Kishan reddy on Palm Oil Cultivation : కేంద్ర ప్రభుత్వం 2021-22 నుంచి 2025-26 వరకు 5 సంవత్సరాల కాలానికి నేషనల్ మిషన్ ఆన్ ఎడిబుల్ ఆయిల్ - ఆయిల్ పామ్ కార్యక్రమానికి ఆమోదం తెలిపిందని కేంద్రమంత్రి జి.కిషన్రెడ్డి చెప్పారు. దేశ వ్యాప్తంగా పామాయిల్ పంట సాగుకు అనుకూలంగా ఉన్న భూమిలో 15 శాతం తెలంగాణలోనే ఉందని తెలిపారు. కేంద్ర ప్రభుత్వం ప్రతిష్ఠాత్మకంగా చేపట్టిన నేషనల్ మిషన్ ఆన్ ఎడిబుల్ ఆయిల్ - ఆయిల్ పామ్ కార్యక్రమం తెలంగాణ రైతులకు ఎంతో లాభాన్ని చేకూరుస్తుందని ఆయన వివరించారు.
పామాయిల్ దిగుమతులపై ఆధారపడటాన్ని తగ్గించి, 2025-26 నాటికి పామాయిల్ సాగును 10 లక్షల హెక్టార్లకు పెంచాలని, మరో 6.5 లక్షల హెక్టార్ల భూమిని పామాయిల్ సాగులోకి తీసుకురావాలన్నదే ఆయిల్ పామ్ కార్యక్రమం ముఖ్య ఉద్దేశమని కిషన్రెడ్డి అన్నారు. ఈశాన్య రాష్ట్రాల్లో 3.28 లక్షల హెక్టార్ల భూమిని, మిగిలిన రాష్ట్రాలన్నీ కలిపి 3.22 లక్షల హెక్టార్ల భూమిని పామాయిల్ సాగులోకి తీసుకురావాలని లక్ష్యంగా పెట్టుకున్నట్లు వెల్లడించారు. ఈ పథకం యొక్క మొత్తం అంచనా వ్యయం రూ.11,040 కోట్లు కాగా.. అందులో ఈశాన్య రాష్ట్రాలకు 90:10 ప్రాతిపదికన, మిగిలిన రాష్ట్రాలకు 60:40 ప్రాతిపదికన భారత ప్రభుత్వం రూ.8,844 కోట్లను ఖర్చు చేయనుందన్నారు.
మొత్తం వ్యయంలో రూ. 5,170 కోట్లను తెలంగాణ వంటి జనరల్ కేటగిరీ రాష్ట్రాలకు కేటాయించగా.. అందులో భారత ప్రభుత్వం చెల్లించవలసిన వాటా రూ.3,560 కోట్లని తెలిపారు. తెలంగాణలోని ఈ 4.36 లక్షల హెకార్ల భూమి ఆదిలాబాద్, భద్రాద్రి కొత్తగూడెం, జగిత్యాల, జనగామ, జయశంకర్ భూపాలపల్లి, జోగులాంబ గద్వాల, కామారెడ్డి, ఖమ్మం, కుమురం భీం ఆసిఫాబాద్, మహబూబాబాద్, మహబూబ్నగర్, మంచిర్యాల, మేడ్చల్ -మల్కాజిగిరి, నాగర్కర్నూల్, నల్గొండ, నిర్మల్, నిజామాబాద్, పెద్దపల్లి, రాజన్న సిరిసిల్ల, రంగారెడ్డి, సంగారెడ్డి, సిద్దిపేట, సూర్యాపేట, వికారాబాద్, వనపర్తి, వరంగల్, యాదాద్రి భువనగిరి వంటి 27 జిల్లాల్లో విస్తరించి ఉందని తెలిపారు.
రైతులకు లబ్ధి చేకూర్చటమే ప్రధాన ఉద్దేశంగా ఎన్ఎమ్ఈఓ-ఓపీ మార్గదర్శకాలను రూపొందించటం జరిగిందన్నారు. ఎన్ఎమ్ఈఓ-ఓపీ వనరులన్నింటినీ 17 శాతం ఎస్సీలకు, 8 శాతం ఎస్టీలకు లబ్ధి చేర్చటానికి కేటాయించడం జరిగిందని తెలిపారు. ఆయా రాష్ట్రాలలో ఉన్న జనాభా ప్రాతిపదికన రాష్ట్ర ప్రభుత్వాలు ఎస్సీ, ఎస్టీ రైతులకు కేటాయింపులు చేయటానికి వీలు కల్పించటం జరిగిందన్నారు.
ఇవీ చదవండి:
