ప్రతీకారం తీర్చుకునేందుకు ప్రయత్నించి అరెస్టయ్యారు

తనను మందలించాడన్న కోపంతో ద్వేషం పెంచుకున్నాడు. ప్రతీకారం తీర్చుకునేందుకు సమయం కోసం వేచి చూశాడు. ముగ్గురు స్నేహితులతో కలిసి వెంటాడి తీవ్రంగా దాడి చేశారు. కట్టెలతో కొట్టి చంపేందుకు ప్రయత్నించారు. చివరికి కటకటాలపాలయ్యారు.

అమ్మాయిని వేధించొద్దని మందలించిన యువకునిపై ప్రతీకారం తీర్చుకునే క్రమంలో కిడ్నాప్​ చేసి హత్యకు ప్రయత్నించిన నలుగురు యువకులను నగర పోలీసులు అరెస్టు చేశారు. నిందితుల నుంచి 2 ద్విచక్ర వాహనాలు, ఓ చరవాణి, రూ. 4000 నగదు స్వాధీనం చేసుకున్నారు. హైదరాబాద్​ జమాల్​బండకు చెందిన అబ్దుల్ అజీజ్ నహాది శాలిబండకు చెందిన ఓ బాలికను వేధిస్తుండగా... ఇలియస్ అహ్మద్ మందలించాడు. ఇలియస్​పై ప్రతీకారం తీర్చుకోవాలని భావించిన అజీజ్​... స్నేహితులతో కలిసి పన్నాగం పన్ని సమయం కోసం ఎదురు చూశాడు.

ఈ నెల 14 న రాత్రి 11 గంటల సమయంలో ఇలియస్ అతని స్నేహితునితో కలిసి ద్విచక్రవాహనం మీద వెళ్లడాన్ని గమనించి వారిని అనుసరించారు. నూరి ప్యాలెస్ వద్ద కిందపడేసి ఇలియాస్​పై దాడి చేస్తుండగా అతని స్నేహితుడు తప్పించుకుని పోలీసులకు సమాచారమిచ్చాడు. ఇలియస్​ను పిలిదర్గా సమీపంలోని స్మశానవాటిక వద్దకు తీసుకెళ్లి దాడి చేశారు. అక్కడి నుంచి మల్లాపూర్​కు తీసుకెళ్లి కట్టెలతో తీవ్రంగా కొట్టారు. అప్పటికే పోలీసులు చేరుకో.. నిందితులు పరారయ్యారు. బాధితుడు ప్రస్తుతం ఆసుపత్రిలో కోలుకుంటున్నట్లు పోలీసులు తెలిపారు.

ఇవీ చూడండి: ఈ ఇద్దరు అన్నదమ్ముల్ని కష్టాలు పగబట్టినయా