్న ఆలోచనతోనే కేంద్ర ప్రభుత్వం పావులు కదుపుతుందని మంత్రి దుయ్యబట్టారు. గుజరాత్ మినరల్ డెవలప్మెంట్ కార్పొరేషన్‌కు నామినేషన్ పద్ధతిన భారీగా లిగ్నైట్ గనులు కేటాయించిన కేంద్రం.. సింగరేణికి కూడా బొగ్గు గనులను కేటాయించాలని కోరితే.. పెడచెవిన పెట్టిందన్నారు. సొంత రాష్ట్రం గుజరాత్‌పై అపార ప్రేమ చూపుతున్న ప్రధాని.. ప్రగతిశీల తెలంగాణపై వివక్ష చూపుతున్నారని కేటీఆర్ ఆవేదన వ్యక్తంచేశారు.
సింగరేణి సంక్షోభంలోకి వెళితే దక్షిణ భారతదేశ థర్మల్ విద్యుత్ ఉత్పత్తి వ్యవస్థ కుప్పకూలుతుందనే సంగతి ప్రధానికి తెలియదా అని కేటీఆర్ ప్రశ్నించారు. సింగరేణి ప్రైవేటీకరణ కేవలం ఆరు జిల్లాలకే పరిమితం కాదని.. తెలంగాణ మొత్తానికి ముడిపడి ఉందన్నారు.. రాష్ట్రానికి ఆర్థిక, సామాజిక జీవనాడి వంటి సింగరేణి ప్రైవేటీకరణపై కేంద్ర ప్రభుత్వం వెనక్కి తగ్గకుంటే మరో ప్రజా ఉద్యమం నిర్మిస్తామని కేటీఆర్ స్పష్టం చేశారు.
సింగరేణిని ప్రైవేటీకరించే కేంద్రం కుట్రలు ఫలిస్తే.. తెలంగాణ చీకటిమయం అవుతుందన్నారు. ప్రైవేటీకరణపై ఆందోళనలు చేస్తున్న ఉద్యోగులు, కార్మికులకు బీఆర్ఎస్ అండగా ఉంటుందన్నారు. తెలంగాణ రాష్ట్ర సాధన ఉద్యమం సింగరేణి నుంచే ఉవ్వెత్తున ఎగిసి గమ్యాన్ని ముద్దాడిందన్న కేటీఆర్... ఈ సారి పురుడుపోసుకునే మహోద్యమంతో కేంద్ర ప్రభుత్వం కుప్పకూలక తప్పదని హెచ్చరించారు.
ఇవీ చదవండి:
