Kishan Reddy: కొవిడ్‌తో రెండేళ్లకుపైగా దెబ్బతిన్న పర్యాటక రంగాన్ని దేశవ్యాప్తంగా నిలబెట్టే ప్రయత్నాలు మొదలు పెట్టామని కేంద్ర పర్యాటక, సాంస్కృతిక శాఖ మంత్రి కిషన్‌రెడ్డి పేర్కొన్నారు. ఈ-వీసా, ఫ్రీ వీసా విధానంతో 170 దేశాల విదేశీ పర్యాటకుల్ని ఆకర్షిస్తామన్నారు. జాతీయ సంస్కృతి మహోత్సవం నేపథ్యంలో ఆదివారం నిర్వహించిన సమావేశంలో ఆయన మాట్లాడారు.
ప్రోత్సాహకంగా ముందుకొచ్చిన 5 లక్షల మంది విదేశీ పర్యాటకులకు ఈ-వీసాలు ఉచితంగా ఇవ్వబోతున్నామని మంత్రి కిషన్‌రెడ్డి పేర్కొన్నారు. అన్ని రాష్ట్రాల పర్యాటక, సాంస్కృతిక శాఖల మంత్రులు, ఉన్నతాధికారులతో ఏప్రిల్‌ 12, 13 తేదీల్లో దిల్లీలో సమావేశం నిర్వహించనున్నట్లు తెలిపారు. ఆక్రమణలకు గురవుతున్న గోల్కొండ కోట సహా పురాతన కట్టడాల సంరక్షణకు వచ్చే పార్లమెంటు సమావేశాల్లో కఠిన చట్టాన్ని తీసుకువస్తామని వెల్లడించారు. ఇది అటవీ చట్టం తరహాలో ఉండాలని ప్రధానితో మాట్లాడతామన్నారు.
రామప్ప ఆలయానికి రూ.50 కోట్లకు పైగా నిధులివ్వాలని నిర్ణయించామని కిషన్‌రెడ్డి తెలిపారు. పర్యాటకాన్ని పెంచేందుకు 3,600 రైలుబోగీల్ని పర్యాటకశాఖ లేదా ప్రైవేటు ఆపరేటర్లకు ఇచ్చే ఆలోచన కేంద్రం చేస్తోందన్నారు. దేశంలోని 75 పర్యాటకప్రాంతాల్ని అంతర్జాతీయ వసతులతో అభివృద్ధి చేస్తామని.. అందులో తెలంగాణ నుంచి ఎంపిక చేసే ప్రాంతాల గురించి రాష్ట్ర ప్రభుత్వంతో చర్చిస్తామని కిషన్‌రెడ్డి చెప్పారు.
రెండేళ్లకోసారి జరిగే జాతీయ సంస్కృతి మహోత్సవాల్ని ఈసారి తెలుగురాష్ట్రాల్లో నిర్వహిస్తానని చెప్పగానే ప్రధానమంత్రి పెద్దమనసుతో అంగీకరించారని కిషన్‌రెడ్డి తెలిపారు. ఈ నెల 26న రాజమహేంద్రవరంలో ప్రారంభమైన ఉత్సవాలు.. 29, 30 తేదీల్లో వరంగల్‌లో, ఏప్రిల్‌ 1 నుంచి 3 వరకు హైదరాబాద్ ఎన్టీఆర్‌ స్టేడియంలో జరుగుతాయన్నారు.
"నేను ఎన్ని రోజులు మంత్రి పదవిలో ఉంటానన్న విషయంపై తెరాస మంత్రుల సర్టిఫికెట్లు నాకు అవసరం లేదు. పదవులు శాశ్వతం కాదు. నమ్మిన సిద్ధాంతం కోసం భాజపాలో చేరి పనిచేస్తున్నా. ఆ జెండా కప్పుకొనే పోతాను తప్ప.. పార్టీలు మారే వ్యక్తిని కాదు. ఏడు మెగా టెక్స్‌టైల్‌ పార్కులు ఏర్పాటు చేయాలని కేంద్రం నిర్ణయిస్తే.. ప్రధాని మోదీ, కేంద్రమంత్రి గోయల్‌తో మాట్లాడి ఒక పార్కు తెలంగాణకు కావాలని అడిగా. ఈ విషయంలో ఇప్పటివరకు రాష్ట్ర ప్రభుత్వం నుంచి అతీగతీ లేదు. వరంగల్‌కు సైనిక్‌స్కూల్‌ విషయంలోనూ నాలుగైదేళ్లుగా రాష్ట్రం స్పందించట్లేదు."
- కిషన్‌రెడ్డి కేంద్ర పర్యాటక, సాంస్కృతిక శాఖ మంత్రి
ఇదీ చదవండి: Sand stocks: పుష్కలంగా ఇసుక.. అందుబాటు ధరల్లోనే..
